زاری كرمانجی – سۆران :
بەشێك لە سیاسەتمەدارانی عێراق هەڵوێستەكانی سەرۆك بارزانی و حكومەتی هەرێمی كوردستان بەرز دەنرخێنن و پێیان وایە حكومەتی هەرێم نیازپاك بووە بەرامبەر بە ڕێككەوتنەكانی لەگەڵ بەغدا و ئاشكراشی دەكەن هەندێك لایەنی عێراقی نەیانویستووە ئەو ڕێكەوتنانە سەربگرن.
ئالووسی : ناكرێت ئەوانەی بەئاسانی خۆ بەدەستەوە دەدەن و ملكەچی میلیشیاكانن داكۆكیكاری مافەكانی كورد بن
میسال ئالووسی سیاسەتمەداری ناوداری عێراقی، هەڵوێستی پارتی و بارزانی بەرامبەر بە هەڵبژاردنەكانی هەرێمی كوردستان بە شكستخواردنی ئەو كەس و دەستانە ناو دەبات كە دەیانەوێت كوردستان ملكەچ بكەن و دەڵێ ” هەڵوێستی سەرۆك بارزانی و پارتی چقڵێكە لەچاوی ئەو كەسانەی دەیانەوێت كوردستان خۆ بەدەستەوە بدات،” دەشڵێت “ناكرێت ئەوانەی بەئاسانی خۆ بەدەستەوە دەدەن و ملكەچی میلیشیاكانن داكۆكیكاری مافەكانی كورد بن.”
ئالووسی ئەوەشی خستە ڕوو “هەڵوێستی نەگۆڕی بارزانی و پابەندبوونی بە بەهاكانی دەوڵەتی فیدراڵی و بەرگریكردنی لە حورمەتی دەستوور و دادپەروەری و بێلایەنی دادگا، كۆتا هیوا و پارێزبەندی ئەو پرۆسە سیاسییەیە كە میلیشیا لە یاسا و عورف و نەریت دەرچووەكان دزەیان كردووەتە ناویەوە، نەك هەڵوێستی پارتی بەرامبەر هەڵبژاردنەكان و ڕەتكردنەوەی هەڵبژاردنێكی ئیفلیج كە مافی پێكهاتەكانی هەرێمی كوردستان ژێر پێ دەنێت و دەرگا واڵا دەكات بۆ ئەوەی دووبارە خۆفرۆش و نەفس نزمەكان جڵەو بگرنە دەست”.
ئاماژە بەوەش دەكات: “ناكرێت ئەوانەی بەئاسانی خۆ بەدەستەوە دەدەن و ملكەچی میلیشیاكانن داكۆكیكاری مافەكانی كورد و ئارامی و ئاساییشی كوردستان بن، ئەوەی چاوپۆشی بكات و ڕێككەوتن و سەقفە لەگەڵ میلیشیا وەلائییەكان بكات ئەوە مرۆڤ و هیوا و مافیش دەفرۆشێت لە پێناو مانەوەی لە قۆڵت و زەڵكاوی گومڕاودا”.
هەروەها گوتیشی: “هەڵوێستی پارتی و بارزانی بەرامبەر بە هەڵبژاردنەكانی هەرێمی كوردستان چقڵێكە لەچاوی ئەو كەسانەی دەیانەوێ عێراق و كوردستان خۆ بەدەستەوە بدات و ئەو هەڵوێستە بڕیارێكی بوێرانەیە بەرامبەر ئەو كەسەی بیەوێت ڕژێمی دیكتاتۆری سەددام بە دیكتاتۆرییەتێكی تائیفی و گاڵتەجاڕی و دادگایەكی بە سیاسیكراوی نا شەرعی و نا دەستووری بگۆڕێت”.
سیاسەتمەدارێكی تری عێراقی باس لەوە دەكات كە هەر لە سەرەتاوە حكومەتی هەرێمی كوردستان نیازپاك بووە بەرامبەر بە ڕێككەوتنەكانی لەگەڵ بەغدا و نایشارێتەوە هەندێك لایەن لە بەغدا نەیانویستووە ئەو ڕێككەوتنانە سەربگرن و جێبەجێ بكرێن.
شەممەری: هەمیشە گەشبینم بە نیەت و ڕاستگۆیی مەسروور بارزانی
ئیحسان شەممەری، سەرۆكی ناوەندی هزری سیاسیی عێراقی، ڕاگەیاند “حكومەتی هەرێمی كوردستان هیچ بیانوویەكی بۆ حكومەتی عێراقی نەیهێشتووە بۆ جێبەجێكردنی كارنامەی حكومەت و ڕێككەوتنەكان، ئەمەش ئیرادەیەكی گەورە و گرنگە لەلایەن حكومەتی هەرێمی كوردستانەوە”.
شەممەری گوتیشی: “هەر دوو سەرۆكوەزیران دەیانەوێت كێشەكان چارەسەر بكرێن، بەڵام هەندێك لایەن دەیانەوێت ئەم ئیرادەیە نەمێنێت”.
“من هەمیشە گەشبینم بە نییەتی ڕاستگۆیی مەسروور بارزانی سەرۆكی حكومەتی هەرێمی كوردستان، بەڵام دڵنیا نیم لەو لایەنانەی حكومەتی عێراقی كە جارێكی تر بەربەست و لەمپەر بەرامبەر ڕێككەوتنەكان دروست بكەن.”
دلێمی: هەرگیز هەولێر و پارتی خۆیان ڕادەست ناكەن..كورد سەرۆك بارزانی هەیە
هاوكات مستەفا دلێمی، سیاسەتمەداری دیاری عێراقی دەڵێ، هەموویان دەزانن پێش و پاش ساڵی ٢٠٠٣ و هەرگیز پارتی بە سەرۆكایەتی بارزانی خۆی ڕادەست نەكردووە بۆ ئەجێنداتی دەرەكی ئەمەش سیفاتێكی سیاسیی دیاری پارتییە لە مێژووی سیاسیی عێراقیدا. دەشڵێت “ئەم میراتە سیاسییەی بۆ پارێزگاری لە كوردستان لە بارزانی باوك ماوەتەوە تا گەیشتە سەرۆك مەسعوود بارزانی هەر لەبەر ئەوەش خۆیان بە خاوەنی قەزییەی كورد دادەنێن و خۆیان ڕادەست ناكەن”.
لەبارەی بەشداری نەكردنی پارتی بەم شێوازە لە هەڵبژاردنەكانی پەرلەمانی كوردستان دا و بڕیارەكانی دادگای فیدراڵی دژی هەرێمی كوردستان، دلێمی دەڵێت “بینیمان دادگای فیدراڵی كۆمەڵێك بڕیاری دەركرد كە دژی پارتی و هەرێمی كوردستان بوون، ئەویش بە گوشاری هەندێك لایەن و پێشتر تێبینیمان كردووە ئەم دادگایە بە پشتیوانی چەند لایەنێك گوشار دەكات لە هەرێمی كوردستان بۆیەشە بڕیاری بەشداری نەكردنی پارتی بەم شێوازە مافێكی ڕەوا و شەرعیی و دەستووری و ئەخلاقییە، چونكە ئەوانەی ئێستا دەسەڵاتی دەكەن هەموویان بڕیاریان داوە بەپێی دەستوور مامەڵە بكەن بەڵام پێچەوانەی دەستوور كار دەكەن ئێستاش خەڵكی شیعە لە باشووریش لەم هەڵسوكەوتەی ئێستای لایەنە بەشدارەكانی دەسەڵات ناڕازین”.
دلێمی باس لەوەش دەكات ئێستا ئەو سەركردە و لایەنانە ڕق و كینیان هەیە بەرامبەر هەرێمی كوردستان و بەتایبەت هەولێری پایتەخت چونكە پارتی و هەولێر خۆی ڕادەستی ئەجێنداتی دەرەكی ناكات لەبەر ئەوەش تیریان بەرامبەر پارتی و هەولێرە.
ناوبراو گوتیشی: “هەمیشە هەڵوێستەكانی سەرۆك بارزانی بە گرنگ و بەرز دەنرخێنم، هەڵوێستەكانی هەمیشە لە پێناو باشی و مانەوەی هەرێمی كوردستان و خەڵكدان و خاوەن هەڵوێستی گەورەیە بۆ هەموو خەڵكی عێراق و لە خەمی هەموو خەڵكدایە.
دەشڵێت، بینیمان بۆ ئاوارەبوونی سوننەكان لە كاتی هاتنە داعشدا هەڵوێستی گەورە و لە بیرنەكراوە و هەموو خێزانێكی سوننی باش ئەمەی لە بیرە و هەرگیزیش ئەو هەڵوێستەی سەرۆك بارزانی لە بیر ناكرێت كاتێك دڵ و ماڵی خۆیان بۆ سوننەكان كردەوە، بۆیە ئێمەش پشتیوانی هەڵوێستەكانی جەنابی سەرۆك و حكومەتی هەرێمی كوردستانین دەزانین سەرۆك لە خەمی خەڵك دایە”.
