زاری کرمانجی- سۆران:
وەزارەتی کارەبای حکومەتی هەرێم رایدەگەیێنێت، ئەو هاوبەشانەی کە لە بازاڕی لەنگەی هەولێر و بازاڕی دهۆک و ئەڤرۆ ستی لە دهۆک کراونەتە سیستەمی پریپەید، ٢٤ کاتژمێر کارەبایان هەیە.
لە راگەیێندراوەکەی وەزارەتی کارەبای حکومەتی هەرێم بڵاوکراوەتەو تێدا هاتووە، لە هەرێمی کوردستان شەش هەزار و ٣٥٦ هاوبەشی کارەبا بە سیستەمی پریپەیدەوە بەستراون و ئەکتیڤ کراون کە هەریەک لە بازاڕی لەنگەی هەولێر هەزار و ٤٥٧ هاوبەش و لە بازاڕی دهۆک هەزار و ٥٢٤ هاوبەش و لە ئەڤرۆ ستی لە دهۆک سێ هەزار و ٣٨٥ هاوبەشی کارەبا سیستمی پریپەیدیان بۆ کراوە.
لە بەشێکی دیکەی راگەیەنراوەکەی وەزارەتی کارەبای حکومەتی هەرێمدا هاتووە، ئەم سیستەمە سەرەڕای باشترکردنی دۆخی کارەبا، بارگرانی سەر فیدەرەکانی کارەبا بە رێژەی ٤٠٠٪ کەم دەکاتەوە و کرێی کارەباکەشی بە هەمان نرخی ئێستای کارەبایە.
هاوکات: سیستمی پریپەیدی کارەبا لە هەرێم، بەپێی راگەیاندراوی وەزارەتەکە، تێچووی کارەبا کەمدەکاتەوە و بۆ چوار هێندە ئەرکی فیدەرەکانی کارەباش کەمدەکاتەوە و بەرهەم زیاد دەکات.
وەزارەتی کارەبا ئاماژەی بەوەشکردووە، کە کرێی ئەو سیستمە هاوشێوەی کرێی کارەبایە لە رابردوودا، سیستمەکە بە جۆرێک کار دەکات کە هاوبەشانی کارەبا وەکو کارتی پڕکردنەوەی باڵانس دەیکڕن و کارەبا بەکاردەهێن ولە مانگی رابردووشدا وەزارەتەکە باسی لەوەکرد، ئەگەر سیستەمى پریپەید سەرکەوتوو بێت و لەگەڵ کۆمپانیا گەیشتنە ڕێککەوتن، ئەوا تەنها رەزامەندی ئەنجومەنی وەزیرانی دەمێنێت بۆئەوەی بە تەواوی و لە هەموو کوردستاندا جێبەجێی بکەن.
