دیدار-سەنار ستوونی-تایبه‌ت به زاری كرمانجی
دامەزرێنەر و بەڕێوەبەری قوتابخانەی كوردی لە وڵاتی نەرویج لە دیدارێكی زاری كرمانجی، باسی بیرۆكەی كردنەوەی قوتابخانەكەیان دەكات و دەشڵێت: ” پڕۆژەكەمان فراوانتر دەكەین لەپێناو خزمەتكردن بە زمانی شرینی دایك، هەروەها ساڵانە لە بۆنە نەتەوایەتییەكان سرودی نیشتیمانی، لەلایەن قوتابیانمانەوە دەگوترێتەوە و ئاڵای كوردستان بەرز دەكرێتەوە.
لە بەردەوامی قسەكانیدا بە زاری كرمانجی ڕاگەیاند: ” ئامانجم لە دامەزراندنی قوتابخانەكە لە نەرویج، خزمەتكردنە بە زمان و كەلتووری كوردی، هەروەها بە هەر سێ زاراوەكانی سۆرانی، بادینی و لاتینی، وانەكان دەنووسرێن و دەوترێنەوە، نزیكەی 500 قوتابی لە سێ شارە جیاوازەكانی Oslo, Mysen, Sandvika سێ لقی قوتابخانەمان هەیە، نزیكەی 30 مامۆستا و فەرمانبەری پەروەردەیمان هەنە، چاومان لەوەیە بەپێی توانا لە چەند شاری دیكەش لق بكەینەوە تا هیچ ڕۆلەیەكمان بێ بەش نەبێت لە خوێندنی زمانی كوردی.
م. بڕهان فارس گەردی، لەبارەی ئەم بیرۆكەیە، گووتی: ” زمان ناسنامەیە هەروەها بۆ سڕینەوەی هەر نەتەوەیەك زمانی لە بیرببەیەوە بەسیەتی، من و هاوتەمەنەكانی خۆم كە كوردی قسە دەكەین ئەمە هیچ هونەری تیایدا نییە، ئەوەی كە شوێنی هەڵوەستەیە نەوەی داهاتووە، كە لەناو ژینگەیەكی تەواو جیاواز دایە، بگرە لە قوتابخانە، ماركێت، كۆڵان و برادەر هەمووی بە زمانی تر قسە دەكەن، لە ماڵەوەش دایك و باوك زۆربەی كاتەكان سەرقاڵی كارن، ئەمە وا دەكات نەوەیەك دروست ببێت تەنیا بەناو كورد، نە زمان دەزانی و نە ئینتیمای نیشتیمانی هەیە، بە لەبەرچاوگرتنی ئەم مەترسییە، بیرۆكەی قوتابخانەی كوردی لام گەڵاڵە بوو، تا بتوانین نەوەی داهاتووی ڕەوەندی كوردی بپارێزین و لێی نەگەڕێین زمان و كەلتووری كوردی لەناوبچێت، لەم پێناوەدا و بەهاوكاری ماموستایانی دڵسۆز، ملمان داوەتە ئەم ئەركە، شەو و ڕۆژمان لەسەر یەك داناوە و بەهیچ شێوەیەك كۆڵنادەین.
ئاماژەی بەوەشدا: ” پڕۆگرامی خوێندن بریتییە لە مێژوو و جوگرافیای كوردستان، ڕێزمانی كوردی، ئایین و…هتد و زۆر نزیكە لە پڕۆگرامی خوێندنی كوردستان، بەڵام ڕەنگە شێوازی فێركردن هەندێ جیاوازی هەبێت، قوتابخانەكەمان لە بۆنە نەتەوەییەكاندا ئامادەبوونێكی بەرچاوی هەیە، ساڵانە لە بۆنەكانی نەورۆز، سەری ساڵ و نیوەی ساڵ ئاهەنگی خێزانی فراوان بەڕێوە دەبات، لەم بۆنانەدا سرودی نیشتیمانی، لەلایەن قوتابیانەوە دەگوترێتەوە، ئاڵای كوردستان بەرزدەكرێتەوە، ئەمەش لەپێناو ئەوەیە قوتابییەكان بە سرود و ئاڵای نەتەوەییان ئاشنا بكرێن.
سەبارەت بەوەی ئایا هەڵوێستی ڕەوەندی كوردی چۆنە لە هەمبەر قوتابخانەی كوردی، ئەم مامۆستایە، ئاشكرایكرد” هەڵوێستیان باشە و ئەگەر ئەوان هاوكار نەبونایە، نەمان دەتووانی بە تەنیا هیچ بكەین، ئەوانیش ئەو بڕوایەیان بۆ دروستبووە كە زمانی دایك پێویستییەكی زانستییە، نەك تەنها نەتەوایەتیی، بەڵكوو ناكرێت منداڵی ئەوان زمانی دایك نەزانێت، نەتەوەكانی دیكەش هەریەكە بەپێی توانا كار لەسەر زمان و كەلتووری خۆیان دەكەن.
م. بڕهان فارس گەردی، هێمای بۆ ئەوەش كرد: ” هەرچەندە لەسەرەتاوە پەیوەندی و هەماهەنگیمان لەگەڵ هەرێمی كوردستان وەك پێویست نەبوو، بەڵام خوشبەختانە هاتنی شیفا بارزانی بە نوێنەرایەتی سەرۆك بارزانی، بۆ كۆكردنەوەی ڕەوەندی كوردی و یەكگرتنیان بۆ ئێمە دڵخوشكەربوو و سەردانی قوتابخانەكانی كرد و دەرفەتی بو ڕەخساندین كە لەگەڵی كۆببینەوە و كێشە و گیروگرفتەكان باس بكەین، ئامادەیی خۆی دەربڕی بو هەمو جۆرە هاوكاری و هەماهەنگییەكن هیوادارین ئەو پڕۆژەیەی بەرێزیان سەركەوتوو بێت، هەروەها ئەم هەوڵ و كوششانە بەردەوام بن و بەرفراوانتر بكرێن، بۆ ئەوەی ڕەوەندی كوردی زیاتر یەكگرتووبن، كە لەم نێوەندەشدا قوتابخانەكەمان سوودمەندی یەكەم دەبێت.
بەڕێوەبەری قوتابخانەی كوردی لە وڵاتی نەرویج، دەشڵێت: ” كە لەسەرەتاوە دەستمان كرد بەو پڕۆژەیە، ئەوەندە بەپەرۆش بووین، دەرفەتی ئەوەمان نەبوو بیر لە پاڵپشتی دارایی بكەینەوە، بەڵام سوپاس بو خوا بەهیمەتی خێرخواز و نیشتمان دۆستان قوتابخانەكانمان بەرێوە دەچن، ئامادەین لە هەموو دەرگایەك بدەین تا ئەم پڕۆژەیە بەردەوام بێت، ئامانجەكە زۆر گەورەترە لەوەی كە بیر لە داهاتوو و ماندووبوون بكەینەوە.
لەدوا قسەكانیشدا دەڵێت: ” ئەم قوتابخانەیە موڵكی هەموو كوردە، ئەمڕۆ ئێمە وەك ستاف لێرەین، لەوانەیە لە داهاتوو كەسانی دیكە شوێنمان بگرنەوە و بەردەوام بن، مامۆستایانمان هەست بە بەرپرسیارەتی دەكەن و بە پارەیەكی زور كەم ئامادەن كات و ماندووبوون ببەخشنەوە، كە دەستیشیان پێكردووە ئامانجیان داهات نەبووە، بۆیە چاومان لەوەیە وەزارەتی پەروەردە لە ڕووی پەرتووك و ئەپدەیتی پرۆگرام هاوكارمان بێت، هەروەها ماندوبونی ئەم ماموستا و ستافە لەبەرچاو بگیرێت، تا ببێتە هاندەرێك كە ماموستا و ستافی ترمان بو بێت و ئامادەی كاركردن بن لەگەڵمان.
