محەممەد مەحموود- سۆران:
تاقیكردنەوەی نیشتمانی پۆلی نۆ دەستیان پێكرد و زیاتر لە حەوت هەزار قوتابی لە ئیدارەی سۆران بەشدارن، پۆلی نۆیەكان 40% نمرە لەگەڵ خۆیان دەبەن لە تاقیكردنەوەكانیش لەسەر 60 نمرە تاقیكردنەوە دەكەن.
ئەمڕۆ سێشەممە ٧-٥-٢٠٢٤ تاقیكردنەوەی نیشتمانی پۆلی نۆیەمی بنەڕەتی دەستی پێكرد و لەسەر ئاستی ئیدارەی سۆرانیش ٧١٢٠ قوتابی بەشداری لەو تاقیكردنەوەیە دەكەن.
حكوومەتی هەرێمی كوردستان و وەزارەتی پەروەردە تەواوی ئامادەكاری كردووە بۆ ئەنجامدانی تاقیكردنەوەكان، هەر لە دابینكردنی شوێنی تاقیكردنەوەی قوتابی، دانانی پرسیار، ئامادەكردنی فۆرمی سۆما بۆ وەڵامدانەوەی قوتابیان.
وڵات عوسمان، بەرپرسی بەشی ئەزموونەكان لە بەڕێوەبەرایەتی گشتی پەروەردەی سۆران، بە زاری كرمانجی راگەیاند” ئەمڕۆ تاقیكردنەوەی نیشتیمانی پۆلی نۆی بنەڕەتی دەستی پێكرد، لە سنووری پەروەردەی گشتی سۆران لە كۆی چوار پەروەردە ٧١٢٠ قوتابی بەشداری لەو تاقیكردنەوەیە دەكەن”.
وڵات عوسمان ، ئاماژەی بەوەشكرد: ١٦٢ هۆڵی تاقیكردنەوە ئامادەكراون و رۆژانە لە كاتژمێر ٨ ی بەیانی تاقیكردنەوەكان ئەنجامدەدرێن.
بە پێی زانیارییەكانی زاری كرمانجی زۆرترین قوتابی پۆلی نۆ لە پەروەردەی قەزای ناوەندی سۆرانە و كەمترینیش لە رواندز.
