شەهلا رەشید- سۆران :
پزیشكێكی پسپۆڕی راهێنەری توانا عەقلییەكان، باسی هاوسەنگی و هەماهەنگی نێوان دڵ و مێشك دەكات.
د. خاڵس قادر، پزیشكی پسپۆڕی هەناوی و راهێنەری توانا عەقلییەكان، بە زاری كرمانجی راگەیاند” توێژینەوە زانستییە تازەكان، دەریانخستووە لە دڵدا تۆڕی دەماری تایبەت هەیە، لە هەزاران دەمارە خانە پێك دێت كە بەشێوەیەكی سەربەخۆ كار دەكەن هاوشێوەی كاركردنی تۆڕی دەماری مێشك، توانای بیركردنەوە و هەست و یادەوەریان هەیە، هەروەها دەركەوتووە بە پێچەوانەی بۆچوونە باوەكان، ژمارەی ئەو پەیامانەی دڵ بۆ مێشكی دەنێرێت، 9 جار زیاترە لەو پەیامانەی كە مێشك بۆ دڵ دەنێرێت، بەواتایەكی تر گفتووگۆی نێوان دڵ و مێشك ئەوەیە كە دڵ بەردەوام قسە بۆ مێشك دەكات، بەڵام كاتێك مێشك لە بارێكی نائارام دابێت گوێ بۆ پەیامەكانی دڵ ناگرێت و نایانبیستێت، بە پێچەوانەی ئەو كاتانەی كە مێشك لە بارێكی دەروونی باشدایە وەك خۆشەویستی، چاكەكاری و هاوسۆزی مێشك گوێ لە پەیامەكانی دڵ دەگرێت و بەهاوسەنگی بەیەكەوە كار دەكەن، بەمەش هەستكردن بە دڵخۆشی، باشبوون، هاوسۆزی و ئارامی دروست دەبێت.
ئەم پزیشكە، گووتیشی” هاوسەنگی و هەماهەنگی دڵ و مێشك، ئەو حاڵەتەیە كە تێیدا باری دەروونی و سۆزی و جەستەیی هاوسەنگ و باش و ئاسودە دەبن و بەڕێكی بەیەكەوە كاردەكەن، هەناسە، لێدانی دڵ، پەستانی خوێن و سیستەمی هۆڕمۆنی لە جەستەدا بە رێك و پێكی لەگەڵ یەك كار دەكەن، لەم حاڵەتەدایە كە هاوسەنگی دروست دەبێت لە كاركردنی هەردوو سیستەمی دەماری سیمپەساوی و پاراسیمپەساوی.
د. خاڵس قادر، ئاماژەی بەوەشكرد” توێژەرە زانستییەكانی پەیمانگەی Heart Mathلە وڵایەتی كالیفۆڕنیا لە ئەمریكا، تەكنیكێكی زانستی سەلمێندراویان داهێناوە بۆ دروستكردنی هاوسەنگی و هاوهێزی كاركردن لەنێوان دڵ و مێشك، ناویان ناوە هاوسەنگی و هەماهەنگی دڵ و مێشكHeart Brain Coherence دەركەوتووە كاتێك دڵ و مێشك لە هاوسەنگی دابن ئەوا:
- مێشك و دڵ بەباشی كاردەكەن .
- بیركردنەوەكان روون و چاك و گەشبین دەبن.
- توانای فێربوون باشتر دەبێ.
-دەبێتە هۆی زیادبوونی توانای یادەوەری، شیكردنەوەی زانیاری، بەبیرهاتنەوە. - بەرگری لەش بەهێز دەبێ.
-لێدانی دڵ رێك و كەمتر دەبێت.
-هۆكارە بۆ كەمكردنەوەی پەستانی خوێن.
-شەكری خوێن رێكتر دەكات. - توانای خۆ كۆنترۆڵكردن باشتر دەبێ.
- دڵخۆشی و ئارامی دەروونی بەرجەستە دەبێت.
