مەهدی محەممەد – زاری كرمانجی :
وەزارەتی كشتوكاڵی عێراق ڕاگەیاند 40 حاڵەتی تووشبوون بە تای خوێنبەربوون تۆماركراوە و پێنج كەسیش گیانیان لەدەستداوە.
دووبارە تای خوێنبەربوون لە پارێزگاكانی بەغدا و نەینەوا و بابل و زیقار بڵاو بووەتەوە و وەزارەتی كشتوكاڵی عێراقیش لە ڕێگەی 246 تیمەوە، هەڵمەتێكی دەرمان ڕشتنی لە كێڵگەكانی بەخێوكردنی ئاژەڵ لە 15 پارێزگا بۆ ڕێگری لە تەشەنەكردنی زیاتری تای خوێنبەربوون دەستپێكردووە.
بەپێی ئامارەكانی وەزارەتی كشتوكاڵی عێراق، لەم ساڵدا 40 حاڵەتی تووشبوون و پێنج حاڵەتی گیانلەدەستدان تۆماركراوە و زۆرترینی قوربانییەكانیش لە پارێزگای زیقار بوونە.
ساڵی ڕابردوو بە هۆی تای خوێنبەربوونەوە 70 كەس لە شارەكانی عێراق گیانیان لەدەستداو 545 حاڵەتی تووشبوونیش تۆمار كرابوون.
