لە بارەی پێکانی یاریزانێکی کاریگەری سۆران زانیاری بڵاو دەبێتەوە

سەردار قازی – سۆران :

دوێنێ هەینی لە میانەی گەڕی یەکەمی خولی نایابی کوردستان، سۆران بووە میوانی هەندرێن، و سۆران 4-0 تووشی شکست بوو، بەدەر لەو شکستە یاریزانێکی کاریگەریشی لەدەستدا.
گەیلان سادق، گۆڵپارێزی نایابەکەی سۆران لە نیوەی دووەم تووشی پێکان هات و یاریگەی جێهێشت.
دوای تۆمارکردنی گۆڵی سێیەمی هەندرێن، گەیلان تووشی پێکان هات، بەگوێرەی زانیاری پێکانەکەی لە ئەژنۆیەتی بۆ ماوەیەک پێویستی بە پشوو هەیە.
بەختیار برادۆستی، ڕاهێنەری گۆڵپارێزانی سۆران، بە زاری کرمانجی گوت:” گەیلان، بەهۆی ماندووێتیەوە تووشی پێکان بووە، تا ئێستا نازانین جۆری پێکانەکەی چییە.”
بەختیار گوتیشی:” تا ئێستا پشکنینی پزیشکی بۆ ئەنجامنەدراوە، بۆیەش ماوەی دوورکەوتنەوەی دیار نییە.”
سۆران، پێنجشەممەی ئایندە لەنێو یاریگەی خۆی میوانداری دەربەندیخان دەکات، ئامادەنەبوونی گەیلان کاریگەری نێگەتیڤی بەسەر تیمەکەوە دەبێت.