كارگەی زۆم وایكردووە خەڵكی ئیدارەی سۆران زیاتر بایەخ بە بەخێوكردنی مەڕ و ماڵات بدەن

محەمەد مەحموود-مێرگەسۆر:

بەهۆی بوونی كارگەی زۆم بۆ بەرهەمە شیرەمەنییەكان لە دەڤەری بارزان، خەڵكی سنووری ئیدارەی سۆران لەو چەند ساڵە زیاتر بایەخ بە بەخێوكردنی مەڕ و ماڵات دەدەن، جگە لە رەخساندنی چەندین هەلی كار بۆ هاووڵاتییان و مانەوەی هاووڵاتییان لە گوندەكانیان و دەستكەوتنی داهات.

محەممەد رەشید، بەڕێوەبەری كشتوكاڵی مێرگەسۆر، لەسەر گرنگی كردنەوەی كارگەی زۆم و زیادبوونی خواست لەسەر بەخێوكردنی مانگا و مەڕ و بزن لەو سنوورە لە لێدوانێكیدا بۆ زاری كرمانجی گوتی” كارگەی زۆم، پڕۆژەیەكی ناوازەی بەرهەمهێنانی بەرهەمەكانی شیرەمەنییەكانە لە دەڤەری بارزان، ئەم پڕۆژەیە هەلی كاری بۆ سەدان كەس رەخساندووە.

بەڕێوەبەری كشتوكاڵی مێرگەسۆر، باس لەوەش دەكات ” ئامانج لە دامەزراندنی ئەو كارگەیە بۆ ئەوەبوو ئەو بەرهەمەی لەو سنوورە هەیە كاری بە بازاڕ كردنی بۆ بكەین، چونكە لێرە بەرهەمی شیرمان زۆر بوو، جگە لەوەش بەكردنەوەی ئەو كارگەیە خەڵكی ئەو ناوچەیە دەبنە خاوەن داهاتی خۆیان و گوندەكانیش زیاتر ئاوەدان دەبنەوە”.

محەممەد رەشید، گوتیشی” ئێستا بەرهەمهێنانی شیر زیاتر بووە خەڵك زیاتر گرنگی بە سامانی ئاژەڵ دەدەن، بەمەش بە شێوەیەكی ناراستەوخۆ چەندین دەرفەتی كار و سەرچاوەی داهات زیادبوونە، لە كڕینی مانگا و چاندنی وێنجە و بە بازاڕ كردنی شیری ئاژەڵداران ئامانجی هەر سەرەكی بوو”.

بەڕێوەبەری كشتوكاڵی مێرگەسۆر، ئاماژەی بەوەشدا: ئەگەر بێت و حكوومەت قەرزێك بدات بە جوتیاران و خەڵك بتوانێت مانگای باشتر بكڕن بە تایبەتی ئەوانەی بەرهەمی شیریان زۆرە، وادەكات بووژوانەی زیاتر بێتە ئاراوە بە شێوەیەكی گشتی، دەشمانەوێت ئەو زەویانەی لە نزیك رووبارەكانن بكرێنە وێنجەو بە نرخێكی هەرزانتر بفرۆشینە ئاژەڵدارەكان، ئەوكات تێچووی بەرهەمهێنانی شیریش كەمتر دەبێتەوە و جووتیارانیش زیاتر قازانج دەكەن.

بەڕێوەبەری كشتوكاڵی مێرگەسۆر، ئەوەش بۆ زاری كرمانجی دەخاتەروو” بە بوونی ئەو كارگانە بەرهەمێكی تەندروست دەكەوێتە بازاڕ و پارەی خۆشمان ناچێتە وڵاتێكی تر لەناو خۆی وڵات دەمێنێتەوە، جگە لەوەش لە هەوڵەكانمان بەردەوامین بۆ وەرگرتنی قەرزی كشتوكاڵی بۆ ئەو كەسانەی توانای داراییان وەك پێویست نییە و مەبەستیانە ئاژەڵ بەخێو بكەن.

رۆژی سێشەممە 30 ئایاری ٢٠٢٣ لە مەڕاسیمێكدا بە ئامادەبوونی مەسرور بارزانی، سەرۆكی حكوومەتی هەرێمی كوردستان لە گوندی ژاژووكی سەر بە ناحیەی گۆڕەتوو لە قەزای مێرگەسۆر، كارگەی شیرەمەنی زۆم كرایەوە”.
ئەو كارگەیە لە ئێستادا هەلی كاری بۆ زیاتر لە 200 هاووڵاتی ناوچەكە رەخساندووە، ئەو ژمارەیەش بەرەو هەڵكشانە”.
سەرەڕای ئەوەی كارگەكە بەشێوەی ناراستەوخۆ هەلی كاری بۆ زیاتر لە ٢٧٠٠ ئاژەڵدار رەخساندووە، لە رێگەی كڕینی شیرەوە، لە هەمان كاتدا دەبێتە هۆی ئەوەی جووتیاران بەروبوومە كشتوكاڵییەكان بە ئاژەڵدران بفرۆشن، ئەمەش دەبێتە هۆی بووژاندنەوەی كەرتی ڤێتێرنەری و رەخساندنی دەرفەتی كار بۆ شارەزایانی ئەو بوارە”.

لە ئێستادا زیاتر لە ٢٠ بنكەی كۆكردنەوەی شیركر لە سنووری ئیدارەی سەربەخۆی سۆران كراونەتەوە، دروستكردنی ئەم جۆرە كارگانە ڕۆڵی دەبێت لە هاوكاریكردنی حكوومەت بۆ كەمكردنەوەی داواكاری هاووڵاتییان بۆ دامەزراندن.