ئارام حەتم لاوكۆ
عێراق لەسەرەوە بۆ خوارەوە بە ئاگری فیتنە و هاندانی وڵاتانی دەرەوە سەری لێ شێوابوو، حكومەت كەوتە گرتنی كادیر و ئەندامانی پارتی، بۆیە پارتی بە ناچاری خەبات و تێكۆشانی لە ئاشكرایەوە گواستەوە بۆ نهێنی و كەوتە وشیاركردنەوەی جەماوەر، دەستكرا بە كڕین و كۆكردنەوەی چەك، حكومەتیش ئەو هێز و خێڵ و كەسانەی پڕ چەك كرد، كە ئامادەبوون بە گژ شۆڕشگێڕاندا بچنەوە، لە ٢٠ تەممووزی ١٩٦١ مەكتەبی سیاسی پارتی یاداشتێكی مێژوویی دا بە عەبدولكەریم قاسم و داوای لێكرد پێش ئەوەی كار لە كار بترازێ بە گیانێكی برایانەوە چارەسەری بارودۆخی كوردستان بكرێت، بەڵام یاداشتەكە بایەخی پێ نەدرا. لە ٦ی ئەیلوولی ١٩٦١ لە شارەكانی كوردستان بڕیاری مان گرتنی گشتی درا بە بۆنەی ڕۆژە ڕەشەكەی ٦ ی ئەیلوولی ١٩٣٠ لە سلێمانی كە بە ڕاپەڕینی بەر دەركی سەرا بەناوبانگە. لە ڕۆژی ١١ی ئەیلوولی ١٩٦١ لە هەموو ناوچەی كوردستان لە نێوان حكومەت و عەشایر و حیزبی بوو بە شەڕ. پێشمەرگەش چوونە ناو سەنگەرەكانی خاكی كوردستان، هێزی میری بە تانك و فڕۆكە و تۆپ و چەكی تازە پەلاماری سەنگەرەكانی دا و بۆ ئەوەی ڕێگا بكاتەوە كە هێزی میری پێدا بڕوات چەند كاتژمێر بە ئاگر باران بە ناپاڵم و تانك و تۆپ لەگەڵ هێزی پێشمەرگە شەڕ خایاندی لە ئاكامدا كە بەر ئەوەی هێزی پێشمەرگە و حكومەت وەك یەك نەبوون لە ڕووی چاكەوە ناچار ناوچەی دەربەندی بازیان و دەربەندیخان ئەو ڕێگایە بەرەڵا بكەن و بكشێنەوە، هەروەها لە ناوچەی هەولێر لەبەر نەشارەزایی و نەبوونی هەواڵگری نەیانزانی بوو كە میری بەرەو كوێ دێ چ لە هەولێر و چ لە قۆڵی كەركووكەوە تەنیا بەوە ڕاگەیشتن كە بكشێنە دواوە و خۆیان دەرباز بكەن. لە قۆڵی بارزانیشەوە پەلاماری مەلا مستەفا درا بە پاڵپشتی فڕۆكەوە ناوچەی بارزانیان هەموو ئاگردا. شەڕ هەموو ناوچەیەكی كوردستانی گرتەوە و پێكدادان بە درێژایی ساڵانی ١٩٦٢ بەردەوام بوو، هەر هەلێكیان بۆ هەڵ بكەوتایە پەلاماری هێزی حكومەتیان ئەدا و لە دێ و قەزا و ناحیە و زیانیان لێ ئەدان.
لەشكری شۆڕش بەم شێوەیە ڕێكخرا:
1- سەرۆكی گشتی : سەرۆك مستەفا بارزان
2-سەرۆكی ئەركان: نووری مەلا عارف
3- لەشكری یەك لە بادینان: ئەسعەد خۆشەوی كە لەشكرەكانی پێك هاتبوون لە:
هێزی زاخۆ: عیسا سوارە
هێزی دهۆك :عەلی خەلیل
هێزی شێخان و ئاكرێ : حەسۆ میرخان دۆلەمەری
4- لەشكری دوو لە هەولێر : ڕەشید سندی هێزەكانی پێك هاتبوون لە :
هێزی كاوە لە پشدەر : حەسۆ میرخان ژاژوكی
هێزی سەفین: تاهیر عەلی.
5- لەشكری سێیەم لە سلێمانی و كەركووك : موقەدەم عەزیز ئاكرەیی هێزەكانی پێك هاتبوون لە:
هێزی وەهاب : عەبدول وەهاب ئەرتوشی
هێزی قەرەداغ: فازڵ تاڵەبانی
هێزی ڕزگاری : تاریق ئەحمەد
