مەهدی محەممەد – زاری كرمانجی :
بە ئەنجامدانی تاوانی دژ بە مرۆڤایەتی و بەكارهێنانی چەكی كیمیایی دژ بە هاووڵاتییانی، دادگای تێهەڵچوونەوەی پاریس بڕیاری دەستگیركردنی بۆ بەشار ئەسەد سەرۆكی سووریا دەركرد.
دادگای تێهەڵچوونەوەی پاریس، بە تۆمەتی ئەنجامدانی تاوانی دژی مرۆڤایەتی و بەكارهێنانی چەكی كیمیایی لە بەرامبەر چەكدارە دژبەرەكانی لە مانگی ئابی 2013 دا، بڕیاری دەستگیركردنی بۆ سەرۆكی سووریا پەسەند كرد.
دەسەڵاتدارانی دادوەری فەرەنسا لە مانگی تشرینی دووەمی ساڵی ڕابردوو، فەرمانی دەستگیركردنی نێودەوڵەتییان بۆ بەشار ئەسەد و ماهیری برای كە فەرماندەی فیرقەی چواری زرێپۆشە، لەگەڵ چەند فەرماندەی باڵای دیكە دەركرد، بە تۆمەتی ئەنجامدانی تاوانی جەنگ.
بەڵام لە مانگی ئایاری ڕابردوو، دادوەرانی دژە تیرۆری فەرەنسا، لە داواكارییەكدا داوایان لە دادوەری لێكۆڵینەوەكان لە دادگای تێهەڵچوونەوەی پاریس كرد، تا بڕیارێك لەبارەی هەڵوەشاندنەوەی فەرمانی دەستگیركردنی لە دژی بەشار ئەسەد دەربكەن بەو بیانووەی كە ئەو وەك سەرۆكی دەوڵەت پارێزبەندی ڕەهای هەیە لە كاتێكدا هێشتا لە دەسەڵاتدایە.
بۆیە جارێكی تر داواكارانی گشتی لە دانیشتنێكی داخراودا لە 15ی ئایاری ئەمساڵ، دووبارە فەرمانی دەستگیركردنیان لە دژی براكەی ئەسەد و فەرماندە سەربازییەكانی سووریا دەركرد.
بەشار ئەسەد سەرۆكی سووریا، تاوانبار كرا بە ئەنجامدانی هێرشی كیمیایی لە ساڵی 2013 بۆ سەر گەڕەكەكانی دەرەوەی شاری دوما و غەتوتەی ڕۆژئاوای ئۆپۆزیسیۆن.
