لە ئەشكەوتی شانەدەر چەند كارێكی گرنگ دەكرێن
شەهلا ڕەشید- مێرگەسۆر
بەرپرسی فەرمانگەی شوێنەواری مێرگەسۆر، گوتی: مێرگەسۆر لاندكی شارستانیەتە بەهۆی ئەو دیكیۆمێنت و شوێنەوارانەی كە هەنە،كە هەتا ئێستا زیاتر لە 200 شوێنەوار تۆمار كراون. دەشڵێ: لە داهاتوودا چەند كارێكی گرنگ لە ئەشكەوتی شانەدەر ئەنجام دەدرێن.
سۆران ئەمیر، بەرپرسی فەرمانگەی شوێنەواری مێرگەسۆر، بە زاری كرمانجی گوت: لە قەزای مێرگەسۆر نزیكەی 200 شوێنەوار تۆمار كراون، جگە لە مانەش چەندین شوێنەواری دیكە هەن كە تا ئێستا ڕووپێوی نەكراون، بە هەبوونی ئەو بەڵگە و دیكیۆمێنتانەی كە بەردەستن مێرگەسۆر بۆتە لاندكی شارستانییەت، بەتایبەت لەڕووی ئەو دەسكەوتانەی لە ئەشكەوتی شانەدەر بەدیار كەوتن كە دستپێكی ژیانی مرۆڤایەتی بووە، بۆیە گرنگە مۆزەخانەیەك لەم قەزایە بكرێتەوە.
بەرپرسی فەرمانگەی شوێنەواری مێرگەسۆر، ئەوەشی خستەڕوو” لە ماوەی ئەو چەند ساڵەی ڕابردوو حكوومەتی هەرێم زۆر هاوكارمان بووە و زۆر گرنگی بە شوێنەوارەكان داوە، هیوادارم لە ئایندەشدا زیاتر گرنگی بە شوێنەوارەكان بدرێت، هەروەها بتوانین شوێنی ڕاوەستانی ئۆتۆمبێل، دانانی كورسی و چەندین كاری دیكە لە ئەشكەوتی شانەدەر ئەنجام بدەین، كە تا ئێستا توانیومانە پاك و خاوێن ڕابگرین و پاسەوانیش بۆ دابنێین، ئەوەش بۆ زیاتر پارێزگاری كردن لەو شوێنەوارە گرنگەیە.
سۆران ئەمیر، بەرپرسی فەرمانگەی شوێنەواری مێرگەسۆر، ئاشكراشیكرد:” كارەكانی زانكۆی كامبریجی ئەمریكی، تا سێ ساڵی دیكە لە ئەشكەوتەكە بەردەوام دەبێت، ئەگەر تا ئەو كاتە نەگەیشتینە ئەنجام ماوەكەی درێژتر دەكەینەوە، دوای كۆتای هاتنی كارەكان هەوڵ بۆ دروستكردنی مۆزەخانەیەك دەدەین كە لە چەند مانگی ڕابردوو پرۆپۆزەڵێكیان ئامادەكردبوو لەسەر ئاستی هەموو مۆزەخانەكانی جیهانی، بۆ ئەوەی بتوانن بیرۆكەیەك وەربگرن بۆ دروستكردن و نمایشكردنی كەلەسەر و ئەو شتانەی پەیوەندییان بە مرۆڤی نیاندرتاڵ هەیە لە ئەشكەوتی شانەدەر.
