مەهدی محەممەد – زاری كرمانجی :
هاوسەرگیری نێوان ژن و پیاوێكی بەساڵاچوو، كاردانەوەی بەرفراوانی بەدوای خۆیدا هێنا و چیرۆكی بە یەك گەیشتنی ئەوان بووه مانشێتی زۆربەی ڕۆژنامەكان.
بێرنی لیتمانی تەمەن (100 ساڵ) و خاتوو مارجۆری فیتەرمان ی (102 ساڵ)، لە خانەی بەساڵاچووانی ویلایەتی فیلادێلفیا ڕۆژی یەكشەممە 26ی ئایاری 2024، هاوسەرگیرییان كرد، میدیاكانی ئەمەریكا ئەم هاوسەرگیرییان بە هاوسەرگیری سەدە ناو برد و كتێبی گینس بۆ ژمارە پێوانییەكان ئەم دوو هاوسەرەی وەك “بەتەمەنترین ژن و مێرد لە جیهاندا” ناساند .
چیرۆكی خۆشەویستی ئەم دوو هاوسەرە لە خانەی بەساڵاچووانەوە سەرچاوەی گرتووە، كاتێ بۆ یەكەم جار یەكتریان بینیوە، ئەوان دەڵێن پێشتر بیریان لە هاوسەرگیری بە فەرمی نەكردووەتەوە، بەڵام بەهێزی پەیوەندییەكەیان وای لێكردن بڕیاری چوونە ناو قەفەسی زێڕین بدەن.
