زاری كرمانجی-سۆران:
سكرتێری یەكێتی ئافرەتانی كوردستان گوتی، كۆبوونەوەمان لەگەڵ مەسروور بارزانی زۆر گرنگ بوو، چونكە ئەم كۆبوونەوەیە دەبێتە پاڵپشتیەكی گەورە بۆ یەكێتی ئافرەتان و ئامادەیی و پاڵپشتی خۆشی نیشاندا بە ھەموو شێوەیەك بۆ یەكێتی ئافرەتانی كوردستان، ئەمەش نیشانەی بەھەند وەرگرتن و خەمخۆری جەنابیانە بۆ پرسی ئافرەتان.
زیبا تەها، سكرتێری یەكێتی ئافرەتانی كوردستان، بۆ ماڵپەڕی فەرمیی پارتی دیموكراتی كوردستان گوتی: بەھا و گرنگی دیدارەكەمان لەگەڵ مەسروور بارزانی جێگری سەرۆكی پارتی دیموكراتی كوردستان لەوەدایە، كە بەڕێزیان وەك جێگری سەرۆك بارزانی، ھاوكات وەك سەرۆكی حكوومەتی ھەرێمی كوردستان، كە لوتكەی دەسەڵاتی جێبەجێكردنە، وێڕای ھەموو ئەركە سەختەكانی و بەرنامەی كاری فراوانی، دەرفەتی بۆ ئێمە وەك دەستەی نوێی یەكێتی ئافرەتان ڕەخساند تا لە نزیكەوە ھەم دەنگی ئافرەتانی كوردستان بگەیەنین و ھەم پشتیوانی بەڕێزیان بۆ ڕێكخراوەكەمان بەھێزتر بكەین، ئەمەش نیشانەی بەھەند وەرگرتن و خەمخۆری جەنابیانە بۆ پرسی ئافرەتان.
زیبا تەها باس لەوەش دەكات: لەم دیدارەدا سەرۆكوەزیران ستایشی ڕۆڵی یەكێتی ئافرەتانی كوردستانی كرد، كە وەكو ڕێكخراوێكی دێرین بەشداری ڕاستەوخۆی بزاڤی ڕزگاریخوازی گەلەكەمانی كردووە و بڕوا و متمانەی تەواوی خۆی بەتوانا و لێھاتوویی ئافرەت دەربڕی و پشتیوانی بۆ ڕۆڵی ئافرەت دووپات كردەوە، ھاوكات ھەموو پشتیوانییەكی بۆ یەكێتی ئافرەتان دەربڕی.
سكرتێری یەكێتی ئافرەتانی كوردستان ڕوونیشیكردەوە: بەڕێزیان ڕایسپاردین، كە بە تەواوی تواناكانی خۆمان لە خزمەت ئافرەتانی كوردستاندا بین و سەرجەم ئافرەتانی كوردستان بەسەر بكەینەوە و پشتیوان و ھاوكاریان بین بەشێوەیەكی سەردەمیانە و بە میكانیزمە ھاوچەرخەكان پەرە بە كاری ڕێكخراوەیی بدەین و پرسی ئافرەت بەرەو پێش ببەین، پشتیوانی بەرنامەكانی حكوومەت بین و ڕۆڵمان ھەبێت لە پەرەپێدانی ھۆشیاری دایكان و ڕاھێنانی نەوەكان بە بنەماكانی مرۆڤدۆستی و نیشتمانپەروەری و ژینگەپارێزی.
لە كۆتاییدا گوتیشی: وێڕای دووبارە سوپاسگوزاری ئێمە ئەم دیدارەی سەرۆكوەزیران، وەك ھاندان بۆ ئێمە و پشتیوانییەكی بەھێز بۆ ڕێكخراوەكەمان و پرسی ئافرەت دەبینین و بەڵێنیش دەدەین، كە لە ئاست متمانە و چاوەڕوانی بەڕێزیان دابین.
