لە سۆران بە ئۆتۆمبێلی تایبەت كاری گواستنەوەی هاووڵاتییان دەكرێت

موڕشید برادۆستی – سۆران :
لەئیدارەی سەربەخۆی سۆران، رۆژانە بە ئۆتۆمبێلی تایبەت هاوشانی تاكسیەكان كاری گواستنەوەی هاووڵاتییان و سەرنشینان دەكرێت، ئەمەش بووەتە جێگەی نیگەرانی لای خەڵك و خاوەن تەكسیەكانیش. بەڕێوەبەری گواستنەوە و گەیاندنی سۆرانیش دەڵێت” رێگە نادەین بە ئۆتۆمبێلی تایبەت كاری تاكسی بكرێت، دەبێت ئۆتۆمبێلی جۆری تاكسی بێت و لای ئێمەش تۆمار بكرێت، تا ناوەڕاستی مانگی داهاتوو دوواین مۆڵەتیان پێدەدەین، لە ئەگەری پابەند نەبوون رووبەڕووی سزایان دەكەینەوە .
سۆران ئیدارەیەكی سەربەخۆیە، نزیكەی 350 هەزار دانیشتووی هەیە، بەپێی ئامارێكی بەڕێوەبەرایەتی گواستنەوەی سۆران 600 تاكسی و پەنجا پاس كاری گواستنەوەی هاووڵاتییان بۆ هێلەكانی دەرەوە دەكەن و ناویان تۆمار كراوە، ئەمە لە كاتێكدایە، سۆران و دەورووبەری زیاتر لە 70 هەزار ئۆتۆمبیلی بەگشت جۆرەكانیەوە هەیە .
رەعد سەردار گەنجێكی خێزانداری دانیشتووی گەڕەكی بەختیاری سۆران بە زاری كرمانجی گووت ” بەهۆی خراپی باری داراییمان نەمان توانیوە ئۆتۆمبێلێكەم كە تایبەتە و مۆدێل كۆنیشە بیگۆڕم بۆ ئۆتۆمبێلێكی نوێ، بەڵام ئەوەی گرنگە رۆژانە بڕە پارەیەك بە ئیشی تاكسی پەیدا بكەم كە بەشی بژێوی ماڵ و منداڵم دەكات .
گووتیشی” تا ئێستا كەس رێگری لە كاركردنی تاكسیم نەكردوە یا داوای گۆڕینی ئۆتۆمبێلیان لێ نەكردووم و لە سبەینێ تا ئێوارە بەردەوامم، ئەو دەڵێ ” لە ئێستادا كاری تاكسی باشترە و دەوامی زانكۆ و پەیمانگەكان بۆتەوە و رۆژانەمان باشە.
سەباح سەلام گەنجێكی دانیشتووی ئازادی سۆران بە زاری كرمانجی گووت” لەگەڵ فراوان بوونی سۆران، چەند ساڵێكیشە ئەو بێسەر و بەریە لە كەرتی گواستنەوە پەیدا بووە، بەداخەوە لە شوێنەكانی تر بەم شێوەیە نییە، پێویستە لایەنە پەیوەندی دارەكان بە تایبەت بەڕێوەبەرایەتی هاتووچۆ و گواستنەوە هەوڵی بنبڕ كردنی ئەو دیاردەیە بدەن و رێگە نەدەن هەموو كەس و بە هەموو جۆرە ئۆتۆمبێلێك كاری تاكسی ئەنجام بدات ، ئەمە كارێكی ناشارستانییە و لە هیچ شوێنێكی كوردستان بەم شێوەیە نییە .
زیاتر گووتی” رۆژانە كاتێك دێیینە نێو بازاڕ نازانین كامە ئۆتۆمبێل تاكسیە و كامە تایبەتییە، چونكە ئەوانەی ئۆتۆمبێلی تاكسی نوێییان پێییە رێژەیەكی زۆر كەمن، ئەوانی دیكە بە هەر ئۆتۆمبێلێك كە بیانەوێ كاری تاكسی ئەنجام دەدەن، ئەمەش سیمایەكی ناشرینی بە سۆران بەخشیووە و كێشەی زۆریش بۆ هاووڵاتییانی سنوورەكەمان و بە تایبەت بۆ خەلكی شارەكانی دیكە دروست كردووە كە بۆ مەبەستی گەشتیاری یا هەر مەبەستێكی دیكە سەردانی دەڤەرەكەمان دەكەن و پێویستە بەدوواداچوونێك بۆ ئەم دیاردەیە بكرێت و بنبڕ بكرێت”.
هاوكات، رزگار عەباس هاووڵاتیەكی خاوەن تاكسیە و رۆژانە كاری گواستنەوە دەكات بە بۆ زاری كرمانجی گووت ” ماوەی 6 ساڵە كاری تاكسی لە سۆران دەكەم لەسەر بڕیار و رێنوێنی بەڕێوەبەرایەتی گواستنەوە و گەیاندنی سۆران تاكسیەكی مۆدێل 2011 بە زیاتر لە یەك دەفتەر دۆلار كڕیوە، لە هەمان كات هاووڵاتی هەیە ئۆتۆمبێلی تایبەتی مۆدیل 1990ی بە نرخی 35 وەرەقە هەیە و لەگەڵ من رۆژانە كاری تاكسی دەكات و بەلكو زیاتر لە منیش كار دەكات .
بە گووتەی ئەو خاوەن تاكسیە، ئیش كردنی تاكسی لە سۆران بە شێوەیەكی جوان و یاسایی رێك نەخراوە و بێ سەر و بەری زۆری پێوەدیارە، لە سۆران هەموو كەسێك دەتوانێت بەهەر جۆرە ئۆتۆمبیلێكی تایبەت كاری تاكسی و گواستنەوە ئەنجام بدات .
شیرین مەحموود خەڵكی سلێمانیەوە بۆ خوێندنی زانكۆ لە سۆرانە، ئەو دەڵێ ” سەرەتا كە دەچوومە بازاڕ و دەگەڕامەوە داخلی ماوەیەكی زۆر چاوەڕوانی تاكسیم دەكرد و ئۆتۆمبێلی دیكە بۆم رادەوەستان، دواتر شارەزا بووم كە ئۆتۆمبێلی تایبەتیش لە سۆران هاوشێوەی تاكسیەكان كاری گواستنەوەی هاووڵاتییان ئەنجام دەدەن، ئەمەش كێشەیەكە و هەروەها دیاردەیەكی زۆر ناشرینیشە، پێویستە تاكسیەكان لە ئۆتۆمبیلی تایبەتی جیاواز بكرێن و دیار بن.
لەلای خۆشیەوە، بارزان میر عەلی بەڕێوەبەری گواستنەوە و گەیاندنی ئیدارەی سۆران بە زاری كرمانجی راگەیاند:” هەموو هێلەكانی گواستنەوەی هاووڵاتییانمان ئەوانەی لە سۆران بۆ شار و شارۆچكە و شارەدێیەكانی دەرەوەی سۆران رێكخستووە بە ئۆتۆمبێلی مۆدێلی پێشكەوتوو كاری گواستنەوەی هاووڵاتییان دەكەن، بەڵام هێلەكانی ناوخۆی سۆران تا ئێستا نەتوانراوە بەباشی كۆنتڕۆڵ بكرێت و هاووڵاتییان بە ئۆتۆمبێلی تایبەت كاری گواستنەوە ئەنجام دەدەن .
بەڕێوەبەری گواستنەوە و گەیاندنی ئیدارەی سۆران، نای شارێتەوە كە ئۆتۆمبێلی دیكە بەدەر لە تاكسیەكان كاری گواستنەوە دەكەن و دەڵێ ” چەندین ساڵە ئەو كارە كراوە، بەڵام لەمەودووا رێگە نادەین هاووڵاتییان بە هیچ شێوەیەك بە ئۆتۆمبێلی تایبەتی ئەوجا بەتابلۆبێ یان بێ تابلۆ، مۆدێل كۆنبێ یان نوێ كاری تاكسی بكەن، دەبێت ئۆتۆمبێلی جۆری تاكسی بێت و لای ئێمەش تۆمار بكرێت، بەپێچەوانەوە سەرپێچیە لە یاسا و رێنمایەكانی گواستنەوە.
دووپاتی كردەوە:” تا ئێستا تەنها 100 كەسێك كە كاری تاكسی لە نێو بازاڕ و سەنتەری سۆران دەكەن، ئۆتۆمبێلیان كردۆتە تاكسی، ئەوانی دیكە سەرجەمیان تایبەتن، بۆیە بەمەبەستی بنبڕ كردنی ئەو دیاردە ناشارستانییە لەگەڵ بەڕێوەبەرایەتی هاتووچۆی سۆران هەماهەنگیمان كردووە، بەیەكەوە مەفرەزە دەردەكەین، لە نزیكەوە سەردانی گەڕاجەكان و لە رێگاكان دەوستین هەر هاووڵاتییەك ببینن بە ئۆتۆمبێلی تایبەت كاری تاكسی و گواستنەوەی هاووڵاتییان دەكات، روبەڕووی سزایان دەكەینەوە سەرەتا بە سزای پێبژاردن كە لەیەك هەزار دینار دەستپێدەكات تاسەرووی دووملیۆن دینار.
ئاشكراشی كرد:” ئێمەهەستمانكردووە لای خەڵك لێخوڕینی ئۆتۆمبێلی جۆری تاكسی كارێكی عەیبەیە، دەبێت ئەم كلتوورە بگۆڕین تاكسی كار و كاسبیە وەك تەواوی كارەكانی دیكە، بۆیە دەبێت دیار بێت كامە تاكسیە و جیاواز بێت لە ئۆتۆمبێلەكانی دیكە، ئاڕم و لۆگۆ و زانیاری هەبێت و پاكانەی ئەمنی هەبێت، ئۆتۆمبێلیش تاكسی بێت نەك تایبەت.
بەڕێوەبەری گواستنەوەی سۆران، گووتیشی:” داوا لە شوفێران دەكات، تا روبەڕووی سزا نەبوونەتەوە ئۆتۆمبێلەكانتان بكەنە تاكسی و سەردانمان بكەن بۆ تۆمار كردنی ناوەكانیان، ئەوانەی بێ موچەن دەتوانین لە رێگەی دەستەبەری كۆمەڵایەتی خانەنشینیان بۆ ببڕینەوە، دواتر ئەو دەرفەتەیان لە دەست دەچێت، بە بڕە پارەیەكی زۆریش ناویان بۆ هێلەكان تۆمار دەكرێت ، ئەوانەی هێلەكانی دەرەوەی سۆرانیش دەبێت ئۆتۆمبێلەكانیان بۆ تاكسی بگۆڕن و لای ئێمەش تۆمار بكرێن، وەك هێلی سۆران – سیدەكان، سۆران مێرگەسۆر، سۆران – رواندز، بۆ ئەو گۆڕانكاریەش دووا مۆڵەت 15 – 11ی ئەمساڵە.
بارزان، دەشڵێت:” هەموو ئەوانەی كاری تاكسی دەكەن لە هێلەكان و لە نێو بازاڕ، كارتی كاركردنیان پێ بدرێت و دەبێت پاكانەیان هەبێت و لەژێر سەرپەرشتی ئێمە كار بكەن، تا بتوانین چاودێریان بكەین، لە ئەگەری پابەند نەبوونی شوفێرانیش، لە ئاگاداریەكدا ئەو هێلە دەخەینە فرۆشتنی ئاشكرا، ئەوكات داوا لە هەر شوفێرێكانی دیكە كە تاكسیان هەبێت دەكەین، ناویان لەو هێلانە تۆمار بكەن و ئەوانی دیكە رەش دەكەینەوە”.