ئیسماعیل ئیبراهیم
ئەمە دوو خوولی پەرلەمانییە پارتی پێداگری دەكات لەسەر بەدەست هێنانی پۆستی سەرۆك كۆماری عێراق، لە كاتێكدا بە پێ هەموو پێوەرێكی یاسایی و شەرعی و ئیستیحقاقی هەڵبژاردنەكانەوە، ئەو پۆستە بۆ ئەو لایەنە دەبێت كە زۆرینەی دەنگەكانی لە هەرێمی كوردستان بەدەست هێناوە، پارتیش جگە لەوەی لەم خوولە زۆرینەی دەنگەكانی بەدەستهێنا، لە خوولی رابردووش بووە مەزنترین حزبی سەر ئاستی عێراق كە بەبێ هاوپەیمانی زۆرترین دەنگی پێدرا، واتە مافی خۆیەتی پۆستی سەرۆك كۆمار بۆ ئەو بێت.
بەڵام بۆچی هەم لەلایەن هێزە كوردییەكان و هەم زۆربەی شیعە و هەندێك لە سووننە و توركمانەكانیشەوە دژی پێدانی ئەو پۆستە بوونە بە پارتی؟
بۆچی هەموو دەم دەنەی یەكێتییان داوە پێداگر بێت لەسەر رادەست نەكردنی ئەم پۆستە بە پارتی؟
بۆچی یەكێتی كە هەم لە كوردستان هەمیش لە سەر ئاستی پەرلەمانی عێراق ژمارەی كورسییەكانی كەمترە لە پارتی پێداگرە بۆ وەرگرتنی پۆستی سەرۆككۆمار؟
كێن ئەو لایەنە ناوخۆیی و دەرەكیانەی بە هەموو هێزیانەوە لە پشت یەكێتی دەبن بۆ وەرگرتنی ئەو پۆستە؟
بۆچی كۆسپ بۆ پارتی دروستدەكرێت تا كاندیدی خۆی نەگەینێتە كۆشكی كۆماری؟
وەڵامی ئەو پرسیارانە زۆر ئاسانە، ئەوەی تۆزێك لە ئەلف و بێی سیاسەت تێبگات دەزانێت، هەموو ئەو كۆسپانەی بۆ پارتی دروست دەبن پەیوەندی بە هەڵوێستەكانی نەتەوەیی و كوردستانی بوونی پارتییەوە هەیە، كە هەرگیز ئامادەی سازشكردن نییە و نەبووە و نابێت لەسەر بابەتەكانی پەیوەندیدار بە ئاسایش و بەرژەوەندی هەرێمی كوردستان، بەتایبەتی ئەگەر كاندیدی پارتی بگاتە كۆشكی كۆماری هیچ هێز و لایەنێكی عێراقی ناتوانێت وەك ئێستا و رابردوو بە ئاسانی دەست بۆ بەرژەوەندییەكان و ئارامی كوردستان ببات، ئەو كات پارتی هەرگیز لە كاندیدی خۆی قبوڵ ناكات بێ دەنگی و بێ هەڵوێستی بنوێنێت، وەك ئەوەی ئێستا بەرهەم ساڵحی نوێنەری یەكێتی لە ئاست هەموو دەست درێژەییەكانی بۆ سەر كوردستان بێ دەنگ و بێ هەڵوێستە.
بێ گومان یەكێتیش لە بەرئەوەی لە سەر ئاستی هەرێمی كوردستان بە تایبەتی دوای خیانەتی 16ی ئۆكتۆبەر و رووداوەكانی 8ی تەمووز و تۆمەتی كوشتنی چەند كادیری دیاری حزبەكەی و تۆمەتی كوشتنی چەند رۆژنامەنووسێك و چەندین بابەتی دیكەی هەستیار، تووشی داڕمانی جەماوەری بووە، ئەگەر پێداگری لەسەر وەرگرتنی پۆستی سەرۆككۆمار نەكات، ترسی ئەوەی هەیە هەندی دیكە متمانەی شەقام لەدەست بدات، بەرهەم ساڵحیش كە وەك تەیرێكی مەعقوڵی بێ دەنگ و هەڵوێست بووە لە ئاست جێبەجێكردنی پیلانی ناحەزان و دژبەرانی كورد، لە لایەن بەغدا و تارانەوە پشتگیری دەكرێت بۆ مانەوەی لەو پۆستە، گوشاریش لە یەكێتی دەكەن هەر بەرهەم كاندیدیان بێت لەبەر ئەوەی بۆ ئەوان كە دژە كوردن كەسێكی بەحورمەتە.
گرنگتر لە پۆستی سەرۆككۆماری شكۆی و هەیبەتی نەتەوەییە، كە پارتی هەرگیز ئامادە نەبووە و نییە لەسەر حیسابی وەرگرتنی پۆستێك بیانكاتە قوربانی. هەمیشە باجی قوورسی داوە، ئەو باجەش بۆ حزبێك كە نوێنەرایەتی راستەقینەی شۆڕشی سەدان ساڵەی نەتەوەیەك دەكات، گەوهەرێكە دەست هیچ لایەنێك نەكەوتووە پارتی نەبێت.
