شەهلا رەشید- سۆران:
پزیشكێكی پسپۆڕ، لە بواری زانستی خۆراك، باس لە هۆكارەكانی ئاوسانی سك و زۆری غازات دەكات و هۆكارەكانیشی دەخاتەڕوو.
د. كامەران رەسوڵ، پزیشكی پسپۆڕی خۆراك، بە زاری كرمانجی راگەیاند” ئاوسانی سك لە ئەنجامی كۆبوونەوەی غازات روودەدات، لە كاتی هەرسكردنی خواردن بڕێكی دیاریكراو گازی هەمەجۆر دروست دەبێت كە ئەمەش شتێكی ئاساییە، بەڵام هەركاتێك بڕەكەی زیاتر دروست بێت ئەوا ئاوسانی سكی لێدەكەوێتەوە، گرنگترین هۆكارەكانی ئاوسانی سك بریتین لەمانە:
- كەمی ئەنزیمی لاكتۆز، یان هەستیاری بە شیر و بەرهەمەكانی .
- هەستیاری بە گلوتین و نەخۆشی گەنم ( سیلایاك ).
- كۆنیشانەی تەهیجی كۆڵۆن .
- گەڕانەوەی تڕشەڵۆكی گەددە بۆ ناو سورێنجك و هەوكردنی سورێنجك.
- قورحەی گەددە و دوانزەگرێ.
- نەخۆشی كڕۆنز و هەوكردنی قورحەی كۆڵۆن.
- گیرانی ریخۆڵەكان
- نەخۆشی شەكرە، شێرپەنجە و بە ریشاڵ بوونی جگەر.
- هەندێ هۆكاری دیكەی وەك جوێنی بنێشت، جگەرە كێشان، ئەو دەرمانانەی كە ماددەی لاكتۆز، فرەكتۆز یاخود سوكرۆزی تێدایە.
- نەخواردنی بڕی پێویستی ماددە ریشاڵییەكان رۆژانە.
- كۆنیشانەی خنكان كە پاش نەشتەرگەری بڕینی بەشێكی زۆر یان هەموو گەددە روودەدات.
- دڵەڕاوكێ، قەلەقی و سترێسی زۆر، وەرزش نەكردن، قەڵەوی، رۆژانە خواردنی بڕێكی زۆر لە خوێ و شەكر، خواردن بەخێرایی، راستەوخۆ دوای نان خواردن پاڵ كەوتن و نووستن.
ئەم پزیشكە پسپۆڕە، ئاماژە بە چەند خواردنێكیش دەكات كە ئاوسانی سك زیاد دەكەن، لەوانە:
-پاقلە، فاسۆلیا، نیسك، نۆك و بازالیا . - شیر و بەرهەمەكانی.
- قەڕنابیت، بڕۆكلی و كەلەرم .
- میوەی وشكراو وەك مێوژ، هەنجیر و قەیسی.
- باینجان، كاهوو، سۆیا و پیاز.
- خواردنە چەورەكان وەك شیرینی، ماسی چەور، كێك و كەرە.
- ماددە شیرینكەرەكان و جێگرەوەی شەكر.
- ئەو خواردنانەی بڕێكی زۆر ماددەكانی رەنگی دروستكراویان تێدایە.
د. كامەران رەسوڵ، راشیگەیاند” لە كاتی هەبوونی ئەو نیشانانە كە لە خوارەوە ئاماژەیان پێدەكەین پێویستە سەردانی پزیشك بكرێت.
-بوونی غازاتی زۆری بەردەوام یان ئازاری سك . - رشانەوە یان سكچوون یاخود قەبزی زۆر و بەردەوام .
- خوێن لە ناو پیسایی
- دابەزینی كێش بە خێرایی
- دڵەكزێ
