سەردار قازی ـ زاری كرمانجی:
ئێوارەی دوێنێ یەكشەممە، ئیكەر كاسیاس هاوسۆزانی خۆی لەسەرانسەری جیهان بەگشتیی و وڵاتە ئیسلامییەكان بەتایبەتی بردە باری شۆك بوون، كاتێك لەتوویتێكدا لە لاپەڕەی خۆی گوتی” بمبوورن بەڵام من هاوڕەگەز خوازم.”
زۆری نەبرد كاردانەوەكان دەستیان پێكرد و پێش هەموو یانە مێژووییەكەی كاسیاس، ریال مەدرید ئەو یاریزانەی لەتوویتەر ئەنفۆڵۆو كرد.
بەپێی راپۆرتی رۆژنامەی “AS”ی ئیسپانیا، تویتەكەی ئەو یاریزانە سەبارەت بە هاوڕەگەزبازبوونی تەنها گاڵتەجاڕییەكە، دوای ئەوەی لەماوەی رابردوودا بووە سەردێڕی رۆژنامەكانی ئیسپانیا، لە ئەنجامی ئەو دەنگۆیانەی كە باس لە بوونی چیرۆكێكی خۆشەویستی لەگەڵ ئەلیخاندرا ئۆنیڤای ئەكتەریان ئیسپانی دەكرد.
هەروەها لە پڕۆگرامی “Socialité”ـی ئیسپانی دەركەوت، كە ئەفسانەی پێشووی ریال مەدرید، لە چەند هەفتەی ڕابردوودا لە چەند بۆنەیەكدا بە شێوەیەكی تایبەت لەگەڵ ئەو خانمە ئەكتەرە بینراوە، بەشێك لەو دیدارانە بووە هۆی وروژاندنی جۆشێكی زۆری كاسیاس.
لەمەڕ ئەو كەیسە لە ڕاپۆرتی تۆڕی “میدیاسێت”ـی ئیتاڵی ئاماژەی بەوە كردووە، كە سەرچاوە تایبەتەكان ئاشكرایان كردووە كە كاسیاس و ئەلیخاندرا ڕۆژانە قسە دەكەن، و دەتوانین بڵێین كە یەكتر دەناسن.
كاردانەوەی ئیكەر كاسیاس
ئەو گۆڵپارێزەی پێشووتری لۆس بلانكۆس، زۆرێك لە فۆڵۆوەرەكانی تووشی سەرسوڕمان كرد و لە هەژماری فەرمی خۆی لە تویتەر نووسی: “هیوادارم ڕێزم لێ بگرن: من هاوڕەگەزخوازم”.
تویتەكە بەخێرایی بڵاوبووەوە و لەماوەی كەمتر لە یەك كاتژمێردا 200 هەزار لایكی تێپەڕاند.
هەرزوو دوای پۆستەكەی كاسیاس، كارلێس پویۆل كاپتنی پێشووی بارسێلۆنا بەگاڵتەجاڕییەوە بۆ كاسیاسی نووسی: كاتی ئەوە هاتووە باسی بكەین.”
لەهەمانكاتدا مارك بارترای بەرگریكاری پێشووی بارسا، كە ئێستا یانەی ترابزۆنسپۆری توركییە، پشتگیری لە تویتەكەی كاسیاسی كرد و كۆمێنتێكی كرد: “كاتی ئەوە دەرخستنی راستییەكان هاتووە هاوڕێكەم”.
دواتر كاپتنی پێشووی ریال مەدرید، پۆستەكەی لە پرۆفایلی خۆی سڕییەوە بەهۆی ئەو كاریگەرییانەی كە لەسەری دروستی كردبوو. لە تویتێكدا نووسیویەتی: بەداخەوە ئەكاونتەكەم هاك كرابوو، خۆشبەختانە هەموو شتێك باشە، داوای لێبوردن لە هەموو فۆڵۆوەرەكانم دەكەم و بێگومان داوای لێبوردنی زیاتریش لە كۆمەڵگەی ئێڵ جی بی تی LGBT دەكەم.”
ئەم بابەتەی كاسیاس لەكاتێكدا تەقیوەتەوە، كە پێشووتر خواستی خۆی بۆ بەربژێری سەرۆكایەتی فیدراسیۆنی ئیسپانیا دەربڕیوە. پێشووتریش لەتۆمارێكی دەنگی فلۆرێنتینۆ پێرێز، سەرۆكی یانەی ریال مەدرید كە بڵاوبووەوە، دەڵێت” كاسیاس و رائول گۆنزالێز، دوو فێڵبازترین یاریزانی مێژووی ریال مەدریدن.”
