زارى کرمانجى-سۆران:
ئەمڕۆ پێنجشەمە 23ـی ئایارى 2024، پێنج پارتی كلدان و ئاشوور و سریانی رایانگەیاند، بە هەموو شێوەیەك دژی كەمكردنەوەی سێ كورسیی كۆتای كریستیانەكان دەوەستینەوەو دەڵێن: دابەشكردنی كورسیی كۆتای كریستیان لەسەر بنەمای دابەشبوونی دانیشتووانی كریستیان نەبووە.
لە راگەیەنراوێكی هەریەك لە بزووتنەوەی دیموكراتی ئاشووری، ئەنجوومەنی گەلی كلدانی سریانی ئاشووری، پارتی بەیت نەهرەینی نیشتمانی، پارتی یەكێتی بەیت نەهرەینی نیشتمانی، راگەیەنراوێكی هاوبەشیان لەبارەی كەمكردنەوەی كورسیی پێكهاتەی كریستیان بڵاو كردەوە.
لە راگەیەنراوەكەدا هاتووە، وەك پێنج پارتی نەتەوەیی كە نوێنەرایەتیی گەلی كلدانی سریانی ئاشووری دەكەن، بڕیاری كەمكردنەوەی كورسییەكانیان رەت دەكەنەوە و بایكۆتی هەڵبژاردن دەكەن.
ئاماژەیان بەوەشکردووە، بەهۆی بڕیاری دادگای فیدراڵی و دەستەی دادوەریی هەڵبژاردنەكانەوە، نادادپەروەریی بەرانبەریان كراوە و لە كۆی پێنج كورسیی كۆتای كریستیانەكان، سێ كورسی لابراوە و تەنیا دوو كورسیان بۆ گەڕاوەتەوە.
بە گوتەی ئەو پارتە سیاسییانە بەهەموو شێوەیەك كەمكردنەوەی سێ كورسیی كۆتای كریستیان لە پەرلەمانی كوردستان رەت دەكەنەوە، كە لە یەكەم یاسای هەڵبژاردن لە ساڵی 1992 بڕیاری لەسەر دراوە، هەروەها دابەشكردنی دوو كورسیی كۆتاكان لەسەر بنەمایەكی راستی دانیشتووان نەبووە، بەڵكو نەخشەیەكی دیمۆگرافی سیاسیی شێوێنراو كراوەتە بنەمایەكی ناڕاستی دابەشبوونی كورسییەكان.
لە كۆتایی راگەیەنراوەكە دەڵێن، بەهیچ شێوەیەك ناچنە ژێرباری بڕیارێكی نایاسایی، كە هەوڵ دەدرێت بەسەریاندا بسەپێنرێت و و دەڵێن، تا كاتی گەڕاندنەوەی كورسییەكانیان، بەشداریی هەڵبژاردن ناكەن و داوا دەكەن گەلەكەیان خۆپێشاندانی جەماوەریی ئەنجام بدەن بۆ رەتكردنەوەی ئەو ستەمەی لێیان كراوە.
