زاری كرمانجی :
ناوەندی هاوكاریی حیزبەكانی كوردستانی ئێران لە راگەیێندراوێكدا هۆشداری دەدات لە هێرشی زەمینی كۆماری ئیسلامی ئێران بۆ سەر خاكی هەرێمی كوردستان، لە راگەیاندراوەكەدا هاتووە :” كۆماری ئیسلامی ئێران هێزێكی زۆری سەربازیی بۆ سەر سنوورەكانی كوردستان هێناوەو هەڕەشەی بەزاندنی سەروەریی حكومەتی هەرێمی كوردستان و لەشكركێشی بۆ سەر حیزبەكان دەكات.”
رۆژی چوارشەممە 12-10-2022 ناوەندی هاوكاریی حیزبەكانی كوردستانی ئێران راگەیاندراوێكی بڵاوكردەوە و ئاماژە بۆ لەشكركێشی ئێران دەكات بۆ سەر خاكی هەرێمی كوردستان:” ئێمە وەك ناوەندی هاوكاریی حیزبەكانی كوردستانی ئێران سەرەڕای مەحكومكردنی هەرچەشنە دەستدرێژییەكی كۆماری ئیسلامی بۆ سەر خاكی هەرێمی كوردستان، رایدەگەیێنین كە ئەمە پێشێلكردنی سەروەریی خاكی عێراق و هەرێمی كوردستانە و بەپێی بنەما نێودەوڵەتییەكان مەحكومە و دەبێت ریسوا و لەقاو بدرێت.”
لە راگەیێندراوەكەدا هاتووە، “سەرەڕای سەركوت و كوشتاری رۆژانەی خەڵكی ناڕازی لەسەر شەقامەكان، كۆماری ئیسلامی بە مووشەك و درۆن هێرشی كردە سەر بنكە و بارەگاكانی حیزبەكان و ئێستا بە ھێنانی هێزێكی زۆری سەربازیی بۆ سەر سنوورەكانی كوردستان، هەڕەشەی بەزاندنی سەروەریی حكومەتی هەرێمی كوردستان و لەشكركێشی بۆ سەر حیزبەكان دەكات.”
ماوەیەك بەر لە ئێستا سوپای پاسدارانی ئێران راگەیاند كە یەكەكانی زرێپۆش و هێزی تایبەتیان ئامادەیە و لە ئەگەری دەرنەكردنی هێزە دژبەرەكانی كۆماری ئیسلامی لە هەرێمی كوردستان، خۆیان راستەوخۆ دەست بە هێرش دەكەن.
