زاری كرمانجی-خەلیفان:
لە سرێشمە بنكەیەكی تەندروستی و قوتابخانەیەكی شەش پۆلی دروست دەكرێن، بۆ ئەو مەبەستە ئامادەكاری كراوە، كە هەفتەی داهاتوو بەردی بناغەی بنكەی تەندروستی دابنرێت.
سەرۆكایەتی شارەوانی سرێشمە، بڵاوی كردەوە، پێش نیوەڕۆی ئەمڕۆ ٥ ئایاری ٢٠٢٤، بە ئامادەبوونی سەرۆكی شارەوانی سۆران شێرزاد و ئیبراهیم عومەر، بەڕێوەبەری سندووقی پەرەپێدانی كۆمەڵایەتی لقی هەولێر، ئەندازیار نیعمت عیسمەت بەرپرسی بەشی پلاندانانی ئیدارەی سەربەخۆی سۆران و ئەندازیاری سەرپەرشتیار و بەشێك لە ئەندامانی ئەنجوومەنی سندوقی پەرەپێدانی كۆمەڵایەتی لە شارەدێی سرێشمە، گرێبەستی درووستكردنی بنكەیەكی تەندروستی لە نێوان سندوقی پەرەپێدان و ئەندازیاری سەرپەرشتیار و بەڵیندەری پڕۆژە واژۆكرا.
هەر بەپێی ڕاگەیاندراوی سەرۆكایەتی شارەوانی سرێشمە، هەفتەی داهاتوو بەردی بناغەی بنكەی تەندروستی دادەنرێت و دەست بە دروستكردنی دەكرێت، سەبارەت بە دروستكردنی قوتابخانەیەكی شەش پۆلی لە شارەدێكەمان لە لایەن سندووقی پەرەپێدانی كۆمەڵایەتی، قۆناخی تەندرینی تەواو بووە و لە ماوەیەكی نزیكدا ڕێكارەكانی تری تەواو دەبێت و دەستدەكرێت بە دروستكردنی.
