زاری كرمانجی-سۆران:
سەركردەیەكی پێشووی یەكێتیی نیشتمانیی كوردستان كە سەرۆكی خولی دووەمی پەرلەمانی كوردستانیش بووە، دان بەوەدا دەنێت كە بڕیارەكەی دادگای فیدڕاڵیی عێراق، بۆ هەڵوەشاندنەوەی كورسیی كۆتای پێكهاتەكان، لایەنی سیاسیی هەیە و پێشێلكردنی یاساكانی هەرێمی كوردستان و دەستووریشە.
عەدنان موفتی رای گەیاند، بەشێک لە بڕیارەکانی دادگای فیدڕاڵی زیاد لە سنووری خۆیان ڕۆشتوون، چونکە ”هەندێک لەو بڕیارانە لە دەسەڵاتی حکوومەتی فیدڕاڵی و بەشێکیشیان هی پەرلەمانی عیراقن، بەڵام دادگای فیدڕاڵ خۆی کردۆتە خاوەنیان، ئەمەش پێچەوانەی دەستووری عێراقە. دادگای فیدڕاڵی ڕاستە بڕیارەکانی کۆتایین، بەڵام دەستوور لە سەرووی هەموو یاساکانەوەیە.
هەروەك باسی لەوە كردووە كە لە دەستووری هەمیشەیی عێراقدا دوو ماددەی گرنگ هەن، یەکێکیان پەیوەندیی بە قەوارەی هەرێمی كوردستانەوە هەیە و تێیدا هاتووە ”قەوارەی هەرێمی كوردستان پارێزراوە بە هەموو یاساکانیەوە.“
عەدنان موفتی دەڵێ: ”واتە پێش دەنگدان بە دەستوور، ئەمە جێگیر کراوە. بەڵام بە نموونە لابردنی کورسیی پێکهاتەکان کە بە یاسا ڕێکخراوە و یەکێتی و پارتی دەنگیان لەسەر داوە، لابردنیان بە بڕیاری دادگا، پێشێلکاریی یاساكانی هەرێمی کوردستانە. پرسیار لەوەدایە کە کورسیی کۆتاکان هەڵوەشایەوە، بۆچی کورسیی پێکهاتەکان لە بەغدا و لە مووسڵ هەڵنەوەشاوەتەوە؟ لەمەوە تێدەگەین بڕیارەکانی دادگای فیدڕاڵی تەفسیر دەکرێت کە جانبی سیاسی هەیە.”
ئەو سەركردەیەی پێشووی یەكێتی لە چاوپێكەوتنەكەیدا لەگەڵ بەشی كوردیی دەنگی ئەمریكا، هۆكاری دۆخی ئەمڕۆی بۆ نەبوونی یەكڕیزی گەڕاندۆتەوە و بە پێویستی زانیوە ”یەکڕیزبین و بە یەک سیاسەتەوە مامەڵە لەگەڵ عیراق و وڵاتیانی دراوسێش بکرێت. لە هەموو ئەو ساڵانەی گوتاری هاوبەشمان هەبووە، هەرێمی كوردستان باش بەڕێوە چووە وە خەڵکیش ڕازی بووە و دەستکەوتی گەورەش بۆ گەلەکەمان بەدەست هاتوون، لە پێش هەمووشیانەوە جێگیرکردنی مافەکانی کوردە لە دەستووری هەمیشەیی عێراقدا.“
ئەمە لە كاتێكدایە كە بڕیارە سیاسییە نادەستوورییەكانی دادگای فیدڕاڵیی عێراق لە دژی یاسای هەڵبژاردنی پەرلەمانی كوردستان، لەسەر سكاڵایەكی یەكێتیی نیشتمانیی كوردستان هات كە بۆ لە ماوەی دوو ساڵی رابردوودا و بۆ دواخستنی هەڵبژاردن، سكاڵاكەی لە دادگای فیدڕاڵی تۆمار كرد.
