پەكەكە رۆبۆتێكی ژێر بۆ داگیركەران، بەڵایەك بۆ نەتەوەی كورد

ئیسماعیل ئیبراهیم

پەكەكە كەوتۆتە داوێكەوە خۆی و هەموو بزووتنەوەی رزگاری خوازی كورد، بە كیانی سیاسی هەرێمی كوردستانیشەوە خستۆتە مەترسییەكی مەزنەوە.
لە هیچ سووچێكی ئەم جیهانە هیچ حزبێكی نیشتمان و نەتەوەپەروەر نا دۆزییەوە وەك پەكەكە خزمەتی داگیركەرانی كردبێت.
كوشتن و تەقاندنەوە و بازرگانی كردن بە مادە هۆشبەرەكان و رفاندنی مێر منداڵان و چەكدار كردنیان، لەسەر ئاستی نێودەوڵەتی رەتكراونەتەوە. بەڵام ئەوان بە ئاشكرا و بێ گوێ دانە ناوبانگی كوردەوە كردوویانەتە پیشە و بێ منەتیشن.
لە شنگاڵ و باقی ناوچەكانی دیكە تەنها خزمەتی ئەجندای ئێران و شیعەیان كردووە، مووچە لە حەشدی شەعبی وەردەگرن، بۆ ئەوەی ئاسانكاری بۆ بەرفراوانبوونی تەوژمی شیعەگەرایی بكەن.
چەك لە عێراق وەردەگرن رووبەڕووی پێشمەرگە دەبنەوە، یەك فیشەك لە باكووری كوردستان لە ئاست هێزی تورك ناتەقێنن، لەو لاشەوە شەڕەكانیان دەگوازنەوە ناو خاكی باشووری كوردستان و دەبنە هۆكاری بەزاندنی خاكی باشوور لە لایەن هێزەكانی توركەوە.
دەڵێن ئێمە حزبێكی نەتەوەیین، بەڵام دان بە دەستەڵاتی یاسایی و شەرعی باشووری كوردستان نانێن و هەر رۆژە گێچەڵێكی پێ دەفرۆشن.
دەڵێن ئاشتی خوازین و حەز بە شەڕ ناكەین، بەڵام هۆكارن بۆ تێكدانی تەواوی پڕۆسە و هەوڵەكانی ئاشتی لەگەڵ دەوڵەتی توركیا.
نوێنەر دەنێرنە پەرلەمانی توركیا لەو لاشەوە تەقە لە پۆلیس دەكەن و هێرش دەكەنە سەر دامەزراوەكانی حكومەت.
ساڵی 1998 هێرشیان كردە سەر ناحیەی وەرتێ و 72 خانوویان سووتاند، لە گوندی فەقیانیش هەمانكاریان كرد، چەند پردێكیان روخاندن و دەیان هاووڵاتی باشووری كوردستانیان شەهید كرد، بەهۆی ئەوانەوە زیاتر لە 600 گوند لە باشوور چۆڵكراون، سەدان هاووڵاتی سڤیل بوونەتە قوربانی.
هەزاران سەرمایەداری كورد لە باكوور بەهۆی ئەوانەوە مایە پووچ بوون و رێژەی بێكاری لە باكووری كوردستان ئێستا 67% ە، بەڵام لە باقی شارەكانی دیكەی توركیا ناگاتە 12% سەیری ئەم جیاوازییە زۆرە بكەن.
هۆكارەكەشی ئەوەیە سەرمایەداران و خاوەن كۆمپانیاكان لە ترسی پەكەكە و سەرانە سەندن ئامادە نین لە باكوور پڕۆژەی وەبەرهێنانی ئەنجام بدەن.
سووتاندنی بازاڕەكانی هەولێر، كەركوك و دهۆك لە خزمەتی كێ دایە كە پەكەكە كردی. تەقاندنەوەی ئۆتۆمبێلی بەرپرسان و تیرۆر كردنیان لە سوودی كێ دایە كە پەكەكە ئەنجامیان دەدات.
ئەمانە جگە لەوەی شەرعییەتدان و رێ خۆشكردنە بۆ ئەوەی هێزەكانی توركیان و حەشدی شەعبی و ئێران بێنە سنوورەكانی نێوان باشوور، باكوور و رۆژهەڵات هیچی دیكە نین، كە گەورەترین مەترسین بۆ ئاسایشی كیانی سیاسی هەرێمی كوردستان، ئەو رەفتارە قێزەونانەی لە رێگەی بەكرێگیراوانیان لە رۆژئاوای كوردستان دەكەن، تەنها لە باربردنی ئەو دەستكەوتە كە نەتەوەی كورد لەوێ بە دەستی هێناوە، دەنا وێنەی ئاپۆ بۆ دەبێ لە دامەزراوەكانی خۆجێی رۆژئاوا هەڵبواسرێت.
بۆمب رێژ كردنی ئۆتۆمبێلی كوردێك لە گەرمیان دەبێ چ خزمەتێك بە بزووتنەوەی رزگاری خوازی نەتەوەی كورد بگەنێت، كە پەكەكە بۆ جاری چەندەم ئەو كارە دەكات.
تەواوی هەنگاوەكانی سیاسی، سەربازی و جڤاكی پەكەكە سەرەتاكەی لە هۆتافی نەتەوایەتی سەرهەڵدەدات بۆ جۆشدانی هەستی نیشتمانپەروەری تاكی كورد، بەڵام كۆتاییەكەی دەبێتە كارتێكی رۆبۆتكراو بۆ خزمەتی ئەجندای دژە كورد.
ئەو دەست درێژیانەی هێزەكانی توركیا كە ئێستا لە سنوورەكانی باشووری كوردستان روو دەدەن، ئەو مەترسیانەشی كەوتوونەتەوە سەر رۆژئاوا، ئەو دۆخە ناڵەبارە و رەش بگیرییەی لە باكوور هەیە، بەشێكی پەیوەندی بە هزر و ویستی دوژمنكارانە و داگیركارانەی تورك و عەرەب و فارسەوە هەیە، بەڵام بەشەكەی دیكەی پەیوەندی بە رەفتارە نابەرپرسانەی پەكەكەوە هەیە، كە شەرعییەت دەداتە دەستدرێژی داگیركەران.