جبار عبداللە مهاجر
ئەوەی ڕژێمی سەدام و دارو دەستەكەی دەیانكرد دەرهەق بەگەلی كورد و پێكهاتەكانی نێو وڵاتی عێراق خەریكە دووبارە دەبێتەوە، ئەوەی جیاوازە لەنێوان دیموكراسیەتی ئیستای عیراق و دیكتاتۆریەتی پێشوو ئەوەیە كەشیعەو سونەبوون، ئەگەرنا بەرپرسانی ئیستای عێراق خەریكە هەمان ڕێگای سەدامی گۆڕبەگۆر دووبارە بكەنەوە لەكوشتن و دوورخستنەوەی كورد لەسەر زێدی باب و باپیران و بڕینی مووچەو قوتی هاوڵاتییانی كوردستان، ئەو قۆناغەی ئیستا عێراق پیداتێدەپەڕێت مەترسیێكی گەورەیە لەسەر گشت پێكهاتەكانی نێو دەستوری عیراق و تێكچونی پەیوەندیەكان لەگەڵ وڵاتانی دراوسێ و وڵاتانی دەرەوە، بەدرێژایی مێژوو دەسهەڵاتدارانی عێراق دژایەتی كوردیان كردووە هەرچی لەدەستیان هاتووە بەرامبەر بەكورد كردوویانە، ڕۆژانی تەنگانەش هانای خۆیان بۆ كورد دەهێنن و بێشەرمانە داوا لەقیادەی كورد دەكەن كێشەكانمان بۆ چارەسەر بكەن، دادپەروەری بۆ وڵات لەپێشینەی هەموو ئەركەكاندا دەبینرێت بۆ بەرەوپێشبردنی وڵات لەهەموو بوارەكانی ژیان و دامەزراندنی عەدالەت خانەیەك كەهەموو پێكهاتەكان تیادا سودمەندبن نەك چەند كەسانێك بەهەوەسی خۆیان دەستبگرن بەسەر دەسهەڵاتەكان و لەبەرژەوندی خۆیان بەكاریبهێنن.
ئەو دادپەروەریەش لەكەسی یەكەمی دەوڵەت و دادگای باڵای وڵات دەستپێدەكات ئەوكات بۆهیچ كەسێك نییە دەست لەكاروباری وڵاتدا وەربدات و مافی كەسانی تر پێشێل بكات، ئەوەی ئیستا باوە لەنێو عێراقدا دەسهەڵاتی تاكەكەسیە، واتا هەر بەرپرسێك لەلای خۆیەوە بڕیار دەردەكات و بێ ئەوەی حساب بۆ سەرووی خۆی بكات، ڕاگرتن و دواخستنی مووچەی فەرمانبەران و هێزە چەكدارەكانی سەربە حكوومەتی هەرێمی كوردستان پلانێكە نوێ نییە بەڵكو سەدان ساڵە ئەو شێوازە حكومڕانییە بەرامبەر بەكورد پیادە دەكەن، دەبێ لایەنە سیاسیەكانی كوردستان هۆشیارانە مامەڵە لەگەڵ ئەو جۆرە سیاسەتەی بەرپرسانی عێراقدا بكەن، ئەگەر هاتوو هەر لایەنێك ملكەچی داواكاریەكانیان بوو ئەوە دۆخێكی ئاڵۆزتر ڕوو لەهەرێمی كوردستان دەكات دوورنییە هەموو داهاتە نەوتییەكان و نانەوتیەكان لەدەستی كورد دەربهێنن و یاری بودجەو موچەی هەرێمی كوردستان بكەن، ئەوەی لە ئیستادا بەرگری لەمافی مووچەخۆرانی هەرێم دەكات تەنها پارتی دیموكراتی كوردستانە، ئەگەر پارتی هەڵوێستی نەبوایە ئیستا هیچ شتێك نەدەبوو بەناوی هەرێمی كوردستان، بۆیە پارتی هەموو كات لەدژی دوژمنانی كورد هەڵوێستێكی تاك لایەنەی هەبووە دژیان وەستاوەتەوە، ئامانجی پارتی مسۆگەركردنی مافە دەستوریەكانی گەلی كوردە لەحكومەتی عیراق و هەموو ئەو پێكهاتانەی لەهەرێمی كوردستان دەژین.
