زاری كرمانجی- مێرگەسۆر:
بەڕێوەبەری تەندروستی بارزان، دەڵێت: 29 بنكەی تەندروستی دەكەونە سنووری بەڕێوەبەراتیەكەمان، لە بلێ بنكەیەكی تەندروستی هەیە، بەڵام بینایەكەی زۆر كۆنە و لە پلانماندایە بنكەیەكی نوێ لەو ناوچەیە دروست بكەین.
عادل عەبدوڵلا محیەدین، بەڕێوەبەری تەندروستی بارزان، بە زاری كرمانجی راگەیاند، بەڕێوەبەرایەتیەكەمان لە 29 بنكەی تەندروستی پێك دێت، 8 لەوانە پزیشكی پسپۆڕیان هەیە و 21 بنكەی دیكەش تەنها پەرستاریان هەن واتە پزیشكیان نییە، لە هەندێك شوێن بنكەی تەندروستی زیاد هەن، ئەمەش بە حوكمی ئەوەی لە یەكتر نزیكن، بۆیە ئەگەر ئەوانەی كە لە یەك نزیكن بكەینە یەك بنكە ئەوا زیاتر دەتوانین خزمەت بكەین.
بەڕێوەبەری تەندروستی بارزان، گوتیشی: هەندێك بنكەی تەندروستی دیكەشمان هەنە كە بیناكانیان زۆر كۆنن و تا ئێستا نۆژەن نەكراونەتەوە، لەوانەش بنكەی تەندروستی بلێ، بیناكە كۆنە و قەرەباڵغیەكی زۆری لەسەرە، چونكە هەموو بەشێكی تێدایە، بۆ ئەمەش بڕیار دراوە تێكبدەن و سەر لە نوێ بینایەكی دیكە دروست بكەن.
