ڕۆژنامەی نیویۆرك تایمز : پێویستە بایدن لە كێبڕكێی هەڵبژاردنی سەرۆكایەتی بكشێتەوە
مەهدی محەممەد – زاری كرمانجی :
لە ڕاپرسییەك لەسەر دیبەیتی هەفتەی ڕابردووی نێوان هەر دوو بەربژێری دیموكراتەكان و كۆمارییەكان بۆ پۆستی سەرۆكایەتی ئەمەریكا، ترەمپ چانسی بوونەوەی بە سەرۆكی ئەمەریكا زیاترە.
كەناڵی CNN لە دیبەیتێكدا هەر دوو كاندیدی سەرەكی (جۆ بایدن لە دیموكراتەكان و دۆناڵد ترەمپ لە كۆمارییەكان) بۆ هەڵبژاردنی سەرۆكایەتیی ئەمریكای كۆ كردەوە، كەوا بڕیارە لە تشرینی دووەمی ئەمساڵدا ئەنجام بدرێت.
لە سەرەتای دیبەیتەكەدا هەردوو كاندیدەكە چەندین دەستەواژەی وەك (شێت، گەمژە، درۆزن) یان لەبەرامبەر یەكتر بەكارهێنا، كە ئەمە بووە جێگەی سەرنج و تێڕامانی بەشێك لە بینەرانی دیبەیتەكە.
لە ماوەی 90 خولەكی دیبەیتەكە، چەندین پرسی گرنگی وەك كۆچی نایاسایی، دۆسیەی ڕەشپیستەكان، شەڕی تیرۆر، منداڵ لەباربردن و چەندین دۆسیەی دیكە لە نێوان هەردوو بەربژێر گفتوگۆیان لەبارەوە كرا.
میدیاكانی ئەمەریكا دیبەیتەكە بە شكستی بایدن بەرامبەر بە ترەمپ دەبینن و پێیان وایە بایدن سەركەوتوو نەبوو لە وەڵامدانەوەی تۆمەتەكانی ترەمپ، كە هەندێكیان دوور لە ڕاستی بوون.
ڕۆژنامەی نیویۆرك تایمز كە یەكێك لە بەناوبانگترین ڕۆژنامەكانی ئەمەریكایە، لە مانشێتی سەرەكیدا داوا لە بایدن دەكات كە بەزوویی لە كێبڕكێی هەڵبژاردنی سەرۆكایەتی بكشێتەوە و ڕایگەیاند “دیبەیتەكەی ڕۆژی پێنجشەممەی ڕابردووی نێوان بایدن و ترەمپ، سەلماندی كە بایدنی تەمەن 81 ساڵان، لەو تاقیكردنەوەیە شكستیهێنا.”
دیموكراتەكانیش نیگەرانن لە ئەنجامی دیبەیتەكە و پێیان وایە هەر لە سەرەتایی دیبەیتەكە ترس و نیگەرانی زاڵ بووە بەسەر بەربژێرەكەیان و نەیتوانیوە وەك پێویست وەڵامی بەرامبەرەكەی بداتەوە.
كۆمپانیای مۆرنینگ كۆنساڵت، دوای دیبەیتەكە ڕاپرسییەكی لە نێوان دوو هەزار و 68 كەس ئەنجامداوە، لە ڕاپرسییەكە 60%ی بەشداربووان داوا دەكەن كە دیموكراتەكان جۆ بایدن بە كاندیدێكی دیكە بگۆڕن و 57 % ترەمپ بە سەركەوتوویی دیبەیتەكە دەزانن.
هاوكات كەناڵی CNN كە دیبەیتەكەی ڕێك خستبوو، ئەویش ڕاپرسییەكی لەسەر وێبسایتەكەی دانا بۆ وەرگرتنی بۆچوونی ئەو كەسانەی بینەری دیبەیتەكە بوون، لە ڕاپرسییەكەدا 67 % دەنگیان داوە بە ترەمپ و 33 % دەنگیان داوە بە بایدن.
دیموكراتەكان هەمیشە وشەی (شێت) بۆ دۆناڵد ترەمپ بەكاردێنن و لەبەرامبەریشدا كۆمارییەكان بایدن بە سەرۆكێكی نەخۆش ناو دەهێنن.
جۆ بایدن لە كۆنگرەیەكی ڕۆژنامەوانی ڕاگەیاند “لە دیبەیتەكەی پێنجشەممە بەرامبەر پیاوێكی شێت وەستا بووم، نیازم هەیە لە هەڵبژاردنەكانی مانگی (تشرینی دووەم) براوە بم، تاكە تاوانبار كە لە دیبەیتەكە بوونی هەبوو بێت دۆناڵد ترەمپە.”
