پارتی بۆچی داوای پۆستی سەرۆك كۆمار دەكات؟

رائیب زراری
لە دوای رزگاركردنی عێراق لە دەست زوڵم و ستەمی بەعس، كورد بە ئۆمێدەوە گەڕایەوە بەغدا، سەرۆك بارزانی بە دەیان رۆژ لە بەغدا مایەوە تا دەستووری عێراق نووسراو و خرایە دەنگدان، 80% خەڵكی عێراق دەنگی پێ دا، كورد ئۆمێدی وا بوو لە رێگەی جێبەجێ كردنی دەستوور بە مافەكانی رەواكانی خۆی دەگات، لە ساڵی 2005 بە دواوە پۆستی سەرۆك كۆمار بووە بەشی كورد، لەو كاتەوە تا ئێستا لای یەكێتی بووە، سەرۆك كۆمار پارێزەری دەستوورە، هەر كاتێك لە دەستوور لادرا دەبێت زەنگی ئاگادار كردنەوە لێ بدات، لەو كاتەوە نەمان بینیوە بۆ یەك چركەش بەرگری لە دەستوور كرد بێت، ئەمە لە كاتێكدایە رۆژانە مافەكانی كورد پێشێل دەكرێت، دەستوور لە دژی كورد بەكاردەهێنرێت، ئەوەتا رۆژانە لە ناوچە كوردستانییەكان كە بە ماددەی 140 ناونراوە عەرەبی هاوردە دێتە سەر ماڵ و موڵكی كورد و داگیری دەكات، شەهیدیان دەكات، لە ماڵەكانیان دەردەكات، لە خانەقین تا شنگال رۆژ نییە خوێنی تاكی كورد نەڕژێت، ئەوەش هەموو لەبەر ئەوەیە دەستوور جێبەجێ ناكرێت، جگە لەوەی بەغدا قوتی خەڵكی كوردستانی بڕی، ئەوەش هەموو پێشلكارییە بۆ سەر دەستوور، ئەو دەستوورەی كە پارێزەكەی سەرۆك كۆمارە، بەتایبەتی لەو دوو خولەی رابردوو نەمان بینی سەرۆك كۆمار نوقەی لێ بێت، رۆژێك لە رۆژان بڵێت، ئەوە پێشێلی دەستوورە و نابێت بكرێت، بۆیە ئەگەر پۆستی سەرۆك كۆمار هەر لە دەستی ئەو جۆرە كەسانە بمێنێتەوە، لە چوار ساڵی داهاتوو زۆر لەوە خراپتر بەسەر كورددا دێت و ئەوەی هەشە لە دەست دەچێت و بۆ كورد شتێك نامێنێتەوە بەناوی دەستوور، ئەمە لە كاتێكدایە ئەو پۆستە موڵكی كوردە و لە نێو كوردیش بۆ حزبی زۆرینەیە، هەر وەكو چۆن شیعە كە زۆرینەیە پۆستی سەرۆك وەزیرانی بەركەوتووە، بۆیە ئەو پۆستە هی حزبێك و كەسێك نییە كە بۆ بەرژەوەندی خۆی بەكاربهێنێت، دەنگدەری كوردیش، كە دەنگی بە پارتی داوە چی دیكە رازی نابن ئەو پۆستە بۆ حزبێك بێت كە زۆرینە نییە لە كوردستان، پارتییش گەیشتووتە ئەو بڕوایە ئەگەر ئەو پۆستە وەرنەگرێت لە داهاتوودا زۆر لەوەی ئێستا خراپتر بەسەر كورد دێت، هەر لەبەر ئەوەشە ئەوەندە پێداگری لەسەر ئەو پۆستە دەكات و دەیەوێت لە رێگەی ئەو پۆستەوە مافە رەواكانی كورد بە دەست بهێنێت و خەڵكی ناوچە كوردستانییەكان بە ئازادانە لەسەر ماڵ و حاڵی خۆیان بژین و پارێزگاری لە دەستوور بكات”.