عەقڵی كۆن، بۆگەنی نێو حزبەكان نیشتمان بەرەو كاولكاری دەبات، وەك ئەوەی ئێستا لە سلێمانی دەگوزەرێت.

ئیسماعیل ئیبراهیم

سەعدی ئەحمەد پیرە: داستانی پردێ راكردن بوو بۆ شانازی پێوە بكەم.

ئەم مانشێتەی سەرەوە قسەی گووتەبێژی یەكێتی نیشتمانی كوردستان بوو، لە كۆنگرەیەكی رۆژنامەوانی، كە ئامادە نیە شانازی بە داستانی كۆڕێ بكات.
هەر چەندە چاوەڕێ ئەوە لە پیرە و هاوئاوازەكانی ناكرێت شانازی بە داستانە مەزنەكانی وەك سەحێلا، پردێ، خواكوڕك، هەندرێن بكەن، لەبەر ئەوەی بە هۆی پیلانی پێشوەختەی ئەوان و بە دەست تێكەڵ كردنیان لەگەڵ دووژمنانی نەتەوەی كورد و كوردستانیان كەركووك و باقی ناوچەكانی دیكە لە دەست هێزەكانی پێشمەرگە دەرهێندرا، ئەگەر بەرخودانی قارەمانانی هێزەكانی پێشمەرگەی كوردستان نەبایە ئێستا شتێك بە ناوی كیانی سیاسی هەرێمی كوردستان نەمابوو، چونكە پیلانی عێراقی شۆفینیزمی عەرەبی بە هاوكاری ئێران و توركیای داگیركەر نەهێشتنی بزووتنەوەی رزگاری خوازی نەتەوەی كورد بوو لە هەر چوار پارچەی كوردستان، بەڵام بەهیمەتی خۆ نەچەماندنی پێشمەرگە پیلانەكانیان سەری نەگرت.

كاتێ سەعدی، شانازی بە بەرخۆدانی هێزی پێشمەرگە نەكات، واتە شانازی بە دەست خستنە نێو دەستی داگیركەرانی كوردستان دەكەن. ئەم هەڵوێستەشیان لە دوای گیان لە دەستدانی جەلال تاڵەبانی سكرتێری یەكێتی زەقتر بوویەوە.
دوای گیان لەدەستدانی تاڵەبانی باوك، ناردنی شاند لە دوای شاند بۆ بڕینی بودجە و قوتی هاووڵاتییانی هەرێم گەشەی كرد. رێكەوتنی ژێر بە ژێر بۆ لاواز كردنی پێگەی هەرێمی كوردستان گەیشتە لووتكە، خەیانەتی 16 ئۆكتۆبەر، كە ئەنجامەكەی ئەو غەدرە زۆرەیە ئەمڕۆ لە گوندەكانی پەلكانە و دەورووبەری كەركووك و ناو شاری كەركووك لە نەتەوەی كورد دەكرێت، بەرهەمی خەیانەتە چەندبارە بوونەوەی سەعدی پیرە و یەكێتییە.
شانازی نەكردن بە گیان فیدایی پێشمەرگەی كوردستان بۆ بەرگری لە كەرامەت و شكۆی نیشتمان، واتە شانازی كردن بەو سیاسەتە دووژمنكارانەی حكومەتی ناوەندی بەغدا لە دژی نەتەوەی كورد.
ئێمە شانازی بە هەموو ئەو داستانانە دەكەین كە هێزەكانی پێشمەرگە بۆ بەرگری تۆماریان كرد.
شانازی دەكەین كە لە پەنای خەیانەتەكانی ئێوە، سەرۆك و سەركردەی واهەن مردن هەڵدەبژێرن، بەڵام قبوڵ ناكەن شكۆی نەتەوەیان بشكێت.
سەعدییەكان لە مێژووی هەموو گەلان جگە لە زبڵدانی روو رەشەكان شوێنی دیكەیان نییە، بەڵام خیانەتكاران هەرگیز باكیان بە مێژوو نییە، چونكە كاتێ كەس و گرووپێك باكیان بە فرۆشتنی نیشتمان، خیانەتكردن، چوونە ریزی داگیركەران نەبێت، بێ گومان باكیان بەوەش نییە كە مێژوو چییان پێ دەڵێت.
هەمیشە عەقڵی كۆن، بۆگەن و بەتاڵانەی نێو حزبەكان نیشتمان بەرەو كاولكاری دەبات، وەك ئەوەی ئێستا لە سلێمانی دەگوزەرێت.
خاوەن ستراتیژی راستەقینەی نەتەوە سازی و دەوڵەتداریش هەمیشە وڵات بەرەو لووتكە دەبات و سەردەكەوێت، هەولێر ، دهۆك، سۆران، زاخۆ و ئاكرێ بە نموونە.