هەوڵمانداوە و نووسراویشمان بەرزكردۆتەوەو ئومێد دەكەین لە ماوەیەكی نزیكدا یاریگاكە نۆژەنبكرێتەوە.
سۆران سرێشمەیی_خەلیفان
گەنجانی دۆڵی بیاو باس لە پێویستی نۆژەنكردنەوەی یاریگای چیمەنی دەستكردی خەلان بیاو دەكەن كە پێشتر لەلایەن ناوەندی لاوان بۆ یاریزانانی ئەو ناوچەیە درووستكراوەو ماوەی دوو ساڵە بەجۆرێك تێكچووە بەكەڵكی یاریكردن نایەت، بەرپرسی ناوەندی لاوانی خەلیفانیش دەڵێت، ئەوەی پێویست بوو بێت لە هەوڵدان بۆ نۆژەنكردنەوەی یاریگای بوچكراوەی خەلان بیاو كردومانەو بەڵێنیش دەدەین هەرچیەك لە توانای ئێمە بێت درێخی ناكەین.
وەرزشوان وشیار عارف، دانیشتووی گوندی قەمەریان لەبارەی گرنگی ئەو یاریگایەو نۆژەنكردنەوەی بەزاری كرمانجی ڕاگەیاند:” ماوەیەكی زۆرە یاریگایەكی بچوكراوەی تۆپی پێ لە دۆڵی بیاو بۆ گەنجان و یاریزانانی ئەو سنورە درووستكراوەو ببووبە ماییەی دڵخۆشی و بەسەربردنی كاتێكی خۆش بۆ وەرزشوانانی ئەو سنورە. ئەمە جگەلەوەی هۆكارێكیش بووە بۆ بەرەو پێشچوونی بواری وەرزشی لە خەلان بیاو گوندەكانی. بەڵام بە داخەوە ماوەیەكی زۆرە بۆتە جێگەی “مۆ”بوونی مانگاو ماڵات، بۆیە داوا لە لایەنی پەیوەندار دەكەم ئاوڕێك لە گەنجانی سنوری دۆڵی بدەنەوەو هەر هیچ نەبێت ئەو یاریگایەمان بۆ نۆژەن بكەنەوە.”
سەبارەت بە هەوڵ و داواكاری بۆ نۆژەنكردنەوەی یاریگاكەیان. سیروان خەلانی دەڵێت:”ماوەی دوو ساڵە یاریگاكە تێكچووەو چەندینجاریش لە ڕێگەی ناوەندی لاوان و بەرپرسانی حزبی و حوكمی و تەنانەت كەسایەتیەكانیش داوامان كردووە یاریگای چیمەنی دەستكردی خەلان بیاو بۆ گەنجانی ئەو سنورە چاكبكرێتەوەو بخرێتە خزمەتی وەرزشوانان، وە لەمبارەیەوە بەتایبەتیش لە كاتی بەڕێوەچوونی هەڵبژاردنەكان بەڵێنی زۆرمان پێدراوە بەڵام بەداخەوە هیچی لێ سەوز نەبوو، ئەمەیەش نیگەرانی لە لایەن گەنجانی دۆڵی بیاو درووستكردووە كە مافی خۆیانەو پێویستیشە شوێنێك هەبێت كۆیانبكاتەوەو كاتێكی خۆشی تێدا ببەنە سەر، چونكە لە ئەنجامی نەبوونی سەنتەرو ناوەندێكی ڕۆشنبیری و كتێبخانە، هەر هیچ نەبێت یاریگای چیمەنی دەستكردی خەلان بیاو نۆژەنبكرێتەوە تا كەمێك نیگەرانی گەنجان بڕەوێندرێتەوەو دووبارە بواری وەزرشی بەتایبەتیش تۆپی پێ زیاتر بەرەو پێشەوە ببرێت.”
لەم بارەیشەوە سەیدۆ جەمال، بەرپرسی ناوەندی چاڵاكی و پێگەیاندنی لاوانی خەلیفان ڕوونیكردوە:” لەو كاتەی ئێمە وەك ستافی نوێ لە ناوەندی لاوانی خەلیفان دەستبەكاربووین ئەو یاریگایە و ژمارەیەك یاریگای تر لە سنوری ناحیەی خەلیفان تێكچوو بوون و خۆشبەختانە لە ڕێگەی گرێبەستێكەوە توانیمان بەشێكیان نوێ بكرێتەوە، بەڵام لەلایەك بەهۆی كەمی توانای دارایی نەتوانراوە یاریگاكە نۆژەنبكرێتەوە، لە لایەكی تریشەوە سەرباری هەوڵی زۆر و كارئاسانی پتر هیچ كەسێك نیە لە چوارچێوەی گربێبەستێكدا بتوانێت ئەركی چاككردنەوەی یاریگای خەلان بیاو لە ئەستۆ بگرێت، هاوتەریب لەگەڵ ئەوەشدا لە ڕێگەی جۆراوجۆرەوە هەوڵیێكی زۆرمانداوەو نووسراویشمان بەرز كردۆتەوە بەو هیوایەین لە نزیكترین كاتدا كار لەسەری بكرێت و لە هەوڵەكانیشمان بەردەوام دەبین چونكە گەنجانی دۆڵی بیاو مافی خۆیانە یاریگایەكی شیاویان هەبێت بۆ ئەوەی چاڵاكیە وەرزشیەكانیانی تێدا ئەنجامبدەن و بواری وەرزشی لەو سنورە بەرەو پێشەوە بچێت.”
