جوولانەوەیەكی پڕ لە سووكایەتی

پشتیوان كەریم

سەرۆكی بزووتنەوەیەكی نوێ بێت و هێشتا كورسییەكانی پەرلەمانتان نەگەیشتبێتە پەنجەی دەست، وشەی بێ ئەخڵاق لە ئاست پەرلەمانتاران كە نوێنەری خەڵكن بەكار بێنی، هەر كەناڵی راگەیاندنی و سۆشیاڵ میدیا هەیە بۆ سووكایەتی كردن بە دژ بەرانت بەكار بهێنی، بێ ئەوەی رەچاوی هیچ ئەتەكێت و فەرهەنگی دەربڕین بكەی.
بێ گومان ئەو شەڕە جنێوە و تەشهیر و ناوزڕاندنەی چەند ساڵێكە هاتۆتە نێو كۆمەڵگە و شەقام هەر لەو كانییەوە سەرچاوەی گرتووە، پێموایە بۆ گەڕاندنەوەی شكۆی هاووڵاتی و بەرژەوەندی گشتی پێویستە بەهەر نرخێك بێت كۆتایی پێبهێندرێت.
رەخنە و ململانێ كردن بۆ گەیشتن بە دەستەڵات كارێكی تا سەر مۆخ پێویست و پیرۆزە، بەڵام لە چوارچێوەیەكی ئەخڵاقی، كە دوور بێت لە ئیهانە كردنی ئەوی دی، ئاساییە ئەوی دیكەت قبوڵ نەبێت، ئەوی دیش تۆی قبوڵ نییە، بەڵام ناشێ زمانی بۆگەن لە ئاست یەكتر بەكار بهێندرێت و درۆی وا بكەن كە شەقام ئینتمای نیشتمانی لا نەمێنێت و هەموو ئەو دەستكەوتانەی هەن بخەیتە مەترسییەوە تەنها لەبەر ئەوەی دۆخەكە بە دڵی تۆ نییە.
ئەوەی سووكایەتی هەیە لە كەناڵەكانی نەوەی نوێ لە ئاست لایەنە سیاسییەكان و ئەو رۆشنبیر و نووسەرانەی هاوبیریان نین دەكرێت، گۆرانی بێژێك بەدڵی ئەوان نەجوولێتەوە كار بۆ ناشیرین كردنی دەكەن.
تەنها بۆ خۆ بە پاڵەوانكردن و دەركەوتنیان لە شاشەكانەوە ئامادەن دەست بۆ هەموو شتێك ببەن، هەتا ئەگەر لە بەرژەوەندی هەرێمی كوردستانیش نەبێت.
نەوەی نوێ 3 پەرلەمانتاری هەیە، هەڵوێستێكی سیاسییان بە قسەی سەرۆكی جولانەوەكیان دەربڕی، دەستیان خۆش بێت، بەڵام 107 پەرلەمانی دیكە بە بێ ئەخڵاق لە قەڵەم بدەیت ئەمە بەخۆی لووتكەی بێ ئەدەبی ئەو جار بێ ئەخڵاقییە.
تۆ هێشتا نەگەیشتوویتە دەستەڵات خەڵك و نوێنەرەكانیان بە بێ ئەخڵاق لەقەڵەم بدەی، بگەیتە دەستەڵات دەبێ چ دیكتاتۆرێكت لێ دەربچێت، ئەمڕۆ بە نوێنەری خەڵك بڵێی بێ ئەخڵاق ئەو كات زمانی رەخنەگرەكانیش دەبڕی، بۆیە ئەم دۆخ و بەرپرسانەی ئێستا بە هەموو كەموكورتییەكانیانەوە كە هەیانە، هەر نەبێ رێگە دەدەن بە ئازادانە سێ پەرلەمانتار هەڵوێست وەربگرن و پێشیان نەڵێن سەرچاوتان دوو برۆیە، بە راستەوخۆ لە كەناڵەكانی راگەیاندنیش بڵاو كرایەوە، بەڵام یەك كەس رەخنە لە جولانەوەكەی خۆت بگرێت و هەمان زمانی خۆتان لە ئاستان بەكار بهێنێت، نەك سووكایەتی پێ دەكەن، بەڵكو دەست دەكەن بە تیرۆری رۆحی و دەست بۆ خێزان و ماڵ و حاڵیشیان دەبەن. وەك ئەوەی بینیمان دەستان بۆ تیرۆر كردنی كەسایەتی پەرلەمانتارانی خۆتان برد و هەڕەشەی بڵاو كردنەوەی گرتەی ڤیدیۆییتان لێ دەكردن.
شوكور هوشیارە مەحوی، ئێوەش ئەگەر عاقڵ نەبن و ژیرانە سیاسەت نەكەن، حاڵتان لەوانەی پێشخۆتان باشتر نابێ.