ئەڤین بارزانی
دوای کۆتاییهاتنی خولی پەرلەمانی کوردستان، پارتی دیموکراتی کوردستان بە ئاشکرا و چەندین جار داوای کرد هەڵبژاردنی پەرلەمانی کوردستان بکرێت، بەڵام یەکێتی کێشەی زۆر و ترسی لە هەڵبژاردن هەبوو، هەر بۆیە ئەو کات پارتی پێ باش بوو ڕێککەوتنێک لە نێوان هێزە سیاسییەکان هەبێت و هەڵبژاردنی لەو جۆرە ئەنجام بدرێت، چونکە مەترسی گەورە لەسەر داهاتووی هەرێمی کوردستان دروست دەبێت.
دوای تێپەڕبوونی ماوەیەک و چەندین پلانی نێودەوڵەتی و دەرەکی، کە دیارترینیان نەمانی کورسی پێکهاتەکانی هەرێمی کوردستان بوو، نەیارانی گەلی کوردستان ویستیان ئیرادەی خۆیان بیسەپێنن بەسەر پارتی و هەرێمی کوردستان، بەڵام خەڵکی کوردستان زۆر باش دەیانزانی کە ئەگەر ئێستا هەڵبژاردن بکرێت، هەرێمی کوردستان ڕووبەڕووی زۆر کێشەی گەورە دەبێت.
سەرەتا یەکێک لە خاڵە بەهێزەکانی هەرێمی کوردستان بابەتی پێکەوەژیانە ل هەرێمی کوردستان، هەرێمی کوردستان زۆرجار بابەتی یەکگرتن و بوونی ئیرادەی پێکهاتەکانی تری کوردستان وەک نموونەیەکی بەهێزی دیموکراسی پیشانی جیهان داوە، بەڵام دوای بڕیارەکەی دادگای فیدراڵی، چیتر نابێت خەڵکی کوردستان ئەمە قەبووڵ بکەن، چونکە بەیانی ئەگەر باسی زوڵمی براکانمان بکەین لە وڵاتێکی تر، هەموویان دەلێن ئێوە ل هەرێمی کوردستان رێز لە پێکهاتەکان نەگرت، چۆن ئێستا باسی مافی خەڵکانیتر دەکەن.
خاڵێکی تری زۆر گرنگ ئەوەیە کە هەڵبژاردن نیشانەی ئیرادەی گەل بێت، گەل بە ئازادی و دوور لە هەموو کارت و فشارێك دەنگ بە ئەو هێزە بدات کە بۆ چوار ساڵی داهاتوو حوکمڕانی هەرێمی کوردستان دەکات، بەڵێ لە دۆخێکی وادا چەند پلان لە دژی پارتی دیموکراتی کوردستان و خەڵکی هەرێمی کوردستان دانراوە؟ ئایا لە دۆخێکی وادا چۆن دەتوانین باسی هەلبژاردنێکی ئازادانە بکەین؟
کاتێک بەرپرسانی پارتی دەڵێن، ئێمە پشتگیری هەڵبژاردنێک ناکەین کە پێشتر پلانی بۆ دانراوە، پەیامێکی زۆر ڕوونمان هەیە، کە بەشێک لە هێزەکانی هەرێمی کوردستان، بە پشتیوانی دوژمنانی کوردستان، دەیانەوێت هەڵبژاردنێک بکەن کە هەرێمی کوردستان تووشی ئایندەیەکی نادیار بکەن، بێگۆمان نە پارتی و نە خەڵکی هەرێمی کوردستان ئەمە قەبوول ناکەن.
نابینم خەڵکی هەرێمی کوردستان ڕازی بن کە پێش هەڵبژاردن چەند کەسێک بڕیار لەسەر چارەنووسی خۆیان بدەن، ساڵانی کار و قوربانیدانی خەڵکی هەرێمی کوردستان بۆ ئەمە بووە تا بتوانین بە ئازادی لەسەر خاکی خۆمان بژین، بڕیارمان بەدەست ئێمە بێت، نامانەوێت چەند هێزەک بۆ بەرژەوەندی تەسکی خۆیان پشت هەرێمی کوردستان تووشی ئایندەیەکی نادیار بکەن.
ئەگەر هەڵبژاردن تەنها بۆ ئەوە بکرێت کە بە خەڵکانێک بڵێین ئێمە هەڵبژاردنمان کرد و ئەنجامی هەڵبژاردنەکە پێشوەختە دیاری دەکرێت، ئەوا باشتر وایە هەڵبژاردن هەر نەکرێت، با خەڵکی کوردستان ئیرادەی ئازادی و ئازادی خۆی هەبێت لە دەستێوەردانی دەرەکییەوە بۆ ئەوەی بە شێوەیەکی ئازاد پشتگیری لە هەڵبژاردن بکەین، پێش هەر شتێک، دەبێت بابەتی کورسی پێکهاتەکان لە هەرێمی کوردستان یەکلایی بکرێتەوە، بۆیە جارێکی دیکە پشتگیری لە هەڵوێستی بوێر و مێژوویی پارتی دیموکراتی کوردستان دەکەم.
