مەهدی محەممەد – زاری كرمانجی :
یاری نێوان ڕیال مەدرید و مانچێستەر سیتی دڵتەنگی زۆری بۆ خەڵكی ناحیەی ئەلمەیمونە لە پارێزگای میسانی عێراق دروست كرد، دوای گیانلەدەستدانی گەنجێك كە لە سەربانی باڵەخانەیەكەوە كەوتە خوارەوە.
عەباس حسێن ئەلمریانییە تەمەن 23 ساڵ، لە كاتی سەیركردنی یاری نێوان ڕیال مەدرید و مانچێستەر سیتی لە سەربانی كافەیەكیی ناوچەكە كەوتە خوارەوە و گیانی لە دەستدا.
شایەتحاڵانی ڕووداوەكە دەڵێن “ئەو دروشمە پڕ لە جۆش و خرۆشانەی لە كاتی یارییەكەدا بوون، دوای كەوتنە خوارەوەی عەباس گۆڕا بۆ هاوار و دڵتەنگی و خەڵكی ناوچەكە تووشی شۆك بوون.”
دەزگا ئەمنییەكان لە ئێستادا لێكۆڵینەوە لە ڕووداوەكە دەكەن، بۆ ئەوەی هۆكاری كەوتنە خوارەوەی گەنجەكە بزانن و دڵنیا بن لەوەی هیچ گومانێكی تاوانكاری نییە.
