“بەدوای بچووكترین بیانوو دەگەڕێن بۆ دەستگیركردنی ئافرەتان”
دیدار/ رۆژان قیاس
سێبەر عەلی، كچێكی رۆژهەڵاتی كوردستانە و دانیشتووی سۆرانە، لە رێگەی زاری كرمانجییەوە باس لەو دۆخە نا هەموارەی رۆژهەلاتی كوردستان دەكات و دەڵێ:” ئێران بەدوای بچووكترین بیانوو دەگەڕێت بۆ دەستگیركردنی ئافرەتان.
سێبەر عەلی، باسی شەهیدكردنی ژینا ئەمینی دەكات و دەڵێ” حیجابەكەی ژینا بیانوویەك بوو بۆ هێزی گەشتی ئیرشاد، بۆ ئەوەی دەستگیری بكەن و ئەشكەنجەی بدەن، كورد بوونی ژینا هۆكاری سەرەكی دەستگیر كردنەكەی بوو، واتە حیجابی ژینا ئەوەندە كراوە نەبوو كە شایەنی دەستگیر كردن بێت، بەڵكو رقی ئەوەیان لێ دەركردووە كە كچە كوردێكە و سەردانی تارانی كردووە، ئەمە دەستپێكی شۆڕشێكە بەرامبەر ئێران، ئێستا هەموو وڵات هەستاوە و دەنگی نارەزایەتی بەرز دەكاتە، خەڵكی رۆژهەڵات و ئێران ناتوانن چیدی ئەو زۆرداریەی ئێران قبوڵ بكەن، لەبەر ئەوەی دیكتاتۆریەتی ئێران بە جۆرێكە ژن بۆتە ژێر دەستە، هەر بۆیە ئەو رووداوە بووە بیانویەك بۆ هەستانە سەر پێ و بەرزكردنەوەی دەنگی نارەزایەتیەكان، پێدەچێت ئەمە دەستپێكی شۆڕشێكی گەورە بێت لە دژی دەستەڵات و شۆڕشێك كە ئافرەت بەرپای بكات و پێشڕەوی بكات هیچ كات بە چۆكدا ناهێت، ئەوەی دەبینین لە ئێران بە گشتی و رۆژهەڵاتی كوردستان، ژنان دەورێكی باڵا و كاریگەر دەبینن لەنێو خۆپیشاندەران و بە دروشمی ژن، ژیان، ئازادی دەنگیان بەرز دەكەنەوە لە هەمبەر دەستەڵات”.
لە وەلامی پرسیارێكی زاری كرمانجی دا، لەبارەی مامەڵەی هێزی گەشتی ئیرشاد لە ئێران ئەم كچە رۆژهەڵاتییە، گووتی” هێزەكانی گەشتی ئیراشاد لە ئێران، بە دوای بچووكترین بیانوو دەگەڕێن بۆ دەستگیركردنی ئافرەتان، هەتا ئەگەر حیجابی كچان و ژنان كراوەش نەبێ و پابەندیش بن، بەڵام بیانوویان پێ دەگرن، دوای دەستبەسەركردنیان لە زیندان ئەشكەنجەیان دەدەن هەتا دەستدرێژیش دەكەنە سەر ئافرەتەكان، بۆیە ئافرەتان ترسێكی زۆریان هەیە بەرامبەر ئەو هێزە و وەك دێوەزمەیەك دەیان بینن، خەڵكی ئێران بە گشتی و ئافرەتەكان ئەوەندە چەوسێنراونەتەوە بە سیاسەتی توندوتیژ و مامەڵەی خراپ، كە رووداوێكی وا هەموو خەڵكی هێنایە سەر شەقام، لەبەر ئەوەی خەڵك بە رادەیەك بێزار بووە لەو دەستەڵاتە توندڕە و سەركوت كەرە، كە ئامادەیە باجەكەی بدات بۆ ئەوەی ئازادییەكانی بەدەست بێنێت”.
لە بەردەوامی قسەكانیدا ئەم كچە چالاكوانە روونیكردەوە” لەو ماوەیەدا بەسەدان خەڵكی بێتاوان شەهید كراون، ئەمانە شەهیدی رێگەی ئازادین، بۆ بەدەستهێنانی مافە رەواكانیان شەهیدكران، رژێمی دیكتاتۆری ئێران ئەم هەموو گەنج و پیر و ئافرەتە دەكاتە قوربانی بۆ سیاسەتە سەركوتكەرەكەی، لە كاتێكدا ئەمەی ئەوان دەیكەن بە ناوی ئیسلامەوە دوورە لە هەموو بنەما ئیسلامییەكان، منداڵ و نەوەكانی دەسەڵاتدارانی ئێران لە وڵاتانی ئەوروپا و ئەمریكا بە ئازادیەكی تەواو و خۆشگوزەرانی دەژین، لەناو ئێرانیش خەڵكی خۆیان بەو جۆرە دەچەوسێننەوە”.
