بەختیار سەباح -ڕواندز:
هەفتەى داهاتوو بۆ ڕێگرى کردن لە بڵاوبوونەوەى نەخۆشى تاى خوێنبەربوون، هەڵمەتى شووشتن و لێدانى دەرزى و رشاندنى شوێنى مانەوەى مەڕوماڵات، لە سنوورى قەزاى ڕواندز، دەست پێ دەکات.
د.زاهیر تاهیر، بەڕێوەبەرى بنکەى ڤێنتێرنەرى ڕواندز بۆ زارى کرمانجى گووتى: ” لە سنوورى قەزاى ڕواندز، تیمێکى تایبەت دروستکراوە، بۆ لێدانى دەرزى لە ئاژەڵى گەورە، شووشتنى مەڕو بزن، هەروەها رشاندنى شوێنى مانەوەى ئاژەڵەکان (حەسارەکان) بۆ ڕێگریکردن لە بڵاوبوونەوەى نەخۆشى تاى خوێنبەربوون، بۆ ئەم مەبەستەش دەرمانى تایبەت لەلایەن بەڕێوەبەرایەتی گشتی سامانی ئاژەڵ و ڤێتێرنەری هەولێر دابینکراوە، هەفتەى داهاتوو هەڵمەتەکە دەست پێ دەکەین ”.
گووتیشى: ” تا ئێستە هیچ حاڵەتێکى ئەو نەخۆشییە لە سنوورى ڕواندز بڵاونەبووەتەوە، بەڵام داوا لە هاووڵاتییان و خاوەن مەڕوماڵات و ئاژەڵداران و موختارى گوندەکان دەکەین، لە کاتى دەستپێکردنى ئەو هەڵمەتە هاوکاریمان بکەن، بۆ ئەوەى بتوانین ڕێگرى لە بڵاوبوونەوەى ئەو نەخۆشییە بکەین، چونکە زیاتر لە ڕێگەى بوونى ( گەنە، قڕنە، پند ) لەسەر ئاژەڵەکان ئەو نەخۆشییە دروست دەبێت و دواتریش لە ڕێگەى خوێنەوە بۆ مرۆڤ دەگوازرێتەوە”.
لە سنوورى قەزاى ڕواندز زیاتر لە 24 هەزار سەر ئاژەڵ، لە مەڕو بزن و ڕەشەوڵاخ هەیە.
