پارتی لە پێناو چەسپاندنی دیموكراسی و مافەرەواكانی كوردستان دروستبووە

رێبوار حەمەلاو شوانی

پارتی دیموكراتی كوردستان هەردەم خواست و ویستی گەل و نیشتیمانەكەی پێش هەموو بەرژوەندییەكی دیكە خستووە، دیموكراسی، ئازادی، ئاشتی، یەكێك لە بنەما سەرەكییەكانی ئەو قوتابخانە و رێبازە بووە هەردەم ئاڵا هەڵگری هەڵبژاردن و مافەكانی تاك بووە، پێشەنگ بووە لە دانی باجی قورس لە پێناو پارێزگاری كردن لە كەسایەتی وسەنگی قەوارەی هەرێمی كوردستان و مێژووش گەواهیدەر بووە، لە پێناو باج و قوربانی گەروەی بە پارتی، هەرگیز خۆی لە ئەنجامدانی هەڵبژاردن نەشاردۆتەوە و باوەرێكی تەواوی بە پرۆسەی دیموكراسی هەبووە و خاوەن پێگەیەكی جەماوەری بەهێزە نەك تەنها پارتییەكان بەڵكو خەڵكانی تریش لە دەرەوەی پارتی وەك حزب ئەوەش بۆ دروستكردنی ئەو ئەتموسفیر‌ و سەقایە دەگەڕێتەوە، كە لە هەرێمی كوردستان بە جیاوازتر لە بەشەكانی تر عێراق و ئینجا زۆرێك لە وڵاتانی ناوچەكە لە رووی ئاشتی و پێكەوە ژیاندا فەرهەامی كردووە ، پارتی هەردەم باوەری بە ئاشتی و گفتوگۆ و لێكتێگەیشتن بۆ چارەسەری هەموو كێشە و ئاریشەكان و بەهێزكردنی بناغەی ئەزموونی كوردستان هەبوو و هەردەم بیر و ستراتیژی سەرەكیی خزمەتكردنی كوردستانیان بووە بە بێ جیاوازی، هەرگیز باوەری بە موزایەدە و بانگەشەی بێ بنەما و دروشمی بێكردار نەبووە.

ئەو لایەنانەی كە ئێستا موزایدە بە سەر پارتی دەكەن و پێیان وایە پارتی ویستی هەڵبژاردنی نییە، مێژوویی دیداری سەرۆك بارزانی و جنین پلاسخارت نوێنەری تایبەتی سكرتێری گشتی نەتەوە یەكگرتووەكان گەواهیدەرە بەوە كە فەرموویان (( سبەی هەڵبژاردن بكرێت پارتی ئامادەیە )) یانیش دیاریكردنی رۆژی هەڵبژاردن لەلایەن ڕێزدار نێچیرڤان بارزانی، نیەتی ئەم قسەیەش لەوەوەیە كە سەرۆكی هەرێمی كوردستان رۆژی هەڵبژاردنی دیاری كرد كە لە پشكی پارتییە و سەرۆكی حكوومەتیش بودجەی تەرخانكرد بۆ پڕۆسەكە كە ئەویش لە پشكی پارتییە، لە پڕۆسەی سیاسی كوردستاندا پارتی نەرم و نیانانە و حەكیمانە هەنگاو دەنێت، هەموو ئەوانەی موزایەدە بەسەر پارتییەوە دەكەن رێگایان لێگیراوە، دەیانگوت كە پارتی هۆكاری ناكۆكی هێزە كوردستانییەكانە، كەچی تا ئێستا سەرۆكی هەرێم چەندینجار پێشنیاری كۆبوونەوەی لایەنەكانی كردووە بۆ كۆدەنگی، ئەوان دەیانگوت حكوومەت مووچە نادات، بەڵام ئێستا حكوومەت بەسەرۆكایەتی ڕێزدار مەسروور بارزانی جگە لە پرسی مووچە ئەوا ئاوەدانی و بەگەرخستنەوەی پرۆژەكان و بەهێزكردنی كەرتەكانی حكوومەتی هێناوەتە قۆناغێكی زۆر گرنگەوە، گوتاری پارتی بەجۆرێكە كە پاشەكشەی تێدا ناكرێت، چونكە ئەوەندە بەكوێرانە دژایەتی هێزێك یان پرسێك ناكات كە دواجار نەتوانێت مامەڵەی لەگەڵ بكاتەوە، هەمیشە سیاسەت لە پێناوی رێڕەوی كوردایەتی دەكات بۆیە هەموو پرسە نەتەوەییەكان دەبەسترێنەوە بە هەڵویستی پارتییەوە.
لەماوەی 20 ساڵ پەیوەندی كوردستان و عێراق و بەتایبەت سەركردایەتیی پارتی هەموو ئامانجەكانی تەنها لە پێناو پۆس و پایە و كۆكردنەوەی پارە نەبووە لە بەغدا، بەڵكو ئامانجی سەرەكیی بۆ ئەو راستییە بووە كە مافە دەستوورییەكانی گەلی كورد بچەسپێنێت و ئەو پۆستانەش كە لە عێراق وەك مافێك بۆ كوردستان رەوایە بەكار بهێنرێت بۆ وەدیهێنانی ئامانجەكانی، پارتی هەرگیز كێشەی شەخسی لەگەڵ كەس ولایەنێكی سیاسی نەبووە و بەڵام هەر ئەوە زێهێنیەت و رژێمەكانی عێراق بوونە كە مافەرەواكانی گەلی كوردیان نادیدە گرتووە، بۆ قۆناغی ئێستاش سەرەڕای هەموو ئەو ستەمكارییانەی كە لەماوەی 17 ساڵەی حكوومەتە یەك لە دوای یەكەكانی عێراق بەرامبەر بە گەلی كورد و مافەرەواكانی كراوە، بەڵام پارتی بەردەوام بووە لە گفتوگۆی ئاشتیانە و لۆژیكانە بەتایبەت بۆ قۆناغی ئێستای پرۆسەی ئاڵۆزی سیاسیی هێز ولایەنەكانی كە جگە لەماڵوێرانی هیچ دەستكەوتێكی نەبووە و بەتایبەت دوای ساڵێك لە شكستی پێكهێنانی حكوومەت، مێژوو گەواهیدەرە كە ” پارتی دیموكراتی كوردستان هاوپەیمانی لەگەڵ رەوتی سەدر و رەوتی سیادەی سونەكان كرد، تادوا رۆژەكانی رێككەوتن بەرپرسیاربوو لە هاوپەیمانی و خاوەنی ئەو بەڵێنەبوو كە بە لایەنەكانی دابوو، كە هاوپەیمانیش هەڵوەشایەوە نەچووە ژێر باری هیچ گوشارێكەوە كە ناچاری بكات بە هەڵوێستی جیاوازەوە، گەورەیی پارتی لەوەدایە كە خاوەنی سیاسەتی خۆیەتی و ناكەوێتە ژێر كاریگەری هیچ لایەنێكەوە، بەڵكو خۆی خاوەنی بڕیارە.

ئێستاش كە هاوپەیمانی لەگەڵ چوار چێوەی هەماهەنگی كردووە، بەژیرانە و بە وردییەوە هەنگاو دەنێت، ئەوە زۆرە بۆ هێزێكی سیاسی ئەوەندە ژیرانە مامەڵە بكات لە بەرەیەك دانەمێنێت و بەرەیەكی دیكە داوای هاوپەیمانی لێ بكەن بۆ كاركردن بەیەكەوە بەبێ ئەوەی بەركەوتەی سیاسی خراپی لێبكەوێتەوە، هەموو ئاماژەكان بۆ ئەوەن ئەم رەوتە نەرم و حەكیمانەی پارتی و بارزانی لە داهاتوودا رەنگ بداتەوە لە پڕۆسەی سیاسی عێڕاق و كاریگەری خۆی دروست بكات لە راگرتنی باڵانسی ناوچەكە و لە پێناو بەهێزكردنی سەنگ وپێگەی قەوارەی كوردستان و ئینجا بەدەستهێنانەوەی ئەو مافەرەوا دەستوورییانەی كە چەندین ساڵە دەسەڵاتدارانی عێراق خۆیان لە جێبەجێكردنی دەدەزنەوە .