زاری كرمانجی-سۆران:
پارێزگاری هەڵەبجە دەڵێت، سەرۆکوەزیرانی هەرێمی کوردستان بۆ دانانی بەردی بناخەی پڕۆژەی سایلۆی هەڵەبجە، سەردانی پارێزگاکە دەکات.
ئازاد تۆفیق، پارێزگاری هەڵەبجە لە کۆنفرانسێکی رۆژنامەڤانیدا رایگەیاند، رۆژی یەکشەممە شاندێکی باڵا بە سەرپەرشتیی مەسرور بارزانی، سەرۆکوەزیرانی هەرێمی کوردستان سەردانی پارێزگاکە دەکات.
ئازاد تۆفیق گوتیشی، “سەردانەکەی سەرۆکوەزیران بە مەبەستی دانانی بەردی بناخەی پڕۆژەی سایلۆی هەڵەبجە دەبێت، کە تێچووەکەی نزیکەی 25 ملیار دینارە، کاری زۆر باشی تێدا کراوە و بەردەوامیش دەبێت.”
پارێزگاری هەڵەبجە ئەوەشی خستەڕوو، سەرۆکی حکومەت لە کاژێر 10:00وە لە هەڵەبجە ئامادە دەبێت تاوەکو کاژێر 14:00، دواتر کۆتایی بە سەردانەکەی دەهێنێت و دەگەڕێتەوە هەولێر.
پێشتریش لە 22-02-2024 مەسرور بارزانی سەردانی پارێزگای هەڵەبجەی کردبوو، جگە لە دانانی بەردی بناخەی پردی تووەقوت، پێدانی تابلۆی ئۆتۆمبێلی ژمارە هەڵەبجەیشی راگەیاند.
