بەشێك لە هاووڵاتییانی گەڕەكی خەبات ناڕازین لە شوێنی دانانی موەلیدەیەكی ئەهلی

ئەندامێكی لیژنەی موەلیدە ئەهلییەكانی سۆران : شوێنەكە بازرگانییە و لەسەر ڕێگەی گشتی یە و جگە لە بارەگای حزبێك هیچ ماڵێكی تر لە نزیك ئەو شوێنە نییە

مه‌هدى محه‌ممه‌د – زاری كرمانجی :

بەشێك لە هاووڵاتییانی گەڕەكی خەبات نیگەران و ناڕازین لەو شوێنەی كە دیاریكراوە بۆ دانانی موەلیدەیەكی ئەهلی، ئەندامێكی لیژنەی موەلیدە ئەهلییەكانی سۆرانیش دەڵێ شوێنەكە بازرگانییە و هیچ كێشەیەكی یاسایی نییە و هیچ ماڵێكیش نزیكی شوێنەكە نییە.
شوێنی موەلیدەكە دەكەوێتە سەر ڕێگای گشتی (سۆران – ڕواندز)، بەرامبەر بەرگری شارستانی، لە ئێستادا كاری تێدا دەكرێت و هەیكەلەكەی تەواو كراوە، بەشێك لە هاووڵاتییانی ئەو گەڕەكە داوا دەكەن بە زوویی شوێنی ئەو موەلیدەیە بگوازرێتەوە شوێنێكی تر.
یوسف موختار ئەندامی لیژنەی موەلیدە ئەهلییەكانی سۆران لەبارەی شوێنەكەوە بە زاری كرمانجی ڕاگەیاند “شوێنێكی بازرگانییە و لە بەردەمی شەقامێكی سەرەكییە و خاوەن موڵكەكە ڕێكارەكانی یاسای تەواو كردووە و ڕەزامەندی وەرگرتووە كە لەو شوێنەدا موەلیدە دابنرێت.”
لەسەر گلەیی هاووڵاتییانی گەڕەكەكەش ئەندامی لیژنەی موەلیدە ئەهلییەكانی سۆران دەڵێ‌ “خاوەنی خانوویەكی نزیك بە شوێنی موەلیدەكە كە بارەگایەكی حزبی تێدایە، لەگەڵ هەندێك لە خەڵكی دوور لەو شوێنە هاتبوون و گووتیان لێ ناگەڕێن ئەو موەلیدە لێرە دابنرێت،” دەشڵێت ناوی خەڵكانێك لەنێو داواكارییەك هەبوون كە دانیشتووی گەڕەكێكی تر بوونە.
یوسف موختار ئەوەش دەڵێ “حكومەت بەهۆی بەرژەوەندی گشتی، پێداگیری دەكات موەلیدەكە لەو شوێنە دابنرێت و نایەوێت لەو گەرمایەدا نزیكەی 700 ماڵی ئەو گەڕەكە بێ كارەبا ببن.”