“تیرۆر بكرێت یا تیرۆر بكات سەرچاوەكەی هەر دەگەڕێتەوە لای خۆتان”
نەجات هەمزە
دوای ئەوەی ئەنجوومەنی ئاسایشی هەرێمی كوردستان دان پێدانی ژمارەیەك ئەفسەر و كارمەندی دژە تیرۆریان بڵاو كردەوە كە بە قسەی خۆیان دەستیان هەبووە لە كوژرانی عەقید هاوكار جاف، و بە گرتەیەكی وردی تێر و تەسەڵ رۆژی پیلان دانان تا ئەو كاتەی بۆمب بە ئۆتۆمبێلی هاوكار جاف دەڵكێنن و دەتەقیتەوە شیكرایەوە، دەزگای دژە تیرۆر- سلێمانی راگەیەندراوێكی بڵاو كردەوە و دان پێدانەكانی سەر لە بەری گرتەكەشی رەتكردەوە، هەروەها لە راگەیاندراوەكەش چەندین بابەتی باس كردووە، كە هەر چاوەرێی ئەوەیان لێ دەكرا، لەبەر ئەوەی هەرگیز ئەو دامەزراوەیە دان بەوە نانێت كە دەستی هەبووبێت لە كوشتن و تیرۆر كردنی هاووڵاتییان یا ئەو كەسانەی دەبنە ئامانجی كەسانی ناو ئەو دامەزراوەیە، لێرەوە بە چەند خاڵێك تیشك دەخەمە سەر راگەیەندراوەكەی ئەو دامەزراوەیە.
یەكەم – لەسەرەتای راگەیەندراوەكە نووسراوە ” دەزگای دژە تیرۆر بە تووندی چەواشەكارییەكانی دەزگای پاراستنی سەربە پارتی رەتدەكاتەوە” بە دڵنیاییەوە رەتی دەكەنەوە، لەبەر ئەوەی لە ئەگەر رەت نەكردنەوەی بەرپرسیارییەتی قوورسی یاسایی و سیاسی و كۆمەڵایەتی دەكەوێتە سەر و رووبەڕووی لێپێچنەوەی یاسایی و جەماوەری دەبنەوە، بۆیە ئەم رستانە تەنها بۆ بە لارێدابردنی شەقام و شاردنەوەی راستی رووداوەكانە لە لایەنگیرانی حزبەكەیانە.
دووهەم- لە بەرگەی خوارتر نووسراوە ” دەزگای دژە تیرۆر هێزێكی نیشتمانی، رێكخرا، فەرمی، حكومی تایبەت و مەشقپێكراوە” خۆی كێشە سەرەكییەكە ئەوەیە كە ئەم دامەزراوەیە كەسی نییە و دامەزراوەیەكی فەرمی و یاساییە و بۆ خزمەتی هاووڵاتییان و پاراستنی ئاسایشی كوردستان دامەزراوە، بەڵام كەوتۆتە دەست چەند كەسێكەوە كە بۆ مەرامی تایبەتی و بەرژەوەندی كەسی بەكار دەهێندرێت، لە جیاتی پاراستنی هاووڵاتییان خەڵك تیرۆر دەكەن و تەقەینەوە لە پایتەخت دەكەن، سنووری پارێزگای سلێمانیتان بۆ هاووڵاتییان كردووە بە زۆنی ترس و تۆقاندن و كوشتن، بۆیە ئەم رستەشتان وەك بڵقی سەرئاوە و دڵی كەسی پێ ئاوناخواتەوەو تۆمەتەكان زیاتر دەكات.
سێیەم- نووسراوە هێزەكەمان ” لەلایەن هێزەكانی هاوپەیمانی نێودەوڵەتیشەوە متمانە پێكراوە” من پێموایە باشتر وابوو بنووسرێت متمانە پێكراو بوون، واتە ئەوە لە رابردوو بووە، بەو كردەوانەی لە ماوەكانی رابردوو لە ژێر ناوی ئەم دامەزراوەیە ئەنجام دراون، ئێتر ئەو متمانەیە دەكەوێتە ژێر پرسیار، دڵنیاشم كاردانەوەی ناوخۆیی و دەرەكیشی بەدوادا دێت.
چوارەم- بۆ خۆڵ كردنە چاوی هاووڵاتییان و شاردنەوە و بە لاڕێدا بردنی راستی رووداوەكان و بۆ ئەوەی تەركیزی هاووڵاتییان لەسەر رووداوەكە لابرن، بابەتی هەڵبژاردنی سەرۆككۆمار و، حزبی فاشیل و نۆكەری بێگانە، سیناریۆی داتاشراو، پەردەپۆشكردنی پەلەی رەش و كۆمەڵێكی بابەتی دیكەیان تێكەڵ كردووە، رەنگە پێشیان وابێت شەقام بڕوایان پێدەكەن، ئیتر ئەمە تاسەر موخ گیڵییە یا خەڵك بە گێڵ زانینە.
ئەوان دەیانەوێت ئەو كارە تیرۆرستییە بخەنە ئەستۆی كەسانێك كە لە زۆنی زەرد نیشتەجێن، بەمەش جۆرێك لە شان بەتاڵكردن لە ژێر ئەو تۆمەتانەیە و هیچی لێ سەوز نابێت، چونكە ئەوانەشی لەزۆنی زەرد نیشتەجێن و كارمەند و ئەفسەری دژە تیرۆری سلێمانین، هەر راهێندراو و پەروەردەی خۆتانە، تیرۆر بكرێت یا تیرۆر بكات سەرچاوەكەی هەر دەگەڕێتەوە لای خۆتان.
لەبارەی شێوازی دەستگیر كردنی ئەو گرووپەش نووسراوە بە شێوەی “چەتەگەری” ئەنجام دراوە، لە كاتێكدا فەرمانی دەستگیر كردنیان هەبووە، هەروەها ئەو گرووپە یەكەمجار دەستیان بە تەقەكردن كردووە لەو هێزانەی بۆ چەسپاندنی یاسا چوونە دەستگیریان بكەن، بۆیە ئەم راگەیەندراوە ئەوەندە بە پەلە و ناشارەزایی نووسراوە تۆمەتەكان بۆ ئەو دامەزراوەیە سەد هێندە زیاتر دەكات و بێ دەنگ بوونیان باشتر بوو لەو راگەیاندنە بێسەرووبەر و كرچ وكاڵە.
لە نێو راگەیەندراوەكە داوای ئەوە دەكەن ” تیمێكی پسپۆڕی بێ لایەن” پێك بهێندرێت و ناوی كۆمەڵێك دامەزراوەی رێز كردووە، تا راستییەكان بۆ خەڵكی كوردستان روونبكرێتەوە، ئەو داماوانە پێیانوایە ئەگەر دڵنیایی تەواو و بێ كەموكورتی لە بەڵگەكان نەبوایە، هەرگیز ئەو دامەزراوەیە ئەوەندە ساویلكە نییە خۆی بخاتە گێژاوێكەوە، كە دواجار بەرپرسیارییەتی قوورسی هەمەچەشنە و لێكەوتەی جیاجیا دێنێتە ئاراوە، بە تایبەتی لەم دۆخەی ئێستا لە ناوچەكە دەگوزەرێت.
درێژەی راگەیەندراوەكە جگە لە كۆمەڵێك دروشمی بێسەرووبەری حەماسی و پەلەقاژەی خۆ قوتاڕ كردن لە تۆمەتی تیرۆر كردنی هاووڵاتییان هیچی دیكە نییە.
وێنە و گووتە و گرتەی كەسەكان و ئەو راگەیەندراوە بەسە، بۆ ئەوەی بە بەڕێوەبەراتی گشتی دەزگای دژە تیرۆر- سلێمانی، بڵێین (شوكور هۆشیارە مەحوی)، بەو ئاراستەیەش كار كردن جگە لە شەرمەزاری خۆتان و حزبەكەتان
هیچی دیكەی لێ بەرهەم ناهێنن.
