محەمەد هەسنانی- سۆران:

سیامەند ئیسماعیل، بەڕێوەبەری گەنجینەی سۆران، لە دیدارێكی زاری كرمانجیدا ئاشكرای دەكات:” ساڵانە ملیاران دینار بۆ كرێی بینایە و فەرمانگەكان و مامۆستایانی وانەبێژ تەرخان دەكرێت، سەبارەت بە گەڕاندنەوەی مووچە پاشەكەوت كراوەكانیش دەڵێ:” تا ئێستا هیچ رێنمایی نوێمان بۆ نەهاتووە.
لە بەردەوامی قسەكانیدا سیامەند ئیسماعیل، بەڕێوەبەری گەنجینەی ئیدارەی سۆران، بە زاری كرمانجی راگەیاند:” سنوورەكەمان كە هەر چوار قەزاكانی سۆران، مێرگەسۆر، رواندز و چۆمان لە خۆدەگرێت، وەك ئاسانكاریەكیش بۆ هاووڵاتییان لە سەنتەری زۆربەی شار و شارۆچكەكانی ئیدارەی سۆران، بانكمان كردوونەتەوە وەك ئاسانكارێك بۆ هاووڵاتییان لە رووی دابەشكردنی مووچە و ئەو كارانەی پەیوەستن بە ئیش و كاری خەڵكی ئەو ناوچانەوە.
لە بەردەوامی قسەكانیدا گووتیشی:” داوامان لە بەڕێوەبەرایەتی و فەرمانگە و دامودەزگاكانی سنوورەكەمان كردووە، مانگانە بەر لە 20ی مانگ لیستی مووچەكانیان ئامادە بكەن و بیدەنە گەنجینە، بۆ ئەوەی زووترین كات وەردبینی بكرێت و لەگەڵ راگەیاندنی وەزارەتی دارایی دەست بەدابەشكردنی مووچەكان بكرێت، خۆشبەختانە تا ئێستا بەشێوەیەكی گشتی گرفتی دابەشكردنی مووچە نەبووە لە بانكەكانی سنوورەكەمان، تەنانەت خانەنشینانیش مانگانە دەتوانن بە ئاسانی مووچەكانیان وەربگرن و لە زۆربەی بانكەكانمان شوێنی پشوودان و وەستان بۆ نۆرەی مووچەكان تەرخان كراوە، بۆ ئەوەی هاووڵاتییان زۆر ماندوو و هیلاك نەبن”.
سەبارەت بە گەڕاندنەوەی مووچە پاشكەوت كراوەكانی مووچەخۆران، بەڕێوەبەری گەنجینەی ئیدارەی سۆران، ئاشكرای دەكات:” هەر بڕیار و رێنمایەك لە حكوومەت و وەزارەت دەربچێت، دوای گەیشتنی رێنماییەكە ئێمەش جێبەجێ‌ دەكەین، بەڵام تا ئێستا هیچ بڕیارێكی فەرمیمان بۆ نەهاتووە بۆ ئەوەی لە ئێستادا مووچە پاشكەوت كراوەكان بدرێنەوە.
ئەو بەڕێوەبەرە، ئاماژەی بەوەشكرد:” جگە لە دابەشكردنی مووچەی فەرمانگە و دامودەزگاكان، مانگانە زیاتر لە ملیارێك و 500 ملیۆن دینار، بۆ كرێی وانەبێژانی مامۆستایانی قوتابخانە و كۆلێژ و پەیمانگەكانی سنووری ئیدارەی سۆران خەرج دەكرێت، بۆ ئەمەش بەهەمان شێوە لیستی ئەو ناوانە ئاراستەی گەنجینە دەكرێت و دوای وردبینی بەپێی رێنماییەكان پارەكەیان بۆ خەرج دەكرێت.
سیامەند ئیسماعیل، ئاشكراشی كرد:” بەهۆی ئەوەی تائێستا ژمارەیەكی زۆر دامودەزگاگان لە بینای كرێدان، ساڵانە زیاتر لە ملیارێك و 500 ملیۆن دینار بۆ ئەم مەبەستە خەرج دەكرێت، لەو پارەیەش زۆرترینی بۆ خوێندنی باڵایە كە ساڵانە زیاتر لە ملیارێك دینار بۆ كرێی باڵەخانە و بەشە ناوخۆییەكانی قوتابییان و خانووی مامۆستایانە”.
لەوەڵامی ئەو پرسیارەی ئایا ئەو كەلوپەلانەی لەكاركەوتووی فەرمانگە و دامودەزگا حكوومییەكان چیان بەسەر دێت، بەڕێوەبەری گەنجینەی سۆران، دەڵێت:” دوای دروستبوونی قەیرانی دارایی، بە بەراورد بە ساڵانی پێشووتر كەمتر كەل و پەلەكان بۆ فەرمانگەكان دابین دەكرێن، بەمەش كەل و پەلە لە كاركەوتووەكانیان كەمترە، تەنانەت ئەوانەش كە دەیگەڕێنەوە زۆربەی هەرە زۆریان لە كاركەوتوون، تەنها دەتوانین بەشێوەی راگەیاندنی ئاشكرا “موزایدە”یان بكەین، بەتایبەتی ئاسن و ئەو جۆرە شتانە كە خەڵكانێك داوای كڕینیان دەكات”.