زاری كرمانجی-سۆران
ئەندامێكی ئەنجوومەنی نوێنەرانی عێڕاق دەڵێت: دوای ئەم سەردانەكەی سەرۆك بارزانی هاوكێشە سیاسییەكان بەرەو باشتر دەگۆڕێن، بەستەڵەكی كێشەكانی نێوان هەرێم و بەغدا دەتوێتەوە، قۆناغێكی نوێ لە عێراق دەستپێدەكات.
جوان عەبدولڵا، ئەندامی ئەنجوومەنی نوێنەرانی عێڕاق، لە فڕاكسیۆنی پارتی دیموكراتی كوردستان بە زاری كرمانجی ڕاگەیاند: ” سەردانەكەی سەرۆك بارزانی بۆ بەغدا لە كاتێدایە كە كۆمەڵێ ناكۆكی و كێشە لە عێراق بێ چارەسەر ماونەتەوە، هەروەك دیارە لەسەر ئاستی هەرێم و عێراق كۆمەڵێ بابەت هەن پێویستیان بە گفتوگۆ و ڕێككەوتنی نوێییە، هەروەك دەمێكە لە رووی سیاسی عێراق ناسەقامگیرە، پەیوەندییەكانی سەركردە سیاسییەكانی ئەم وڵاتە درزی تیاكەوتووە بەشێوەیەك ئەگەر چارەسەرنەكرێ دەرەنجامی خراپی دەبێ بەسەر كۆی پرۆسەی سیاسییەوە لە عێراق”.
ئەو ئەندامەی ئەنجوومنی نوێنەران گووتیشی: ” لەگەڵ ئەوەشدا لەسەر ئاستی هەرێم تا ئێستا كۆمەلێ پرس و تەوەر هەن كە سەڕەرای ئەوەی ڕێككەوتنیان لەسەر كراوە، بەڵام بە هەڵپەسێردراوی ماونەتەوە و وەك خۆی جێبەجێنەكراون”.
ئاماژەی بەوەشدا: ” سەردانی سەرۆك بارزانی بۆ بەغدا دانووستان و گفتوگۆكردنە لەسەر كۆمەلێ بابەتی پەیوەست بەم پرسانە. بۆیە ئەمڕۆ هەموو لایەنە سیاسییەكان سەردانی بارزانی بۆ بەغدا بە هەنگاوێكی گرنگ و چارەسەرخواز دادەنێن لەسەر هەردوو ئاستی كوردستان و عێراق. كلیلی چارەسەرەكان وەك هەمیشە لای سەرۆك بارزانییە، دڵنیاشبن كە دوای ئەم سەردانە هاوكێشە سیاسییەكان بەرەو باشتر دەگۆڕێن، بەستەڵەكی كێشەكانی نێوان هەرێم و بەغدا دەتوێتەوە، قۆناغێكی نوێ لە عێراق دەستپێدەكات.
