شەهلا رەشید- سۆران
پزیشكێكی پسپۆڕ، كۆمەڵێك هەنگاوی گرنگ دەخاتەڕوو بۆ زیادكردنی رێژەی سووتانی چەوری.
د. كامەران رەسوڵ، پزیشكی پسپۆڕی زانستی خۆراك، بە زاری كرمانجی راگەیاند” رێژەی سووتانی چەوری ناو جەستە دوای تەمەن 40 ساڵ كەم دەبێتەوە، ئەمەش دەبێتە هۆی زۆری كێش و قەڵەوی، لە هەمان كاتدا هۆكارێكە بۆ دانەبەزینی كێش لە كاتی رێجیم كردن، بێگومان هۆكاری تریش هەن بۆ كەمبوونەوەی رێژەی سووتانی چەوری.
كۆمەڵێك گۆڕانكاری و هەنگاوی گرنگ هەن كە دەبنە هۆی زیادبوونی رێژەی سووتانی چەوری لەوانەش:
- وەرزشكردن بە تایبەت وەرزشی strenghts exercise وەك بەرزكردنەوەی ئاسن، پاسكیل سواری، شاخەوانی، زۆمبا و سەركەوتن بەسەر قادرمەكان، هەفتەی دوو جار بۆ سێ جار ئەمانە ئەنجام بدە، ئەگەر توانای ئەوەت نەبوو ئەوا راكردن و رۆیشتن بە پێ بەخێرایی رۆژانە بۆ ماوەی كاتژمێر و نیوێك یاخو زیاتر بژاردەیەكی تەندروستە.
-رۆژانە دوو بۆ سێ كوپ لە خواردنەوەی چای سەوز یان قاوەی سەوز بێ شەكر، بەڵام تەنها بە رۆژ چونكە شەوانە دەبێتە هۆی تێكچوونی خەو. - كەمكردنەوەی خوێ و زیادكردنی بەهارات لەناو خواردن، وەك بیبەری تیژ، زەنجەبیل و زیرە.
- هێشتنەوە جەستە بە شێداری لە رێگەی خواردنەوەی بڕی پێویستی ئاو لە نێوان ژەمەكان و خواردنی سەوزە و مێوەی كەم كالۆری كە دەوڵەمەندن بە ئاو .
- خەوی تەندروست بە قووڵی شەوانە 7 بۆ 8 كاتژمێر، هەروەها دووركەوتنەوە لە شەونخوونی و نووست لە رۆژ .
- رۆژانە خواردنی بڕی پێویست لە ماددە ریشاڵییەكان، گرنگیدان بە خواردنی ماددە پڕۆتینەكان و چەورییە بەسوودەكان و دووركەوتنەوە لە خواردنی كاربۆهێدارتی سادەی بەرهەمێنراو بە بڕی زۆر یاخود نەخواردنیان ئەگەر توانرا .
- كەمكردنەوەی دڵەڕاوكێ و ستریس.
- دووركەوتنەوە لە نەخواردنی ژەمە سەرەكییەكان، باشترە كە سێ ژەمی تەندروست بخورێت بەڵام لە قاپی بچووك و بە بڕی كەم.
