خالد محەمەد رەسول
”یەكێتی دوای مام وای لێهاتووە، بۆ رزگاربوون لەو دۆخەی لە ئەنجامی ناشارەزایی كوڕانی بەسەری هاتووە، پەنا بۆ هەموو كەس و شتێك ببەن”.
هەر مرۆڤێك كە لە دامەزراوەیەك كار دەكات، ئەگەر راستگۆو دڵسۆز بێت، هەموو هەوڵێك دەدات بۆ سەركەوتنی ئەو دامەزراوەیە، بە تایبەتی ئەگەر دامەزراوەكەی لە ئاستی باڵای وڵات بێت و رەهەندی سیاسی هەبێت یا ئەگەر ئەو كەسە نوێنەرایەتی لایەنێكی سیاسی بكات و سەركەوتن و شكستی راستەوخۆ كاریگەری بكاتە سەر حزبەكەی، جولەو كردەوەكانی ئەو كەسە راستەوخۆ كاریگەری لەسەر شكۆ و هەیبەتی وڵات دادەنێت، بە تایبەتی لە رووی دیبلۆماسی و ئاستی نێودەوڵەتییەوە، بەپێی هەموو عورفێكی سیاسی و حزبی، ناكرێت لایەنێكی سیاسی بەشدار بێت لە حكومەت و بەڕێوەبەردن، بەرپرس بێت لە باشە و خراپەكانی ئیدارەدان، بەڵام لە سەرەوە خۆی بە دڵسۆز پێشان بدات و لە ژێرەوەش لە هەوڵی تێكدانی ناوبانگی حكومەت یا دامەزراوەكەی بێت.
كابینەی نۆیەمی حكومەتی هەرێمی كوردستان، بە سەرۆكایەتی مەسرور بارزانی لە ساتەوەختی دەستبەكار بوونیان تا ئێستاشی لەگەڵ دابێت، كۆمەڵێك ئەجێندای هەبووەو وەك كارنامەی كابینە كاری لەسەر كردووە، یەكێك لە كارە هەرە گرنگەكانی ئەم كابینەیە، نەهێشتنی گەندەڵی، سپیكردنەوەی پارە، قاچاغچییەتی، مافیاچییەتی، قۆرغكردنی بازاڕ، دەستبەسەر داگرتنی خاڵە سنوورییەكان، نەهێشتنی چەند مووچەیی و پارەی خەیاڵی خانەنشینی ناشایستەیی بووە، لەم روانگەیەشەوە لەلایەن شەقامی كوردستان و وڵاتانی جیهانەوە پێشوازی زۆری لێكرا. تەنها زیانمەندی ئەم هەنگاوە گرنگەی كابینەی نۆیەم، گەندەڵ و مافیاكان بوون، ئەوانە بوون كە لەسەر حیسابی ناوبانگی هەرێمی كوردستان و بژێوی هاووڵاتییان خۆیان و گرووپەكانیان دەوڵەمەندتر دەكرد. ئەم گەندەڵیانەش زۆر بەزەقی لە سنووری پارێزگای سلێمانی هەبوون، تا ئێستاش هەندێكی هەر بەردەوامە. چەند گرووپی ناو یەكێتی لەم دۆخە سوودمەند بوون، بۆیە هەر زوو كەوتنە دژایەتی كردنی چاكسازییەكان و رۆژانە كۆسپیان بۆ دروستدەكردو ئامادە نەبوون بە هیچ شێوەیەك پاڵپشتی سەرۆكی حكومەت بن، لەناو ئەو گرووپ و كەسانەش بەرپرسانی سەربازی و ئەمنی و سیاسی ئاست باڵا هەبوون، بە تایبەتی قوباد تاڵەبانی كە جێگری سەرۆكی حكومەتی هەرێمی كوردستان، بەخۆی یەكێك بووە لە دارێژەرانی كارنامەی حكومەت بۆ نەهێشتنی ئەو گەندەڵیانە، لە كەناڵەكانی راگەیاندن و بۆنەكانیشەوە پاڵپشتی خۆی بۆ نەهێشتنی گەندەڵیی دەخستەڕوو، بەڵام لە ژێرەوە كەسێك بووە هەمیشە كۆسپی بۆ هەنگاوەكانی حكومەت لە جێبەجێكردنی كارنامەی حكومەت دروستكردووە. هەر كەسێك دژایەتی كابینەی نۆیەم یا سەرۆكی حكومەتی كردبێت، قوباد تاڵەبانی لە جیاتی ئەوەی پشتگیری لە كابینەكە بكات، كەچی پاڵپشتی لەو كەسانە كردووە تا زیاتر ناوزڕاندن و تەشهیر بە حكومەت بكەن و هەنگاوەكانی حكومەت بەبێ بایەخ لەقەڵەم بدەن، کەچی لە هەموو ئەو هەنگاوانە شكستی هێناوە . یەكێك لە هەنگاوەكانی قوباد تاڵەبانی بۆ گوشار خستنەسەر كابینەی نۆیەم، تا لە هەنگاوەكانی بۆ نەهێشتنی گەندەڵی ساردی بكاتەوە، هاندانی كەسانێكی دژە نەتەوە بوو، كە لە دەرەوەی وڵات نیشتەجێن، لەناویاندا (شنیار ئەنوەر)، بەپێی دواین زانیارییەكان قوباد تاڵەبانی پاڵپشت و هاندەری ئەو ئافرەتە بووە، تا سكاڵا لە دژی سەرۆكی حكومەت تۆمار بكات، تەنها بۆ ئەوەی وەك كارتی گوشار بەكاری بێنن لە پاشگەزبووەنەی لەو بڕیارانەی داوێتی، بەڵام سووربوونی سەرۆكی حكومەت لە كارەكانی و بێ منەتی لەو سكاڵایەی لەسەری تۆمار كراوە، هەموویانی تووشی شۆك كرد. بە تایبەتی كە سكاڵاكار تووشی دۆڕانێكی سەرسوورهێنەری شەرمەزاركەر بوو. لە پاداشتی ئەو سكاڵایەی (شنیار ئەنوەر)، قوباد تاڵەبانی بەربژێری دەكات بۆ خولی داهاتووی پەرلەمانی كوردستان و بەڵینی ئەوەی پێدەدات بە هەموو توانایەكییەوە پاڵپشتی بكات. ئەمە سیاسەتی (دار لەژێر پێی خۆ بڕینەوەی) پێ دەگووترێت، پرسیارێك كە دەشێ قوباد لەخۆی بكات ئەوەیە؛ چۆن چاوی بەرایی دێت سەیری سەرۆكی حكومەت بكات، بە تایبەتی دوای ئەوەی دەستی ئاشكرا بوو.
ئەو ئافرەتە بە هیچ شێوەیەك وەفای بۆ خاك و نیشتمان نەبووەو هەمیشە لە دژبەرانی نەتەوەیی بووە، ئێستا چۆن وەفای بۆ یەكێتی دەبێت.
یەكێتی دوای مام وای لێهاتووە بۆ رزگاربوونی لەو دۆخەی لە ئەنجامی ناشارەزایی كوڕانی بەسەری هاتووە، پەنا بۆ هەموو كەس و شتێك ببەن.
