رێبوار حەمەلاو شوانی
سەد ساڵی رابردوو بۆ نەتەوەیەكی وەك كورد ، پڕ بووە لە داستان و مێژووی پڕ لە شانازی و گیانبەخشین و خوین بەخشین ، لە پێناو سەربەستی و گەیشتن بە ئاسۆ، هەر ئەوەش بوو توانییان ئەم بەشەی كوردستان كە ئەمڕۆ خاوەن قەوارە و سەروەری خۆیەتی بگەێنرێتە كەناڕی ئارامیی و لووتكەی سەرفرازی ، بەشكێش لە نێوە ڕێگەی خەبات و قوربانیدانیان ، بەهەر هۆكارێك بێت نەگەیشتنە ئەو ئامانجەی كە هەزاران تێكۆشەری باوەر پۆڵایین خوێن وگیانیان لە بۆ نەخشاندنی خواستی رەوای گەلەكەیان تێیدا كردە دیاری ، گەلانی بن دەست شكۆمەندانەتر و سەرفرازانەتر ناژین ونەژیاون لەوانەی كە سەربەخۆییان كردە ڕوگەی بەردەوامی تێكۆشانیان تا مسۆگەریان كرد ، مێژووی خەبات وبەرخودانی ئێمەش هیچ كەمتر نییە لە گەل و نەتەوەكانی دیكە بەڵكو زیاتریشە ، ئەو گەلە مرۆڤ دۆستەی لە نێو بیری توندرۆیی و پاوانخوازی و داگیرخوازی رۆژهەڵاتی ناوین و لە نێو دابەشكاری زۆرە ملێی بە سەر چوار نەتەوە وجوگرافیا و كەلتوور وفەرهەنگ و زمانی جیاواز ، پێشكەوتنخوازە داوای مافەكانی دەكات ، كە بێویژدانانە بە هەموو جۆرە چەك و ئامزار و هەتا دادگە و گەمارۆدان هەوڵی دژایەتیكردن ودوژمندارێتی لەگەڵ دا دەدرێت.
پێدەچێت ئەو جۆرە تێگەیشتن وهەڵوەستانەی دوژمنانی كوردستان لە بارەی مافەكانی گەلی كورد ، بابەتێكی نوێ نییە ، لە ڕێرەوی خەبات ومێژووی بەرەنگاری باشووری كوردستان كە بەدرێژایی سەدەی رابردووی لەلایەن ڕژێمە یەك لەدوای یەكەكانی عێراقەوە لە هەموو قۆناغە جیاوازەكاندا بە هەموو جۆرە چەك و فشار و گەمارۆدانێك تاقیكراوەتەوە، لە هەموو سەردەمەكانیشدا لە ژێر هەر ناوونیشان و ئایدۆلۆژیایەك وناوێك بوو بێت لە نێو زیهنیەتیاندا مەرامیان نەهێشتنی كوردوكوردستان بووە ، بەڵام ئەوە كە نەیتوانیووە خەونەكانیان بێنەتەی بەهێزبوون یا لاوازبوونیان ، ئەزموونی رابردووش ئەو راستییەی سەلماندووە كە هەمیشە و هەركاتێك كە هەستیان بە بەهێزی كردبێت ئەوا دڕندەئاسا بە پاڵشتی داگیركەرانی تر هەوڵی گەلەكۆمەكی و پەڵاماردانی كوردستانیان داوە ، لەگەڵ ئەوەشدا بەردەوام كاریان كردووە بۆ دروستكردنی ناكۆكیی و دووبەرەكی لە نێوخۆی كوردستان ، ئەوەش بەدرێژایی مێژوو لە نێو زێهنیەتی دەسەڵاتدارانی عێراقی و بەتایبەت بیری شۆڤێنییەكان رەنگی داوەتەوە و تێگەیشتنیان بەرامبەر بە گەلی كورد ودۆزە رەواكەی بەم شێوەیە بووە .
بۆیە، هەموو ئەو بریار و هێرش و گەمارۆدان و ئازاردانەی دوژمنان وناحەزانی گەلەكەمان هەرگیز جێگەی سەرسورمان نییە و هەمیشەش چاوەروانكراوە ، بەڵام ئەوەی مایەی هەڵوەستە كردنە ، ئەوەیە كە كەس ولایەنێكی خۆفرۆش كە خۆیان بە هاوزمان وهاو نەتەوە دەنزانن لە ماوەی دەیەكانی رابردوو و بە ئێستاشەوە ، پێش لەشكری دوژمنان و ناحەزان دەكەون و دەبنە چاوساغ و جێبەجێكاری پیلان و مەرامە گڵاوەكانیان ، لێرە دا پرسیارێك دێتە ئاراوە ، ئایا كورسی و هەڵبژاردن و بەرژوەندی تەسكی حزبی شایانی ئەویە كە خاك و خوێن و بیروباورەت هەرزانفروش بكەی بۆ دوژمنان یاینش بن دەستكردن و ملشۆركردنی خۆت ؟ بەڵام مێژوو رەحم بەكەس ناكات و خیانەت لە خەبات و خوێنی شەهیدان باجی قورسی خۆی هەیە . فرۆشتنی نیوەی خاكی كوردستان و ئینجار رێگە خۆشكردن بە بۆ بەعەرەبكردنێكی ترو گۆڕینی دیموگرافیای كەركووك وناوچەكە كوردستانییەكانی تر و هەوڵی دەركردنی جوتیاران لە سەر ماڵ وموڵكیان مێژووییەكی قێزەوەنە و باجی قورسی دەبێت.
بەدڵنییاییەوە ، لە مێژوودا ، تایبەت مەندی هەر تاكێكی كورد و سەركردەی خۆڕاگر ئەوە بووە چۆكی بەرامبەر هیچ دوژمن ونەیار و داگیركەرێك دانەناوە و هەرگیز بۆ ئافرینێك و پۆست و پڕە پارەیەك نەبووەتە ڕێنیشاندەری ناحەزانی كوردستان و هەرگیز كاری نەكردووە بۆ تێكدانی ژێرخامی وڵاتەكەی و هەرژی پیرۆزی و دەستكەوتەكانی نیشتیمانپەوەران لە پێناو دڵخۆش كردنی دوژمنەكەی ، لە كۆتایی ئەوەی هەر سەركەوتوو بووە ڕۆحی كوردایەتی و ئیرادەی خۆڕاگری كوردوكوردستان بووە و شكست و ریسوایی دوژمنان و بەكرێگیراوەكانیان بووە .
