جەبار عەبدوڵڵا مهاجیر
دوای شەش ساڵ جارێكیتر سەرۆك بارزانی سەردانی بەغدای كردەوە، ئەو بەغدایەی بەدەست چەندین گرفتی نێوخۆیی دەناڵێنێت، لەكاتی سەردانی سەرۆك بارزانی ئیتر سەركردەكان ڕوحێكی نەتەوەیی و نشتیمانی نوێیان هاتەوەبەر، بەشێكی زۆری سەركردە سیاسیەكانی عێراق نایشارنەوە كە بارزانی هێز و توانایە بۆ پڕۆسەی سیاسی و دروستبوونی پەیوەندیە نێودەوڵەتیەكان، بارزانی بەهەموو توانای خۆی پاڵپشت و هاوكاربووە بۆ سەرخستنی پڕۆسەی سیاسی لە عێراق و پاراستنی بەرژەوەندیە گشتییەكانی گەلانی عێراق بە هەموو پێكهاتەكانەوە.
ئەگەر وردببینەوە لە سەردانەكەی سەرۆك بارزانی، ئەوەمان بۆ دەردەكەوێت كە سەرۆك بارزانی تەنها بۆ چارەسەركردنی كێشەكانی نێوان هەرێم و بەغدا ئەو سەردانەی ئەنجام نەداوە بەڵكو بۆ بنیاتنانەوەی عێراقێك كە مافی هەموو پێكهاتەكان تیادا یەكسان بێت، بێگومان بارزانی بەجیا لەگەڵ هەموو سەرۆك كوتلەكان و بەرپرسەكانی ناو حكوومەت كۆبوویەوە، پەیامی سەرۆك بارزانی بۆ هەموولایەك وەكو یەك بوو كە دەبێت یەكگرتوانە لەبەردەم كێشەكان بوەستینەوە و خێرا ڕێگای چارەسەر بدۆزینەوە بئ ئەوەی گوێ بدەین بە بەرژەوەندیە شەخسیەكان، ئەو سێ تەوەرەی لە بابەتەكەم دەیخەمەڕوو لە گفتوگۆی بارزانی بوو لەگەڵ بەرپرسانی ئەو وڵاتەدا.
تەوەری یەكەم. چارەسەركردنی كێشە نێوخۆیەكانی ئەو وڵاتە بوو كە بە درێژایی مێژوو ناكۆكیەكی زۆر هەبووە لە نێوان شیعە و سونە، بارزانی وەكو دادوەرێكی عەدالەت خواز وەیستی ئەوەبووە ئەو دووبەرەكیە ئیتر كۆتایی پێ بهێنرێت و هەردوولا بۆ دروستكردنی عێراقێكی فیدڕاڵی تێبكۆشن، لەلایەكی تر چارەسەركردنی كێشە نێوخۆیەكانی سوننە لەسەر هەڵبژاردنی كەسێك بۆ شوێنگرتنەوەی حەلبوسی كەلەپشكی سوننەیە بۆ سەرۆكایەتی پەرلەمان، بارزانی سوننەكانی كۆكردەوە و كە پێویستە لە نێوخۆتاندا چارەسەرێك بدۆزرێتەوە لەڕێگای گفتوگۆ و ڕاوێشكردن بۆدیاریكردنی باشترین بژاردە بۆ پڕكردنەوەی ئەو پۆستە، ئەگەر بارزانی لە خەمی پڕۆسەی سیاسی عێراقدا نەبێت هەرگیز كۆبوونەوەی لەو شێوەیە ئەنجام نادات، دوای ئەو كۆبونەوەیە دڵنیام سوننەكانیش بەئاشتی كێشە ناوخۆیەكانی خۆیان چارەسەر دەكەن و كەسێك لەبەرژەوەندی دەوڵەت هەڵدەبژێرن.
تەوەری دووەم. دروستبوونی پەیوەندیێكی نوێ لە نێوان عێراق و هێزە هاوپەیمانەكان، بەتایبەتی دوای ئاڵۆزبوونی پەیوەندیەكانی ئەمریكا و عێراق، بارزانی هیوای خواست كە جارێكیتر هەردوولا دانوستان ئەنجام بدەن لەسەر دروستبوونەوەی پەیوەندیێكی گشگیر و نوێ لە نێوان هەردوولا كەلەبەرژەوەندی هەردوولادابێت.
تەوەری سێهەم. چارەسەركردنی ئەو كێشانەی كە لە نیوان حكوومەتی عێراق و حكوومەتی هەرێمدا هەیە كە پێویستە بەڕوحیەتێكی دەستووریانە ئەو كێشانە چارەسەربكرێن و مافی مووچەخۆرانی هەرێم هاوشێوەی مووچەخۆرانی عێراق بدرێت و دوانەخرێت، سەردانەكەی سەرۆك بارزانی دەرئەنجامێكی باشی دەبێت و كە لە چەند ڕۆژی داهاتوو گرنگی ئەو سەردانە بۆ هاونشتیمانیان دەردەكەوێت و دۆخێكی نوێ دروست دەبێت.
