زاری كرمانجی-سۆران
چاپی دووەمی كتێبی “تاوانەكانی مادە هۆشبەرەكان” بڵاوكرایەوە، نووسەری كتێبەكە ئاماژە بەوە دەكات، كتێبەكەی بەری رەنجی مادووبوونی سێ ساڵیەتی و ئاماژە بەوەش دەكات، كتێبەكە هەڵگری ناوەڕۆكێكی یاسایی دەوڵەمەندە و هەوڵێكە بۆ بەرەنگاربوونەوەی تاوانەكانی ماددە هۆشبەرەكان كە بوونەتە مەترسییەكی جددی لەسەر كۆمەڵگەكان.
بەشار عەزیز، پارێزەری راوێژكار و رۆژنامەنووس، چاپی دووەمی كتێبی “تاوانەكانی ماددە هۆشبەرەكان، لەگەڵ شرۆڤەكردنی یاسای ژمارە 1ـی ساڵی 2020، یاسای بەرەنگاربوونەوەی تاوانەكانی ماددە هۆشبەر و كارتێكەرە عەقڵییەكان”ـی بڵاوكردەوە.
لەبارەی ئەو كتێبەوە بەشار عەزیز بە زاری كرمانجیی گوت “چاپی یەكەمی كتێبەكەم كۆتایی ساڵی رابردوو لە پێشانگەی نێودەوڵەتیی سلێمانی بۆ كتێب بڵاوكردەوە، چاپی دووەمیش لە پێشانگەی نێودەوڵەتی هەولێر بۆ كتێب بڵاوكراوەتەوە. ئەم كتێبە هەڵگری نێوەڕۆكێكی دەوڵەمەنی یاساییە و بە وردی كارم لەسەر پوختكردنەوەی تاوانەكانی ماددە هۆشبەرەكان لە یاسای نێودەوڵەتی و نێوخۆیی كردووە”.
ئەو پارێزەرە زانیاریی زیاتری لەبارەی كتێبەكەی خستەڕوو و رایگەیاند “لە ناساندنی ماددە هۆشبەرەكان، مێژووی ماددە هۆشبەرەكان، جۆرەكانی، هۆكارەكانی بە تاوانكردن و ئاڵوودەبوونەوە دەستم بە كتێبەكە كردووە، تا دەگاتە هەڵوێستی رێكخراوە نێودەوڵەتییەكان و رۆڵیان لە بەرەنگاربوونەوەی ماددە هۆشبەرەكان، هەروەها ئاماژەم بە هەموو ئەو رێككەوتنە نێودەوڵەتییانە كردووە، كە لە بواری بەرەنگاربوونەوەی ماددە هۆشبەرەكان دەرچوون. دەقەكانی یاسای نێودەوڵەتیش لەو كتێبە خراونەتەڕوو، تایبەت بە تاوانەكانی ماددە هۆشبەرەكان”.
كتێبەكە لە چوار بەشی سەرەكی و زیاتر لە 300 لاپەڕە پێكدێت، بەشار عەزیز دەڵێت “بەشی چوارەمی كتێبەكەم، بەشی سەرەكییە، دەقەكانی یاسای ژمارە 1ـی بەرەنگاربوونەوەی ماددە هۆشبەرەكانم خستووەتەڕوو، لەگەڵ روونكردنەوە و شرۆڤەكردنیان، هەروەها هەموو ئەو رێنماییانەی وەزارەتە پەیوەندیدارەكان و لیژنەی باڵای بەرەنگاربوونەوەی ماددە هۆشبەرەكان خراونەتەڕوو، كە لەسەر بنچینەی ئەو یاسایە دەرچوون، ئەوەی گرنگە كتێبەكە كۆمەڵێك بڕیاری گرنگی دادگەكانی هەرێمی كوردستان لەخۆ دەگرێت كە لەدوای بەركاربوونی یاساكە، بڕیارەكان دەركراون و خوێنەر، خوێندكاران و پارێزەران سوودی زۆر لەو بڕیارانە وەردەگرن”.
لەبارەی گرنگی كتێبەكەشەوە، ئەو پارێزەرە گوتی “تاوانەكانی ماددە هۆشبەرەكان بوونەتە هەڕەشەیەكی ترسناك لەسەر وڵاتان و هەرێمی كوردستانیش لەو مەترسی و هەڕەشەیە بەدەر نییە، دەبێت هەموومان لە راستی خۆمانەوە رووبەڕووی ئەو مەترسییانە ببینەوە، بۆیە كتێبەكە هەوڵێكە و بە بەرپرسیارێتیی خۆمم زانیوە ئەو هەنگاوە بنێم، تاوەكو لە رووی یاساییەوە، پوختەیەك بدەم بە خوێنەران و دەكرێت ئەم كتێبەش لە ناوەندەكانی خوێندن و هەڵمەتەكانی هۆشیاری پشتی پێ ببەسترێت، لەبواری بەرەنگاربوونەوەی ماددە هۆشبەرەكان”.
