زاری كرمانجی-سۆران:
کۆمیسیۆنی باڵای سەربەخۆی هەڵبژاردنەکانی عێراق، ژمارەی دەنگدەرانی هەرێمی کوردستانی بڵاو کردەوە لەگەڵ ژمارەی ئەو کەسانەی تاوەکوو سێی ئەم مانگە کارتی بایۆمەترییان دەرهێناوە.
جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، لە پارێزگای هەولێر یەک ملیۆن و 366 هەزار و 462 دەنگدەری گشتیی هەن، کە لەو ژمارەیە یەک ملیۆن و 16 هەزار و 357 دەنگدەر کارتی بایۆمەترییان دەرهێناوە.
سەبارەت بە پارێزگاکانی سلێمانی و هەڵەبجە کە تاوەکوو ئێستا تۆماری دەنگدەرانیان جیا نەکراوە، غەلای ئاماژەی داوە، یەک ملیۆن و 496 هەزار دەنگدەری گشتیی هەن لەو ژمارەیەش یەک ملیۆن و 146 هەزاریان کارتی بایۆمەترییان دەرهێناوە.
هەرچی پەیوەستە بە پارێزگای دهۆکەوە، گوتەبێژی کۆمیسیۆن ئاماژەیداوە، 926 هەزار دەنگدەری گشتیی هەن تاوەکوو 3ی تەممووزی 2024، 738 هەزار دەنگدەر کارتی بایۆمەتریان دەرهێناوە.
بەگوێرەی تۆمارەکانی کۆمیسیۆنی باڵای سەربەخۆی هەڵبژاردنەکانی عێراق، کۆی گشتیی دەنگدەران لە هەڵبژاردنی خولی شەشەمی پەرلەمانی کوردستان سێ ملیۆن و 789 هەزار دەنگدەرە و تاوەکوو ئێستاش دوو ملیۆن و 901 هەزاریان کارتی بایۆمەترییان دەرهێناوە.
سەرۆکی هەرێمی کوردستان لە 26ی مانگی ڕابردوو، ڕۆژی 20ـی تشرینی یەکەمی 2024ی بۆ بەڕێوەچوونی هەڵبژاردنی خولی شەشەمی پەرلەمانی کوردستان دیاری کرد، لەلایەن خۆیەوە کۆمیسیۆنی هەڵبژاردنەکانی عێراق ئامادەیی خۆی ڕاگەیاند، کە لە وادەی دیاریکراودا پرۆسەکە بەڕێوە دەبەن، هاوکات حکوومەتی هەرێمی کوردستانیش هەموو ئامادەییەکی خۆیی دەربڕیوە بۆ بەڕێوەچوونی هەڵبژاردنێکی سەرکەوتوو.
