” مانگی داهاتوو بە بەشداری 800 ئەندام لە شاری دهۆك كۆنگرە دەبەسترێت”
موڕشید برادۆستی– سۆران:
لە 27ی ئابی 2022، پڕۆسەی هەڵبژاردنی ئەندامانی كۆنگرەی چواردەی پارتی دیموكراتی كوردستان دەستی پێكردووە و لە زۆربەی شار و شارۆچكەكانی كۆتایی بە هەڵبژاردنەكە هاتووە، كە وابڕیارە لە مانگی 11ی ئەمساڵ لە پارێزگای دهۆك ببەسترێت .
دوایین كۆنگرەی پارتی كە كۆنگرەی 13 بوو، دوانزە ساڵ بەر لە ئێستا و لە كۆتایی ساڵی 2010 لە شاری هەولێر بەسترا، بەپێی پەیڕەوی ناوخۆی پارتی، دەبێت هەر چوار ساڵ جارێك كۆنگرە بكرێت، بەڵام بەهۆی شەڕی داعش و پەتای كۆرۆنا، لە كاتی خۆی دواكەوت، بڕیار وایە لە مانگی داهاتوو كۆنگرەی چواردەی پارتی لە شاری دهۆك بەسەر پەرشتی سەرۆك بارزانی ببەسترێت، كۆنگرەكە بە شداری 800 ئەندام كە دابەشی سەر شار و شارۆچكەكان كراون، لە نێویاندا 25% ئەندامانی كۆنگرە ئافرەت دەبن.
یوسف سۆفی عەلی، بەرپرسی مەكتەبی هەڵبژاردنی لقی 10ی پارتی لە سۆران بە زاری كرمانجی راگەیاند:” دووای بڕیاردان لەسەر بەڕێوەچوونی كۆنگرەی چواردەی پارتی، لە سنووری لقی 10ی پارتی دیموكراتی كوردستان لە سۆران، وەك تەواوی شار و شارۆچكەكانی كوردستان، لە رێگەی لیژنەیەكی تایبەتەوە دەستمان كرد بە هەڵبژاردنی ئەندامانی كۆنگرە، لە كەشێكی ئارامدا بەشێوەیەكی سەركەوتووانە توانرا كۆتایی بە كارەكان بهێندرێت .
بەرپرسی مەكتەبی هەڵبژاردنی لقی 10ی پارتی، دەڵێت:” لە سنووری لقەكەمان، 29 كەس كە لە نێویاندا شەش ئافرەتیش هەن، بە زۆرینەی دەنگی ئەندامانی پارتی بوونە نوێنەر بۆ كۆنگرەی چواردە، ئەوانیش پێكهاتوون لە عەبدولواحید محەمەد، سالم شێخ محەممەد، عوسمان قادر لە بارەگای لقی 10، محسین سەدیق، رەئوف عەبدوڵڵا، عیسا محەمەد، ئاسیا مەغدید لە لیژنەی ناوچەی رواندز، ئیسماعیل مەلا ناوچەی سیدەكان، فاروق ئەحمەد، دلاوەر محەمەد ، عەونی مەلكۆ لە ناوچەی دیانا، فكری عەلی، ئەڤین فەتاح غەزالی، شێرزاد محەمەد قادر لە ناوچەی مێرگەسۆر، فرسەت ئەحمەد شاباز، وسوو وسوو، دلزار موسلیح لە ناوچەی خەلیفان، سیروان مشیر گوانی، سوڕەیا میرحاج لە ناوچەی هەندرێن، خالس مەلاك، بەدیعە خالد لە ناوچەی سۆران، ئیدریس سەبری لە لیژنەی ناوچەی گۆڕەز، حەسەن میكائیل، زیاب موقداد، شەهلا تەها لە ناوچەی بلێ، هاشم جاسم مهاجیر، فەرمان حسێن، مەحموود قادر، پاكستان محەمەد ئەمین لە ناوچەی فەرمانبەران .
ئەمە لە كاتێكدایە، لە لقی 26ی گوڵانی پارتی دیموكراتی كوردستان لە دەڤەری باڵەكایەتیش، ژمارەیەك ئەندامی بۆ كۆنگرەی چواردەی پارتی رەوانە كردووە، ئەوانیش پێكهاتوون، لە حەسەن عەدۆ، تەها ناوەندی، كاكۆ عەلی لە بارەگای لق، ئیدریس سەكری، گۆران مامند، بەندی خالید لە ناوچەی باڵەك و موشیر فارس لە ناوچەی سمیلان “.
