حكومەتی فیدڕاڵی عێراق: تا ٢٠ ڕۆژی تر نەوتی سپی بۆ هەرێمی كوردستان دەنێرین

ئەمجارە لەبەرامبەر پێدانی 200 لیتر نەوت، تەنیا 30 هەزار دنیار لە هاووڵاتییان وەردەگیردرێت

زارى كرمانجي :

فارس عیسا، سەرۆكی نوێنەرایەتی حكومەتی هەرێمی كوردستان لە بەغدا :” بەپێی ڕێكەوتنی هەولێر و بەغدا، دەبێت تا ٢٠ ڕۆژی دیكە ئەو بەشە نەوتە بگاتە هەرێمی كوردستان”.
لەسەر پرسی نەوت و هەناردەكردنی پشكی هەرێمی كوردستان لە بەنزین و نەوتی سپی لەلایەن حكومەتی فیدراڵییەوە، سەرۆكی نوێنەرایەتی حكومەتی هەرێمی كوردستان لە بەغدا راشیگەیاند:”بە پێی بڕیاری ژمارە (١٦٩)ی ڕێكەوتی ٧ی ئەیلولی ٢٠٢٢ی ئەنجومەنی وەزیران، مەسرور بارزانی، سەرۆكی حكومەتی هەرێمی كوردستان، وەزارەتی سامانە سروشتییەكانی راسپارد، بە هەماهەنگی لەگەڵ دامودەزگاكانی دیكەی حكومەتی ھەرێمی كوردستان، بەر لە هاتنی وەرزی زستان و بە خێرایی كێشەی نەوتی سپی و سووتەمەنی بە گشتیی، لەگەڵ وەزارەتی نەوتی فیدراڵی چارەسەر بكەن “.
عیسا گوتیشی:” لەسەر ڕاسپاردەی مەسرور بارزانی، سەرۆكی حكومەتی هەرێمی كوردستان، لە ڕێكەوتی ٢٠ی ئەیلولی ٢٠٢٢، لەگەڵ هەر یەك لە د.ئیحسان عەبدولجەبار، وەزیری نەوت و د.حامد یونس ئەلزەوبەعی، بریكاری وەزارەت كۆبووینەوە، تاوەكو حكومەتی هەرێمی كوردستان بڕی ٢٥٧ ملیۆن و ٥٠٠ هەزار لیتر نەوتی سپی لە حكومەتی فیدراڵی بكڕێت و بۆ هەر خێزانێكی هەرێمی كوردستان ٢٠٠ لیتر دابین بكات.”
لە میانی سەردانی مستەفا كازمی، سەرۆكوەزیرانی عێراقی فیدراڵ بۆ هەرێمی كوردستان، سەرۆكی حكومەتی هەرێمی كوردستان پێداگری لەسەر ئەوە كردووە كە پێویستە هاووڵاتییانی هەرێمی كوردستانیش وەك سەرجەم هاووڵاتییانی دیكەی عێراق مامەڵەیان لەگەڵ دا بكرێت لە ڕووی دابینكردنی نەوت و گاز و بەنزینەوە، لەگەڵ ئەوەشدا دۆخی جوگرافی لەبەر چاو بگیرێت، چونكە كوردستان ناوچەیەكی شاخاوییە و زستانی ساردە و پێویستییەكانی سووتەمەنی زیاترن.
لەلای خۆیەوە مستەفا كازمی، دڵنیایی داوەتە سەرۆكی حكومەتی هەرێمی كوردستان كە “پشكی هەرێمی كوردستان دابین دەكرێت و بەردەوام دەبین لەسەر جێبەجێكردنی رێكەوتنەكە”.
لەلایەكی دیكەوە، فارس عیسا رایگەیاند:”لە چوارچێوەی ڕێكەوتنی نێوان هەولێر و بەغدا، وەزارەتی نەوتی فیدڕاڵی پێیان راگەیاندین پشكی هەرێمی كوردستان تا سەری مانگ، واتە تا ٢٠ ڕۆژی دیكە دابین دەكرێت و پڕۆسەكە لە ١٥ی تشرینی یەكەمی ئەم ساڵ، دەست بە هەناردەكردنی ئەو بڕە سووتەمەنییە دەكرێت، بە ئومێدی ئەوەی وەك ساڵانی پێشووی لێ نەیەتەوە كە لە كۆی ٢٥٧ ملیۆن لیتری ساڵانە، كەمتر لە ٦٥ ملیۆن لیتر بۆ هەرێم نێردرا.”
شایەنی باسە، پێشتر بە بەهای بازرگانی نەوتی سپی دەدرایە هەرێمی كوردستان و بۆ هەر لیترێك ٤٠٠ دینار وەردەگیرا، بەڵام ئێستا داوا كراوە وەك هاووڵاتییانی دیكەی عێراق مامەڵە لەگەڵ ئەم بەهایە بكرێت و بۆ هەر لیترێك ١٥٠ دینار وەربگیرێت و لە كۆبوونەوەی هەردوو سەرۆكوەزیرانی هەرێم و بەغداش ئەمە پەسەند كراوە و جێبەجێكردنەكەشی وەستاوەتە سەر بەغدا، چونكە لە ساڵی ٢٠٢١دا لەسەر هەمان بڕ ڕێكەوتن كرابوو، كەچی حكومەتی فیدراڵی سەرەڕای وەرگرتنی پارەكە، نەوتەكەشی نەنارد و تەنیا نێزیكەی ١٠ ملیۆن لیتری بۆ خەڵكی هەرێمی كوردستان نارد و ئێستا ٩ ملیار و ٢٦٨ ملیۆن دیناری هەرێمی كوردستان لایی وەزارەتی نەوتی فیدراڵە.
عیسا جەختی كردووە كە یەكێك لە كاری هەرە پێشینەكانی حكومەتی هەرێمی كوردستان زامنكردنی مافە دەستورییەكانی خەڵكی هەرێمە و لەو بابەتەشدا پێشەنگ بووە وكاری پێویستی وەك ئەركی سەرشانی خۆی بەجێگەیاندووە.