“دوو ساڵە كارگەیەك دراوەتە سۆران تەنها گواستنەوەی ماوە”
محەممەد مەحموود- سۆران:
تا ئێستا لە سنووری ئیدارەی سەربەخۆی سۆران كارگەی قیڕی حكومی نییە، بەڕێوەبەرایەتی چاككردنەوە و پاراستنی رێگاوبان بۆ پڕۆژەكان قیڕ لە كارگە ئەهلییەكان دەكڕێت، بەپێی بە دواداچوونەكانی زاری كرمانجی كارگەیەكی قیڕی حكومی دراوەتە بەڕێوەبەرایەتی چاككردنەوە و پاراستنی رێگاوبانی سۆران، نەبوونی پارە وایكردووە تاكو ئێستا ئەو كارگەیە نەگوازرێتەوە بۆ سۆران لەگەڵ ئەوەی شوێنیشی بۆ دابینكراوە.
خوسرەت سادق، بەڕێوەبەری چاككردنەوە و پاراستنی رێگاوبانی سۆران، بە زاری كرمانجی راگەیاند” بە بەردەوامی هەوڵمانداوە ئەو كارگە قیڕەی دراوەتە سۆران بیگوازینەوە بۆ ئێرە، رەزامەندی سەرپەرشتیاری ئیدارەی سۆرانیش وەرگیراوە، تیمێكی ئەندازیاریش لە ئەندازیارانی ئیدارە و بەڕێوەبەراتی ئێمە بۆ ئەو كارە دیاریكراون و كەسێك بە نیازبوو ئەو كارگە قیڕە بگوازێتەوە بۆ سۆران، بەڵام نەبوونی پارە وایكردووە تاكو ئێستا ئەو كارگەیە نەگوازرێتەوە.
بەڕێوەبەری چاككردنەوە و پاراستنی رێگاوبانی سۆران، ئاماژەی بەوەشكرد” زۆر گرنگە ئیدارەی سۆران ببێتە خاوەنی كارگەیەكی قیڕی حكومی، هەر چەندە ئەو كارگەیە هی ئێستانییە و كۆنە، بەڵام زۆر باشترە لەوەی سۆران بێ كارگەی قیڕی حكوومی بێت، تاكو نەشگوازرێتەوە نازانین لە كاتژمێرێك چەند قیر بەرهەم دێنێت”.
زاری كرمانجی ئەو زانیاریانەی دەستكەوتووە، دوای ئەوەی بەڕێوەبەرایەتی چاككردنەوە و پاراستنی رێگاوبانی سۆران كرایە بەڕێوەبەرایەتی رەزامەندی دراوە بەوەی كارگەی قیڕی بەستۆرە بخرێتە سەر بەڕێوەبەرایەتی چاككردنەوە و پاراستی رێگاوبانی سۆران، ئەوەی مابێتەوە تەنها گواستنەوەیەتی بۆ سۆران، میلاكی پێویستشی هەیە لە ئەندازیار و كرێكار و كارمەند و پاسەوان”.
زاری كرمانجی ئەوەشی زانیووە، سەرپەرشتیاری ئیدارەی سۆران هەوڵی جددی داوە بۆ گواستنەوەی ئەو كارگەیە، پارەی گواستنەوەشی زیاتر لە ٢٠٠ ملیۆن دینارە، بۆ كەسێكیش دەرچووە كارگەكە لە بەستۆڕەوە بگوازێتەوە بۆ سۆران، بەڵام نەبوونی پارەی پێویست وایكردووە ئەو كەسە كارگەكە نەگوازێتەوە”.
بەهێنانی ئەو كارگە قیڕە حكومییە بۆ ئیدارەی سۆران توانای بەرهەمهێنانی قیڕ زۆر زیاتر دەبێت و كوالێتیشی بەرزتر دەبێتەوە، لەگەڵ ئەوەی ئیدارەی سۆران بۆ پڕۆژەكانی رێگاوبان پێویستی بە قیڕی زیاترە.
