مەهدی محەممەد – زاری كرمانجی:
هێزە ئەمنییەكان سەرۆكی شارەوانی و دوو لە براكانی بە تۆمەتی بازرگانیكردن بە ماددە هۆشبەرەكانەوە دەستگیركرد.
لە چوارچێوەی هەڵمەتێكی نیشتمانی بۆ نەهێشتنی پەرەسەندنی بازرگانی ماددە هۆشبەرەكان لە شار و شارۆچكەكانی فەرەنسا، جەمیلە حەبساوی سەرۆك شارەوانی ئەڤاڵۆن، دوای پشكنینی ماڵەكەی لەلایەن هێزە ئەمنییەكانەوە 70 كیلۆگرام حەشیش دەستی بەسەرداگیرا.
ئاژانسی فرانس پرێس لە زاری (هوگ دی ڤیل) داواكاری گشتی بڵاوی كردەوە “دوای چەند هەفتەیەك لە هەڵمەتی بەدواداچوون و لێكۆڵینەوەی وردی هێزە ئەمنییەكان لەبارەی بازرگانیكردن بە ماددە هۆشبەرەكان لە شاری ئەڤاڵۆن، دەركەوت سەرۆك شارەوانی ئەڤاڵۆن كاری بازرگانی ماددە هۆشبەرەكان دەكات، بۆیە هێزە ئەمنییەكان هەڵیانكوتایە سەر ماڵ و شوێنی كارەكەی و 70 كیلۆگرام حەشیشیان لە ماڵەكەی دۆزییەوە.”
بەپێی ئاماری داواكاری گشتی، لە ئەنجامی هەڵمەتەكە 983 گرام كۆكاین و حەوت هەزار یۆرۆ بە كاش و نزیكەی 20 قاڵبی زێڕ دەستی بەسەرداگیراوە و بە گشتی لەسەر دۆسیەكە حەوت كەس دەستگیركراون، كە لەنێویاندا ئەلحەبساوی و دوو برای هەن.
