هەمین شێرزاد
ڕێنمایی كاری دەروونی
تەندروستی دەروونیی: بریتیە لەتوانای تاك بۆ خۆگونجاندن لەگەل فشارەكانی ژیاندا و درك بە تواناكانی خۆی بكات و بتوانێت بڕیار بدات و بە باشی فێر ببێت و كار بكات و پەیوەندی لەگەل تاكەكانی تردا دروست بكات و بەژداری لە چالاكییەكان و بەرەو پێشبردنی كۆمەڵگەدا بكات و ببێتە تاكێكی بەرهەمدار لە كۆمەڵگەدا.
تەواوكەری پێكهاتەی تەندروستی گشتییە، مافێكی سەرەتایی مرۆڤە زۆر گرنگە بۆ ئەوەی تاك بتوانێت گەشە بكات لە بوارەكانی ژیاندا.
چەندین فاكتەر هەن كار لە تەندروستی دەروونیمان دەكات لەوانە :
فاكتەری بایەلۆجی تاكەكەسی وەك هەڵچوونە سۆزداریەكان
بەكارهێنانی ماددە ،ماددەی هۆشبەر و خواردنەوە كحولییەكان
بەركەوتنی تاك بە بارودۆخی نالەباری كۆمەڵایەتی و ئابووری و ژینگەیی، وەك هەژاری توندوتیژی نایەكسانی و بێبەشبوونی ژینگەیی، هەموو ئەوانەی باسكراون فاكتەری بەهێز و مەترسیدارن بۆ كاركردنە سەر تەندروستی دەروونیمان، ئەو مەترسیانەش دەكرێت لە هەر قۆناغێكی ژیان دەربكەوێت، بەڵام لە هەندێ قۆناغدا دەكرێت كاریگەری بەهێزتر بێت
وەك تەمەنی منداڵی بەتایبەت ژینگەی خێزان، مامەڵەی توندی دایك و باوك كە زۆرجار سزای توندی منداڵ دەدەن بەتایبەت سزای جەستەیی، كە كار دەكاتە سەر لاوازی تەندروستی دەروونی منداڵ لە قۆناغەكانی دواتر، هەروەها فاكتەری دەرەكیش زۆرن وەك سەرەڵدانی نەخۆشی، كۆڤید ١٩ باشترین نمونەیە لە ماوەی رابردوودا ، تێكشكانی ئابووری وڵات ، ئاوارە بوونی زۆرەملێ كە بەهۆی بارودۆخی جەنگەوە روودەدات.
ئێمە چۆن بتوانین تەندروستی دەروونی تاك بەرز بكەینەوە ؟
فاكتەری پاراستنمان هەیە كە لە هەموو قۆناغێكدا، خزمەتی تاك دەكات بۆ بەهێزكردنی و خۆڕاگری بەرامبەر ئەو شتانەی كار دەكەنە سەر تەندروستی دەروونی.
لەوانە :
-خودی تاك، تاك بتوانێت پەرە بە تواناكانی خۆی بدات و بتوانێت خۆی و تواناكانی خۆی بناسێت.
- پلاندانان و بەرنامەرێژی تاك و خۆ ئامادەكردن بۆ بارودۆخە لە ناكاوەكان.
- دروستكردنی پەیوەندیەكی ئەرێنی لەگەڵ تاكەكانی دەوروبەر.
- هەڵبژاردنی كارێكی گونجاو.
- جێ بەجێكردنی بەرنامەكانی قوتابخانە و باشتركردنی پرۆگرامەكانی فێربوون.
- دانانی پرۆگرامێكی رێكخراو لەلایەن حكومەت و كردنەوەی شوێنێكی تایبەت و دانانی كەسانی پسۆر بۆ هۆشیاركردنەوەی تاك و یارمەتیدانیان لە كاتی پێویستدا.
لە كۆتایدا ئەمڕۆ رۆژی جیهانی تەندروستی دەروونییە، بەهیوای دەروونێكی دروست بۆ هەموو لایەك
